1 Timoseewo 3:1-16 LGCB2014 - Bible AI

¹Ekigambo kyesigwa. Omuntu yenna bwʼayagalanga okuba Omulabirizi aba yeegombye omulimu omulungi.

²Noolwekyo Omulabirizi kimugwanira okuba nga taliiko kya kunenyezebwa, nga musajja wa mukazi omu, nga muntu eyeefuga, nga mwegendereza, nga mukwata mpola, ayaniriza abagenyi, era ngʼamanyi okuyigiriza.

³Tateekwa kuba mutamiivu, era nga si mukambwe, wabula omuwombeefu, nga si muyombi era nga talulunkanira nsimbi.

⁴Ateekwa kuba ngʼafuga bulungi amaka ge, abaana be nga bamuwulira, era nga bamussaamu ekitiibwa.

⁵Kubanga omuntu atasobola kufuga maka ge, alisobola atya okulabirira ekkanisa ya Katonda?

⁶Omulabirizi tateekwa kuba muntu eyaakakkiriza Kristo, si kulwa nga yeekuluntaza, nʼasalirwa omusango nga Setaani bwe yagusalirwa.

⁷Asaanira okuba ngʼassibwamu ekitiibwa abo abatali ba Kkanisa, si ku lwa nga yeereetako ekivume.

⁸Abadiikoni nabo kibagwanira okuba abantu abassibwamu ekitiibwa abatataaganaaga mu bigambo byabwe, abatatamiira, era abatalulunkanira bintu,

⁹nga bakuuma ekyama kyʼokukkiriza nʼomutima omulongoofu.

¹⁰Basookanga kugezesebwa balyoke baweereze mu budiikooni nga tebaliiko kya kunenyezebwa.

¹¹Nʼabakazi Abadiikoni bwe batyo nabo kibagwanidde okubeeranga abassibwamu ekitiibwa, abatawaayiriza, abeegendereza, era abeesigwa mu buli kintu.

¹²Omudiikoni ateekwa okuba nʼomukazi omu yekka, era ngʼasobola okufuga obulungi abaana be, nʼamaka ge.

¹³Kubanga abaweereza obulungi bafuna ekifo ekya waggulu era baba nʼobuvumu bungi mu kukkiriza okuli mu Kristo.

¹⁴Nkuwandiikidde ebintu ebyo nga nsuubira okujja gyʼoli mangu;

¹⁵kyokka bwe ndirwa omanye byʼosaana okukola mu nnyumba ya Katonda, ye Ekkanisa ya Katonda omulamu, empagi nʼomusingi ebyʼamazima.

¹⁶Tewali kubuusabuusa ekyama kyʼokutya Katonda kikulu ddala, era kigamba nti:

¹⁶“Yalabisibwa mu mubiri, nʼakakasibwa Omwoyo nga bwʼatuukiridde, nʼalabibwa bamalayika, nʼalangibwa mu mawanga, nʼakkirizibwa mu nsi, era nʼatwalibwa nʼekitiibwa mu ggulu.”