1Mbasaba mungumiikirizeeko mu busirusiru bwange obutono, weewaawo mungumiikirize.
2Mbakwatirwa obuggya, obuggya bwa Katonda, kubanga naboogereza omusajja omu, nga muli mbeerera zennyini, ne mbawaayo eri Kristo;
3kyokka neeraliikirira nnyo ngʼantya nti Si kulwa nga mulimbibwa nga Kaawa bwe yalimbibwa omusota ne muwaba mu birowoozo byammwe okuva mu bwetoowaze nʼobutukuvu obuli mu Kristo.
4Bwe wabaawo omuntu ajja nʼababuulira Yesu omulala gwe tutabuulira, oba ne mufuna omwoyo omulala, gwe mutafunanga, oba ne mubuulirwa Enjiri endala gye mutabuulirwanga, mubigumiikiriza.
5Kubanga ndowooza ngʼabatume abakulu ennyo tebalina kye bansinza.
6Kubanga newaakubadde nga siri mumanyirivu mu kwogera, naye si mu kutegeera, wabula mu ngeri yonna twaboolesa ebintu byonna.
7Oba nasobya bwe netoowaza mulyoke mugulumizibwe, bwe nabuulira Enjiri ya Katonda eyʼobwereere?
8Nanyaga ekkanisa endala, kubanga zampeerezanga ensimbi ne nzikozesa nga ndi nammwe ndyoke mbaweereze,
9era bwe nnali nammwe ne mbaako bye neetaaga, ssaazitoowerera muntu yenna kubanga abooluganda abaava e Makedoniya bampanga byonna bye nnali neetaaga, ne neekuuma nnyo obutabazitoowerera mu buli kintu, era nzija kwongera okwekuuma bwe ntyo.
10Ngʼamazirna ga Kristo bwe gali mu nze, okwenyumiriza kuno tekujja kuziyizibwa mu nze mu bitundu bya Akaya.
11Lwaki? Olwʼokubanga sibaagala? Katonda amanyi nga mbaagala.
12Naye nzija kweyongera okukola nga bwe nkola ndyoke nziggyewo omukisa eri abo abaagala okukozesa omukisa ogwo abaagala okulabika nga ffe mu kwenyumiriza kwabwe.
13Abantu ngʼabo batume baabulimba, era bakozi baabukuusa, nga beefuula abatume ba Kristo.
14Naye ekyo tekyewuunyisa, kubanga Setaani yeefuula nga malayika owʼomusana.
15Noolwekyo abamuweereza bwe beefuula ngʼabaweereza bʼobutuukirivu tekitwewuunyisa. Ku nkomerero bagenda kubonerezebwa ngʼebikolwa byabwe biri.
16Nziramu okubagamba nti omuntu yenna aleme kundowooza kuba musirusiru; kyokka ne bwe mundowooza okuba omusirusiru, munsembeze, nange neenyumirizeeko katono.
17Kaakano bye njogera Mukama si yandagidde okubyogera, wabula neeyisa ngʼomusirusiru mu buvumu buno obwʼokwenyumiriza.
18Naye obanga bano beenyumiriza mu byʼomubiri nange ka nneenyumirize.
19Mmwe muli bagezi, kyemuva mugumiikiriza abasirusiru.
20Omuntu yenna bwʼabafuula abaddu, oba nʼabanyaga, oba nʼabalyazaamanya, oba ne yeegulumiza, oba nʼabakuba empi, mukigumiikiriza.
21Ekyo kinswaza okukyogera kubanga tubadde banafu mu ekyo. Naye omuntu yenna kye yeewaayo okukola, nga njogera mu busirusiru, nange neewaayo okukikola.
22Bo Baebbulaniya? Nange bwe ndi. Bagamba nti Bayisirayiri? Nange bwe ntyo. Bazzukulu ba Ibulayimu? Nange bwe ndi.
23Bagamba nti Baweereza ba Kristo? Nga njogera ngʼagudde eddalu, nze mbasinga; Mbasinga okukola ennyo, era nsibiddwa mu kkomera emirundi mingi okubasinga, nʼemirundi gye nkubiddwa mingi okusingawo, era emirundi mingi ne mba kumpi nʼokufa.
24Abayudaaya bankuba embooko amakumi asatu mu mwenda ku mirundi egyʼenjawulo etaano.
25Nakubwa emiggo emirundi esatu. Omulundi gumu nakubwa amayinja. Emirundi esatu ekyombo kye nalingamu kyamenyeka. Olulala ne nsula era ne nsiiba mu buziba.
26Ntambudde nnyo, era emirundi mingi ne mpona akabi kʼomujjuzo gwʼemigga, ne mpona nʼakabi akʼabanyazi, nʼempona abʼeggwanga lyange, era nʼAbamawanga abalala. Nayolekera obubenje obwʼomu kibuga, ne mpona nʼokufiira mu ddungu ne mu muyaga ogwʼoku nnyanja, ne mpona nʼakabi akʼabantu abeeyita abooluganda;
27mu kukola ennyo ne mu kufuba nga seebaka, mu kulumwa enjala ne mu kufuuyibwa empewo ne mu kubeera obwereere.
28Ebirala bye simenye nga nabyo bikyali awo, neeraliikirira buli lunaku nga ndowooza ku Kkanisa zonna nga bwe ziri.
29Bwe wabaawo anafuye, nange nzigwamu amaanyi, omulala bwʼagwa mu kibi, nange njaka munda yange.
30Naye obanga kiŋŋwanidde okwenyumiriza, ka neenyumirize olwʼebyo ebiraga obunafu bwange!
31Katonda, era Kitaawe wa Mukama waffe Yesu, atenderezebwa emirembe nʼemirembe, amanyi nga ssirimba.
32Bwe nnali mu Damasiko, Kabaka Aleta yalagira gavana alagire abakuumi bʼekibuga, nkwatibwe,
33naye ne mpisibwa mu ddirisa, eryali mu kisenge kya bbugwe wʼekibuga, nga ndi mu kisero kye baaleebeesa ku miguwa okuntuusa ebweru wansi, bwe ntyo abo ne mbawona.