1 Yokaana 4:1-21 LGCB2014 - Bible AI

¹Abaagalwa, temukkirizanga buli myoyo, naye musookenga okugyetegereza mulabe obanga givudde eri Katonda, kubanga kaakano waliwo bannabbi abʼobulimba bangi mu nsi.

²Eno yʼengeri gye tutegeeramu Mwoyo wa Katonda: buli ayatula nti Yesu Kristo yafuuka omubiri, ngʼava eri Katonda, oyo yʼalina Mwoyo wa Katonda.

³Naye buli mwoyo ogutayatula Yesu nga teguvudde eri Katonda. Ogwo gwe mwoyo ogwʼOmulabe wa Kristo, gwe mwawulira nti ajja mu nsi, era amaze okutuuka.

⁴Mmwe, abaana abaagalwa, muli ba Katonda era mumaze okuwangula, kubanga oyo ali mu mmwe wa maanyi okusinga oyo ali mu nsi.

⁵Bo ba nsi era boogera bya nsi, era abantu bʼensi kyebava babawuliriza.

⁶Naye ffe tuli bantu ba Katonda, era buli amanyi Katonda atuwuliriza; atali wa Katonda tatuwuliriza. Eyo yʼengeri gye tusobola okwawulamu omwoyo ogwʼamazima nʼomwoyo ogwʼobulimba.

⁷Abaagalwa, twagalanenga, kubanga okwagala kuva eri Katonda, era buli alina okwagala mwana wa Katonda, era amanyi Katonda.

⁸Naye buli atalina kwagala tamanyi Katonda, kubanga Katonda kwagala.

⁹Katonda yatulaga okwagala kwe, bwe yatuma mu nsi Omwana we omu yekka bwʼati, tulyoke tube abalamu ku bwʼoyo.

¹⁰Mu kino mwe tutegeerera ddala okwagala kwennyini, kubanga teyakikola lwa kuba nti Ffe twali twagala Katonda, naye ye yennyini ye yatwagala, nʼawaayo Omwana we ngʼomutango olwʼebibi byaffe.

¹¹Kale abaagalwa, nga Katonda bwe yatwagala bwʼatyo naffe tuteekwa okwagalananga.

¹²Tewali nʼomu eyali alabye ku Katonda, naye bwe twagalana, Katonda abeera mu ffe, nʼokwagala kwe ne kulabikira mu ffe.

¹³Mu ekyo mwe tutegeerera nti Katonda ali mu ffe era naffe tuli mu Ye, olwa Mwoyo gwʼatuwadde.

¹⁴Era ffe twamulaba nʼamaaso gaffe, kyetuva tutegeeza nti Kitaffe yatuma Omwana we okuba Omulokozi wʼensi.

¹⁵Kale buli ayatula nti Yesu Mwana wa Katonda, nga Katonda ali mu ye era nga naye ali mu Katonda.

¹⁶Ffe tumanyi okwagala kwa Katonda era tukkiririza mu kwagala kwe okwo kwʼalina gye tuli.

¹⁶Katonda kwagala, era buli abeera nʼokwagala abeera mu Katonda, ne Katonda abeera mu ye.

¹⁷Bwe twagala bannaffe nga Kristo bwe yakola ngʼali mu nsi muno, tetulibaako kye tweraliikirira ku lunaku olwʼokusalirako omusango.

¹⁸Mu kwagala temuliimu kutya, kubanga okwagala okutuukiridde kumalawo okutya; kubanga okutya kulimu okubonerezebwa, na buli atya, aba tannatuukirira mu kwagala.

¹⁹Tulina okwagala kubanga Ye ye yasooka okutwagala.

²⁰Omuntu yenna bwʼagamba nti, “Njagala Katonda,” naye nʼakyawa muganda we, omuntu oyo mulimba. Kubanga buli atayagala muganda we gwʼalabako, tasobola kwagala Katonda gwʼatalabangako.

²¹Era Katonda yennyini yatulagira nti, “Buli ayagala Katonda ayagalenga ne muganda we.”