1 Samwiri 3:1-21 LGCB2014 - Bible AI

¹ⓛ Awo omuvubuka Samwiri nʼaweerezanga mu maaso ga Mukama ngʼalabirirwa Eri. Mu biro ebyo ekigambo kya Mukama kyali kya bbula, era nga nʼokwolesebwa kwa bbalirirwe.

²ⓜ Mu kiseera ekyo, Eri eyali akaddiye, nʼamaaso ge nga gayimbadde, yali awumuddeko mu kisenge kye.

³Ettabaaza[6] ya Katonda yali tennazikira nga ne Samwiri yeebase mu yeekaalu[7] ya Mukama ngʼaliraanye essanduuko ya Katonda we yali.

⁴Awo Mukama nʼakoowoola Samwiri nti, “Samwiri, Samwiri!”

⁴Nʼaddamu nti, “Nze nzuuno.”

⁵Nʼadduka nʼagenda ewa Eri nʼamugamba nti, “Nze nzuuno, ompise.” Naye Eri nʼamuddamu nti, “Sikuyise, ddayo weebake.”

⁶Mukama nʼaddamu nʼamuyita, “Samwiri!” Samwiri nʼasituka nʼagenda eri Eri, nʼamugamba nti, “Nze nzuuno, ompise.” Naye Eri nʼamuddamu nti, “Sikuyise, mutabani, ddayo weebake.”

⁷Samwiri yali tannategeera nga Mukama yʼamuyita, nga nʼekigambo kya Mukama tekimubikkulirwanga.

⁸Mukama nʼaddamu nʼakoowoola Samwiri omulundi ogwokusatu, Samwiri nʼasituka nʼagenda eri Eri nʼamugamba nti, “Nzuuno, ompise.” Awo Eri nʼategeera nti Mukama yʼayita omuvubuka.

⁹Eri kyeyava agamba Samwiri nti, “Genda weebake, bwʼanaddamu okukuyita, oddamu nti, Yogera, Mukama, kubanga omuweereza wo awulira.” Awo Samwiri nʼagenda nʼagalamira mu kifo kye.

¹⁰Mukama nʼajja nate, nʼamukoowoola ngʼolubereberye nti, “Samwiri! Samwiri!” Samwiri nʼaddamu nti, “Yogera, Ayi Mukama kubanga omuweereza wo awulira.”

¹¹Awo Mukama nʼagamba Samwiri nti, “Laba, ndi kumpi okukola ekigambo mu Isirayiri ekirireetera amatu ga buli muntu alikiwulira okuwaawaala.

¹²Ku lunaku olwo ndituukiriza ebyo byonna bye nnali njogedde ku nnyumba ya Eri.

¹³Namulabula nti Ndibonereza ennyumba ye ennaku zonna, olwʼobutali butuukirivu bwa batabani be abavvoola Katonda, nʼakimanya naye nʼatabaziyiza.

¹⁴Kyenva ndayirira ennyumba ya Eri nga ŋŋamba nti, ‘Omusango oguli ku nnyumba ya Eri tegulisonyiyibwa na ssaddaaka newaakubadde ekiweebwayo ennaku zonna.’ ”

¹⁵Samwiri nʼaddayo nʼagalamira okutuusa obudde lwe bwakya, nʼaggulawo enzigi ezʼennyumba ya Mukama. Nʼatya okutegeeza Eri okwolesebwa kwe yafuna,

¹⁶naye Eri nʼamuyita nʼamugamba nti, “Samwiri, mwana wange.” Nʼaddamu nti, “Nze nzuuno.”

¹⁷Eri nʼamubuuza nti, “Kiki kye yakugambye? Tokinkisa. Mukama akuleeteko ekibonerezo ekyʼamaanyi bwʼonoobaako ekigambo kyonna kyʼonkisizza ku ebyo bye yakugambye.”

¹⁸ⓝ Awo Samwiri nʼamutegeeza buli kimu, nʼatabaako kigambo na kimu kye yamukisa. Eri nʼayogera nti, “Ye Mukama, akole nga bwʼasiima.”

¹⁹Mukama nʼabeera wamu ne Samwiri, nʼakula. Buli kigambo kye yayogera ku nnyumba ya Eri ne kituukirira.

²⁰Isirayiri yenna okuva mu Ddaani okutuuka e Beeruseba ne bategeera nga Samwiri ateekeddwawo okuba nnabbi wa Mukama.

²¹Mukama ne yeeyongeranga okweyolekera Samwiri mu Siiro.