1 Samwiri 28:1-25 LGCB2014 - Bible AI

¹ⓚ Mu biro ebyo Abafirisuuti ne bakuŋŋaanya amaggye gaabwe okulwana ne Isirayiri. Akisi nʼagamba Dawudi nti, “Kimanye nga ggwe ne basajja bo munaneegattako, tugende mu lutalo.”

²Dawudi nʼayogera nti, “Olwo nno ojja kwerabirako omuweereza wo kyayinza okukola.” Akisi nʼaddamu nti, “Weewaawo, nzija kukufuula omukuumi wange owʼoku lusegere ennaku zonna ezʼobulamu bwange.”

³ⓛ Mu biro ebyo Samwiri yali amaze okufa, nga ne Isirayiri yenna bamukungubagidde, era nga yaggwa nʼokuziikibwa mu kibuga kyʼe Laama. Era Sawulo yali agobye abafumu nʼabalogo okuva mu nsi.

⁴ⓜ Awo Abafirisuuti ne bakuŋŋaana, ne basiisira e Sunemu, ate Sawulo ye nʼakuŋŋaanya Abayisirayiri bonna ne basiisira e Girubowa.

⁵ⓝ Awo Sawulo bwe yalaba eggye eryʼAbafirisuuti, nʼatya, emmeeme nʼemutyemuka.

⁶ⓞ Ne yeebuuza ku Mukama, naye Mukama nʼatamwanukula mu birooto, newaakubadde mu kwolesebwa kwa Katonda eri bakabona oba okuyita mu bannabbi.

⁷ⓟ Awo Sawulo nʼagamba abaweereza be nti, “Munnoonyezeeyo omukazi omufumu, ŋŋende mmwebuuzeeko.”

⁷Ne bamugamba nti, “Waliwo ali Endoli.”

⁸ⓠ Awo Sawulo nʼayambala engoye ezitali za bwakabaka ne yeebuzaabuza nʼalaga ewʼomukazi, ye nʼabasajja abalala babiri. Nʼayogera nti, “Ndagula, ombuulize omwoyo era onyimusize gwe nnaayogera erinnya.”

⁹Naye omukazi nʼamugamba nti, “Omanyi bulungi Sawulo kye yakola, bwe yazikiriza era nʼagoba abafumu nʼabalogo mu nsi. Kale lwaki oteeka obulamu bwange mu katego nʼoyagala okunzisa?”

¹⁰Sawulo nʼamulayirira eri Mukama ngʼagamba nti, “Amazima ddala, nga Mukama bwʼali omulamu, tolibonerezebwa olwa kino.”

¹¹Awo omukazi nʼamubuuza nti, “Ani gwe mba nkuyimusiza?” Nʼaddamu nti, “Nyimusiza Samwiri.”

¹²Omukazi bwe yalaba Samwiri, nʼayogerera waggulu, nʼagamba Sawulo nti, “Lwaki onimbye? Ggwe Sawulo!”

¹³Awo kabaka nʼamugamba nti, “Totya. Kiki kyʼolaba?” Omukazi nʼaddamu nti, “Ndaba omwoyo nga guyimuka okuva mu ttaka.”

¹⁴Sawulo nʼamubuuza nti, “Gufaanana ani?” Nʼaddamu nti, “Omusajja omukadde nga yeebisseeko omunagiro yʼavaayo.” Awo Sawulo nʼategeera nga ye Samwiri, nʼavuunama amaaso ge, ne yeeyala ku ttaka.

¹⁵ⓡ Awo Samwiri nʼagamba Sawulo nti, “Lwaki ontawanyizza nʼonnyimusa?” Sawulo nʼaddamu nti, “Nnina ennaku nnyingi nnyo, kubanga Abafirisuuti bannwanyisa, ate Katonda anvuddeko. Takyanziramu ngʼayita mu bannabbi newaakubadde mu birooto. Kyenvudde nkukoowoola ombuulire ekyʼokukola.”

¹⁶Samwiri nʼamubuuza nti, “Ombuuliza ki, Mukama ngʼamaze okukuvaako nʼokufuuka omulabe wo?

¹⁷Mukama atuukirizza kye yayogera ngʼayita mu nze. Mukama akuggyeeko obwakabaka bwo, nʼabuwa omu ku baliraanwa bo, Dawudi.

¹⁸ⓢ Kubanga tewagondera Mukama newaakubadde okutuukiriza bye yakulagira okukola Amaleki ngʼamusunguwalidde, Mukama kyavudde akukola kino leero.

¹⁹ⓣ Mukama alikuwaayo gwe nʼAbayisirayiri eri Abafirisuuti, era enkya ggwe ne batabani bo munaaba nange eno gye ndi. Era Mukama anaawaayo eggye lya Isirayiri mu mukono gwʼAbafirisuuti.”

²⁰Awo Sawulo nʼagwira ddala wansi ekigwo kya bugazi, ngʼajjudde okutya olwʼebigambo Samwiri bye yayogera. Nʼataba na maanyi kubanga yali talina kyʼalidde olunaku olwo lwonna nʼekiro ekyakeesa olunaku olwo.

²¹Awo omukazi nʼasembera okumpi ne Sawulo, nʼalaba ngʼatidde, nʼamugamba nti, “Laba, omuweereza wo akugondedde, ne mpaayo obulamu bwange, nʼenkola kye wansabye.

²²Kaakano nkwegayiridde owulirize omuweereza wo, okkirize nkuwe ku mmere olyeko ofune amaanyi okukwata olugendo lwo.”

²³Nʼagaana nʼayogera nti, “Sijja kulya.” Naye abasajja be ne bayamba omukazi mu kukubiriza Sawulo okulya, nʼabawuliriza. Nʼayimuka mu ttaka nʼatuula ku kitanda.

²⁴Omukazi yalinawo ennyana ensava, nʼagiteekateeka mu bwangu. Nʼateekateeka nʼeŋŋaano, nʼakanda obuwunga, nʼafumba emigaati egitali mizimbulukuse.

²⁵Nʼalyoka abiteeka mu maaso ga Sawulo ne basajja be, ne balya. Nʼoluvannyuma ekiro ekyo ne bagolokoka ne beetambulira.