1 Timoseewo 5:1-25 LGCB2014 - Bible AI

¹Tokambuwaliranga musajja mukulu, wabula omubuuliriranga nga kitaawo. Abavubuka bayisenga nga baganda bo,

²abakazi abakadde bayisenga ngʼabazadde bo, abato nga bannyoko, ngʼomutima gwo mulongoofu ddala.

³Bannamwandu ddala, bassengamu ekitiibwa.

⁴Nnamwandu bwʼabanga nʼabaana oba abazzukulu basookenga okuyiga ebyo ebikolebwa mu maka ge waabwe, nga bassaayo omwoyo ku bazadde baabwe era nʼokubalabirira. Kubanga ekyo kisanyusa Katonda.

⁵Oyo aba nnamwandu ddala, asigadde yekka, essuubi lye aba alitadde mu Katonda, era anyiikire okwegayirira nʼokusaba Katonda emisana nʼekiro.

⁶Kyokka oyo nnamwandu eyeemalira mu masanyu, aba ngʼafudde, newaakubadde ngʼakyali mulamu.

⁷Ebyo bibalagire, baleme kubaako kya kunenyezebwa.

⁸Naye omuntu yenna bwʼatalabirira bantu be, na ddala abʼomu nnyumba ye, aba yeegaanyi okukkiriza, era aba mubi okusinga atakkiriza.

⁹Nnamwandu awezezza emyaka enkaaga ye yekka anaawandiikibwanga ku lukalala lwa bannamwandu. Era ateekwa kuba nga yafumbirwa omusajja omu,

¹⁰nga yakolanga ebikolwa ebirungi, oba nga yaleranga abaana, oba nga yayanirizanga abagenyi, oba nga yanaazanga abatukuvu ebigere, oba nga yayambanga abanyigirizibwa, era oba nga yeewangayo nnyo okukola obulungi mu buli ngeri.

¹¹Naye bannamwandu abakyali abato, tokkirizanga okubateeka ku lukalala lwa bannamwandu, kubanga omubiri bwe gulibalemesa okweweerayo ddala eri Kristo, balyagala okufumbirwa,

¹²bwe batyo ne bessaako omusango olwʼobutatuukiriza ekyo kye baasooka okusuubiza.

¹³Nʼekirala bayiga okubeera abagayaavu ne batambulatambula mu buli nnyumba, so si bugayaavu kyokka, naye era balina olugambo, era beeyingiza mu bitali byabwe ne boogera nʼebitasaana.

¹⁴Kyenva njagala bannamwandu abato bafumbirwenga, bazaale abaana, era balabirire amaka gaabwe, baleme kuwa mulabe kkubo lya kutwogerako kibi.

¹⁵Kubanga bannamwandu abamu bakyamye ne bagoberera Setaani.

¹⁶Naye bwe wabaawo omukkiriza alina bannamwandu abʼolulyo lwe abalabirirenga, Ekkanisa ereme okuzitoowererwa, kiryoke kisoboke okulabirira bannamwandu abataliiko abayamba.

¹⁷Abakulembeze abafuga basaanidde okuweebwanga ekitiibwa kingi, na ddala abo abanyiikira ennyo mu kubuulira nʼokuyigiriza ekigambo kya Katonda.

¹⁸ⓐ Kubanga Ekyawandiikibwa kigamba nti, “Ente ngʼewuula eŋŋaano, togisibanga mumwa.” Era nti, “Omukozi asaanira okusasulwa empeera ye.”

¹⁹Tokkirizanga ebyo bye bavunaana omukulembeze okuggyako nga biriko abajulirwa babiri oba basatu.

²⁰Kyokka abo aboonoona banenyezenga mu lwatu, abalala balyoke batye.

²¹Nkukuutirira mu maaso ga Katonda ne Kristo Yesu, ne bamalayika abalonde okugobereranga ebyo, nga teweekubira wadde okusaliriza.

²²Toyanguyirizanga kussaako mikono ku muntu yenna, so tossanga kimu na bibi byʼabalala; weekuumenga ngʼoli mulongoofu.

²³Lekeraawo okunywanga amazzi gokka, naye nywanga ne ku wayini mutono olwʼolubuto lwo, nʼolwʼokulwalalwala kwo.

²⁴Ebibi byʼabantu abamu birabika lwatu nga tebannasalirwa musango kubasinga, naye ebyʼabalala birabika luvannyuma.

²⁵Nʼebikolwa ebirungi nabyo bwe bityo birabika lwatu; ne bwe biba tebirabise lwatu, tebiyinza kukwekebwa bbanga lyonna.