1 Samwiri 4:1-22 LGCB2014 - Bible AI

¹ⓞ Awo ekigambo kya Samwiri ne kibuna Isirayiri yenna. Mu biro ebyo Abayisirayiri ne balumba Abafirisuuti, Abayisirayiri ne basiisira okumpi ne Ebenezeri, ate nga Abafirisuuti bo basiisidde mu Afeki.

²ⓟ Abafirisuuti ne basimba ennyiriri okulumba Abayisirayiri ne bayungula eggye lyabwe okulumba; olutalo bwe lwanyiinyiitira, Abayisirayiri ne bawangulibwa, era enkumi nnya ku bo ne battibwa.

³ⓠ Abalwanyi bwe baddayo mu nkambi, abakadde ba Isirayiri ne beebuuzaganya nti, “Lwaki Mukama alese Abafirisuuti okutuwangula leero? Tuleete essanduuko ya Mukama eyʼendagaano okuva e Siiro, tugende nayo etuwonye amaanyi gʼabalabe baffe.”

⁴ⓡ Awo abantu ne batuma abasajja e Siiro, ne baggyayo essanduuko eyʼendagaano ya Mukama Ayinzabyonna, atudde ku ntebe ye eyʼobwakabaka wakati mu bakerubi. Batabani ba Eri bombi, Kofuni ne Finekaasi nabo ne bagenda nʼessanduuko ya Katonda eyʼendagaano.

⁵ⓢ Essanduuko ya Mukama eyʼendagaano bwe yatuuka mu nkambi eyʼAbayisirayiri, bonna ne baleekaanira waggulu mu ddoboozi eryʼomwanguka, nʼettaka ne liyuuguuma.

⁶Awo Abafirisuuti bwe baawulira oluyoogaano ne beebuuza nti, “Oluyoogaano olwo lwonna mu nkambi eyʼAbaebbulaniya lutegeeza ki?”

⁶Bwe baategeera nti essanduuko ya Mukama ereeteddwa mu nkambi,

⁷Abafirisuuti ne batya. Ne boogera nti, “Lubaale azze mu nkambi. Tufudde! Tewabangawo kigambo ekifaanana bwe kityo.

⁸ⓣ Zitusanze! Ani ayinza okutuwonya balubaale[8] bano abʼamaanyi? Bano be balubaale abaabonyabonya Abamisiri nʼendwadde nʼebibonoobono ebya buli ngeri mu ddungu.

⁹ⓤ Abafirisuuti, mugume omwoyo, mube basajja. Bwe kitaabe bwe kityo munaaba baddu bʼAbaebbulaniya nga bo bwe babadde abaweereza bammwe. Mube basajja mulwane.”

¹⁰Abafirisuuti ne beerwanako ne bawangula Abayisirayiri. Buli Muyisirayiri nʼaddukira mu nsiisira ye. Ne waba okuttibwa kunene nnyo, Abayisirayiri ne bafiirwa abaserikale abaatambuzanga ebigere emitwalo esatu.

¹¹Essanduuko ya Katonda nʼewambibwa, era ne batabani ba Eri bombi, Kofuni ne Finekaasi ne battibwa.

¹²Olunaku lwe lumu ne wabaawo omusajja Omubenyamini eyava mu lutalo nʼadduka okutuuka e Siiro, ngʼayuzizza engoye ze nʼomutwe gwe nga gujjudde enfuufu.

¹³ⓥ Bwe yatuuka, Eri yali atudde mu ntebe ye ku mabbali gʼekkubo ngʼatunula, nga yeeraliikiridde olwʼessanduuko ya Katonda. Omusajja bwe yatuuka mu kibuga nʼasaasaanya amawulire ku ebyo ebibaddewo, ekibuga kyonna ne kikuba ebiwoobe.

¹⁴Eri bwe yawulira oluyoogaano nʼabuuza nti, “Oluyoogaano luno luva ku ki?” Omusajja nʼayanguwa nʼatuuka awaali Eri nʼamutegeeza.

¹⁵Eri yali aweza emyaka egyʼobukulu kyenda mu munaana, amaaso ge nga gayimbadde, era nga nʼokulaba takyalaba.

¹⁶Omusajja oyo nʼategeeza Eri nti, “Naakava mu lutalo, era nziruseeyo leero.”

¹⁶Eri nʼamubuuza nti, “Bigenze bitya mwana wange?”

¹⁷Omusajja eyaleeta amawulire nʼamuddamu nti, “Isirayiri edduse Abafirisuuti, era eggye lyaffe lifiiriddwa abalwanyi bangi. Ate ne batabani bo bombi Kofuni ne Finekaasi battiddwa, era nʼessanduuko ya Katonda ewambiddwa.”

¹⁸Olwayogera ku ssanduuko ya Katonda, Eri nʼasirituka okuva ku ntebe ye nʼagwa okumpi nʼomulyango. Ensingo ye ne menyeka nʼafiirawo kubanga yali musajja mukadde nnyo ate nga nʼobuzito muzito. Yali akulembedde Isirayiri okumala emyaka amakumi ana.

¹⁹Mu kiseera ekyo muka mwana we, Finekaasi, yali lubuto era ngʼanaatera okuzaala. Bwe yawulira amawulire nti Essanduuko ya Katonda ewambiddwa era nti ne ssezaala we ne bba bafudde, nʼalumwa era nʼazaalirawo, kubanga obulumi bwamuyitirirako.

²⁰ⓦ Omukazi oyo bwe yali ngʼanaatera okufa, abamuzaalisa ne bamugamba nga boogera nti, “Totya, kubanga ozadde mulenzi.” Naye nʼatabaanukula wadde okubassaako omwoyo.

²¹Nʼatuuma omwana erinnya Ikabodi, amakulu gaalyo nti, “Ekitiibwa kivudde ku Isirayiri,” kubanga essanduuko ya Katonda yali ewambiddwa ate nga ssezaala we ne bba bafudde.

²²Nʼayogera nti, “Ekitiibwa kivudde ku Isirayiri kubanga essanduuko ya Katonda ewambiddwa.”