2 Abakkolinso 8:1-24 LGCB2014 - Bible AI

¹Kaakano tubategeeza abooluganda, ekisa kya Katonda ekyaweebwa ekkanisa zʼe Makedoniya.

²Mu kugezesebwa okwʼokubonaabona, baagattika essanyu lyabwe eryʼekitalo nʼobwavu bwabwe obungi, ne bafunamu okugaba okwewuunyizibwa ennyo.

³Tebaagaba kutuuka we basobola wokka, naye nawo baasukkawo, era baagaba lwa kweyagalira.

⁴Baatwegayirira tubatwalire ebirabo byabwe, nabo basanyukire wamu ne bannaabwe abaweerezza obuyambi eri abatukuvu.

⁵Ate era kye twali tutasuubidde, baasooka kwewaayo eri Mukama, nʼoluvannyuma gye tuli olwʼokwagala kwa Katonda.

⁶Kyatugwanira okusaba Tito, nga bwe yasooka okubaweereza, ajje atuukirize nʼekikolwa ekyo ekyʼekisa.

⁷Naye nga bwe musukirira mu bintu byonna, mu kukkiriza, ne mu kigambo, ne mu kutegeera, ne mu kunyiikira kwonna, twagala okulaba nga ne mu kisa kino musukirira.

⁸Sibawa kiragiro, wabula olwʼokunyiikira kwʼabalala nʼokugezesa okwagala kwammwe nga kwʼamazima.

⁹Kubanga mumanyi ekisa kya Mukama waffe Yesu Kristo nga bwe yafuka omwavu ku lwammwe, mwe mulyoke mugaggawale.

¹⁰Amagezi ge mbawa ge gano nti Mumalirize ekyo kye mwatandikako mu mwaka ogwayita, kubanga si mmwe mwasooka okuleeta ekirowoozo ekyo ate era si mmwe mwali ababereberye mu kutandika okukikolerako.

¹¹Naye kaakano mu bumalirivu bwammwe mu kwagala okukikola, mumalirize omulimu ogwo, okusinziira kwʼekyo kye mulina,

¹²Kuba obanga mulina obumalirivu nga buli muntu bwʼalina, buli muntu aweeyo okusinziira ku ekyo kyʼalina so si kyʼatalina.

¹³Abalala baleme kuyambibwa ate nga mmwe munyigirizibwa, walyoke wabeewo, okwenkanankana.

¹⁴Kaakano bye mulina ebingi biyambe abo abali mu kwetaaga, ate ebyabwe bye baliba nabyo ebingi biribayamba nga muli mu kwetaaga.

¹⁵ⓐ Nga bwe kyawandiikibwa nti, “Oyo eyakuŋŋaanyanga ennyingi teyasigazangawo, nʼeyakuŋŋaanyanga entono ngʼemumala bumazi.”

¹⁶Kyokka Katonda yeebazibwe eyassa obunyiikivu bwe bumu mu mutima gwa Tito ku lwammwe.

¹⁷Olwʼokuzzibwamu amaanyi kwe yafuna, nʼolwʼokufuba kwe, yajja gye muli.

¹⁸Era tutumye wamu naye owooluganda atenderezebwa olwʼenjiri mu kkanisa zonna,

¹⁹naye si ekyo kyokka wabula yalondebwa okutambulanga naffe olwʼekisa kye tuweereza ffe olwa Mukama waffe yennyini nʼolwʼokugulumiza nʼokulaga nga bwe twetegese okuyamba,

²⁰nga twewala omuntu yenna okutunenya olwʼekirabo kino kye tuweereza.

²¹Kubanga kye tugenderera kwe kukola ebirungi, si mu maaso ga Katonda yekka wabula ne mu maaso gʼabantu.

²²Era awamu nabo twabatumira owooluganda gwe tukakasizza nga munyiikivu mu bintu bingi era nga ne kaakano munyiikivu nnyo olwʼobwesige bwʼabalinamu.

²³Singa wabaawo ayagala okumanya ebifa ku Tito, tukolagana, mukozi munnange; abooluganda, bo batume ba kkanisa, olwʼekitiibwa kya Kristo.

²⁴Noolwekyo okwagala kwammwe nʼokwenyumiriza kwammwe byeyoleke gye bali.