2 Abakkolinso 1:1-24 LGCB2014 - Bible AI

¹Pawulo omutume wa Kristo Yesu, olwʼokusiima kwa Katonda, nʼowooluganda Timoseewo, tuwandiikira ekkanisa ya Katonda eri mu Kkolinso awamu nʼabatukuvu bonna abali mu Akaya yonna,

²ekisa nʼemirembe ebiva eri Katonda Kitaffe ne Mukama waffe Yesu Kristo bibeerenga nammwe.

³Katonda oyo Kitaawe wa Mukama waffe Yesu Kristo, Kitaffe owʼokusaasira era Katonda azaamu bonna amaanyi yeebazibwe,

⁴atuzaamu amaanyi mu kubonaabona kwonna kwe tuyitamu, tulyoke tugumye abalala abayita mu kubonaabona okwa buli ngeri, olwʼokugumya kwe tufuna nga Katonda atuzaamu amaanyi.

⁵Kubanga nga bwe tugabana ku kubonaabona kwa Kristo, ne Kristo bwʼatyo bwʼatuzzaamu amaanyi.

⁶Bwe tubonaabona, tubonaabona mulyoke muzibwemu amaanyi era mulokolebwe; oba ne bwe tuba nga tuzzibwamu endasi nammwe muzibwamu endasi, mulyoke mugumire okubonaabona kwe kumu kwe tuyitamu.

⁷Essuubi lyaffe gye muli linywevu, nga tumanyi nti nga bwe mugabanira awamu naffe mu kubonaabona, bwe mutyo bwe mugabanira awamu naffe mu kuzibwamu amaanyi.

⁸Kubanga tetwagala mmwe abooluganda obutategeera, okubonaabona kwe twayitamu mu Asiya kwali kungi ekiyitiridde nʼessuubi eryʼokuba abalamu ne lituggwaamu.

⁹Naye ffe ffennyini nga tusaliddwa gwa kufa, nga tetusaanidde kwetekamu bwesige bwaffe ffe, wabula mu Katonda azuukiza abafu,

¹⁰eyatuwonya mu kufa okwo okwʼentiisa, era anaatulokolanga, era gwe tulinamu essuubi eryʼokutuwonyanga.

¹¹Tukolere wamu nga mutusabira, bangi balyoke batwebalizeeko olwʼekirabo kye twaweebwa.

¹²Tulina okwenyumiriza ngʼomwoyo gwaffe gutujulira kubanga twatambulira mu buwombeefu ne mu mazima ga Katonda, so si mu magezi agʼomubiri, naye mu kisa kya Katonda nga tuli mu nsi nʼokusingira ddala gye muli.

¹³Kubanga tetubawandiikira lwa bintu birala wabula ku ebyo bye musomako era ku ebyo bye mumanyiiko; era nsuubira nga mulibimanyira ddala okutuusa ku nkomerero,

¹⁴era nga bwe mwamanyako ekitundu nti muli kya kwenyumiriza gye tuli nga naffe bwe tuli ekyʼokwenyumiriza gye muli ku lunaku lwa Mukama waffe Yesu.

¹⁵Olwʼokwekakasa mu ekyo, nateekateeka okujja gye muli edda, mulyoke musanyuke omulundi ogwokubiri,

¹⁶nga mpita gye muli okugenda e Makedoniya, ate nʼamadda nga nkomawo, mulyoke munsibirire okulaga e Buyudaaya.

¹⁷Mulowooza nga nateekateeka bwe ntyo olwokubanga nnekyusiza? Oba nti ntekateeka ebintu nga ngoberera omubiri, nga ŋŋamba nti weewaawo ye weewaawo, ate nti si weewaawo, si weewaawo?

¹⁸Naye nga Katonda bwʼali omwesigwa ekigambo kyaffe gye muli tekiri weewaawo ate nti si weewaawo.

¹⁹Omwana wa Katonda Yesu Kristo gwe twababuulira, nze ne Sirwano[1] ne Timoseewo teyali nti weewaawo ne si weewaawo, wabula mu ye mwe muli weewaawo bulijjo.

²⁰Kubanga nga bwe biri ebisuubizo ebingi ebya Katonda, era mu ye kyetuva tugamba Amiina nga tuyita mu ye, Katonda atenderezebwe mu ffe.

²¹Naye atunyweza ffe awamu nammwe mu Kristo, era eyatufukako amafuta, ye Katonda,

²²era ye oyo eyatussaako akabonero, nʼatuwa amazima gʼomwoyo mu mitima gyaffe.

²³Katonda oyo ye mujulirwa wʼemmeeme yange, nga nabasabira ne sijja Kkolinso.

²⁴Temusaanye kulowooza nti Ffe tufuga okukkiriza kwammwe, naye tuli bakozi bannammwe, mulyoke musanyuke, kubanga okukkiriza kwammwe kwe kubanywezezza.