1 Samwiri 8:1-22 LGCB2014 - Bible AI

¹ⓨ Samwiri bwe yakaddiwa, nʼalonda batabani be okuba abalamuzi ba Isirayiri.

²Erinnya lya mutabani we omukulu ye yali Yoweeri, nʼowokubiri nga ye Abiya, ne balamulanga mu Beeruseba.

³ⓩ Naye batabani be ne batagoberera mpisa ze, ne bakyama ne banoonya amagoba, ne balya enguzi, era nga tebalamula mu bwenkanya.

⁴Awo abakadde bonna aba Isirayiri ne bakuŋŋaana ne bajja eri Samwiri e Laama,

⁵ⓐ ne bamugamba nti, “Laba, okaddiye ne batabani bo tebagoberera mpisa zo, kaakano tulondere kabaka anaatukulemberanga, tubeere ngʼamawanga amalala gonna.”

⁶Naye bwe baayogera nti, “Tuwe kabaka anaatukulemberanga,” ne kitasanyusa Samwiri. Samwiri nʼasaba eri Mukama.

⁷ⓑ Awo Mukama nʼagamba Samwiri nti, “Wuliriza ebigambo byonna abantu bye bakugamba. Tebajeemedde ggwe, naye bajeemedde nze nneme kuba kabaka waabwe.

⁸Okusinziira ku bikolwa byabwe okuva ku lunaku lwe nabaggya mu Misiri okutuusa ku lunaku lwa leero, bwe banjeemera, ne baweereza bakatonda abalala, nawe bwe batyo bwe bakuyisa.

⁹Kaakano bawulirize, naye obalabulire ddala, era obategeeze ebintu byonna kabaka anaabafuga byʼalibakola.”

¹⁰Awo Samwiri nʼategeeza abantu abaali bamusaba kabaka, ebigambo byonna Mukama bye yamugamba.

¹¹ⓒ Nʼabagamba nti, “Bino bye bintu kabaka alibafuga byʼalibakola: alitwala batabani bammwe nʼabafuula abagoba abʼamagaali ge nʼabeebagazi abʼembalaasi ze, nʼabamu okuddukiranga mu maaso agʼamagaali ge.

¹²Abamu ku bo alibafuula abaduumizi bʼenkumi, nʼabalala nʼabafuula abaduumizi bʼataano, nʼabalala okumulimiranga ennimiro ze nʼokuzikungulanga, nʼabalala okuweesanga ebyokulwanyisa nʼebintu ebyʼamagaali ge.

¹³Alitwala bawala bammwe, okumuteekerateekera ebyakaloosa, nʼokumufumbiranga, nʼokumukoleranga emigaati.

¹⁴ⓓ Alitwala ennimiro zammwe ennungi, nʼennimiro zammwe ezʼemizabbibu nʼezʼemizeeyituuni, nʼaziwa abaweereza be.

¹⁵Alitwala ekimu ekyʼekkumi ekyʼemmere yammwe eyʼempeke, nʼekyʼennimiro zammwe ezʼemizabbibu, nʼakigabira abakungu be nʼabaweereza be.

¹⁶Alitwala abaweereza bammwe abasajja nʼabaweereza bammwe abakazi, nʼabavubuka bammwe abasinga obulungi nʼendogoyi, nʼabyeddiza.

¹⁷Alitwala ekimu ekyʼekkumi ku bisibo byammwe, mmwe nʼabafuula abaweereza be.

¹⁸ⓔ Luliba lumu, mulyekkokkola kabaka wammwe gwe mwerondera, naye Mukama talibafaako ku lunaku olwo.”

¹⁹ⓕ Naye abantu ne bagaana okuwuliriza Samwiri, ne boogera nti, “Nedda! Twagala kabaka okutufuga,

²⁰naffe tubeere ngʼamawanga amalala gonna, nga tulina kabaka atufuga ayinza okutukulembera nʼatulwanira entalo zaffe.”

²¹Awo Samwiri bwe yawulira ebigambo byonna ebyʼabantu, nʼabiddiramu Mukama.

²²ⓖ Mukama nʼaddamu Samwiri nti, “Bawulirize obalondere kabaka.”

²²Awo Samwiri nʼagamba abantu ba Isirayiri nti, “Buli omu ku mmwe addeyo ewuwe.”