2 Bassekabaka 1:1-18 LGCB2014 - Bible AI

¹Awo Akabu ngʼamaze okufa, abʼomu nsi ya Mowaabu ne bajeemera Abayisirayiri.

²Akaziya ngʼali mu Samaliya yʼasimatuka nʼayita mu ddirisa lyʼekisenge kye ekya waggulu, nʼagwa, nʼalwala. Awo nʼatuma ababaka eri Baaluzebubi[1] bakatonda bʼe Ekuloni, okubeebuuzaako obanga obulwadde bwe buliwona.

³Malayika wa Mukama nʼajja eri Eriya Omutisubi nʼamugamba nti, “Golokoka, ogende osisinkane ababaka ba kabaka wʼe Samaliya, obabuuze nti, ‘Teri Katonda mu Isirayiri, kyemuvudde mugenda mwebuuza eri Baaluzebubi bakatonda bʼe Ekuloni?’

⁴Noolwekyo bwʼati bwʼayogera Mukama nti, toliwona bulwadde bwo, naye ogenda kufa.” Eriya bwe yamala okwogera ebyo nʼagenda.

⁵Oluvannyuma lwʼebyo, ababaka kabaka be yatuma ne baddayo eri kabaka, nʼababuuza nti, “Kiki ekibakomezaawo amangu?”

⁶Ne bamuddamu nti, “Waliwo omusajja eyatusisinkanye mu kkubo nʼatugamba nti, ‘Muddeyo eri kabaka mumugambe nti olwʼokugenda eri Baaluzebubi bakatonda bʼe Ekuloni okulagulwa, nʼotogenda kwebuuza ku Katonda wa Isirayiri, togenda kuva ku kitanda ekyo era togenda kuwona bulwadde obwo wabula ogenda kufa.’ ”

⁷Nʼababuuza nti, “Omusajja oyo gwe musisinkanye abadde afaanana atya?”

⁸Ne bamuddamu nti, “Abadde ayambadde ekyambalo kya bwoya, nga yeesibye nʼolukoba lwa bwoya.”

⁸Kabaka nʼayogera nti, “Oyo yandiba Eriya Omutisubi.”

⁹Awo kabaka nʼatuma omukulu eyali akulira ekibinja kyʼabasajja amakumi ataano nʼabasajja be eri Eriya. Bwe yatuuka awaali Eriya, yamusanga atudde ku ntikko eya kasozi, nʼamugamba nti, “Musajja wa Katonda, kabaka akwetaaga.”

¹⁰Eriya nʼaddamu omukulu wʼekibinja nti, “Obanga ndi musajja wa Katonda, omuliro guve mu ggulu gukwokye ggwe nʼekibinja kyo!” Awo omuliro ne guva mu ggulu ne gumwokya ye nʼekibinja kye.

¹¹Kabaka bwe yawulira ebyo nʼatuma omukulu omulala nʼekibinja kye ekyʼamakumi ataano eri Eriya. Omukulu oyo eyatumibwa nʼagamba Eriya nti, “Ggwe omusajja wa Katonda, kabaka akuyita mangu.”

¹²Eriya nʼamuddamu nti, “Obanga ndi musajja wa Katonda, kale omuliro guve mu ggulu gukwokye ggwe nʼekibinja kyo.” Awo omuliro ne guva mu ggulu ne gumwokya ye nʼekibinja kye.

¹³Naye kabaka teyakoma ku abo, nʼamutumira omukulu owookusatu owʼekibinja ekirala ekyʼamakumi ataano, nʼagenda eri Eriya. Bwe yatuuka awaali Eriya nʼafukamira mu maaso ge, nʼamwegayirira ngʼagamba nti, “Omusajja wa Katonda nkwegayiridde, onsasire, nneme okufa.

¹⁴Laba, omuliro gwavudde mu ggulu ne gwokya abakulu bombi nʼebibinja byabwe, naye kaakano osaasire obulamu bwange.”

¹⁵Awo malayika wa Mukama nʼagamba Eriya nti, “Serengeta naye, so tomutya.” Awo Eriya nʼasituka nʼaserengeta nʼomubaka wa kabaka eri kabaka.

¹⁶Eriya nʼagamba kabaka nti, “Bwʼati bwʼayogera Mukama nti, ‘Nsonga ki eyakutwala eri Baaluzebubi bakatonda bʼe Ekuloni okulagulwa, mu kifo kyʼokulaga eri Katonda wa Isirayiri ne gwʼoba weebuuzako?’ Kyʼoliva olema okuva ku kitanda ekyo kye weebaseeko, era ojja kufa.”

¹⁷Nʼafa, ngʼekigambo kya Mukama kye yatuma Eriya bwe kyali.

¹⁷Olwokubanga Akaziya teyalina mwana wabulenzi, Yekolaamu nʼamusikira okuba kabaka, mu mwaka ogwokubiri ogwa Yekolaamu mutabani wa Yekosafaati eyali kabaka wa Yuda.

¹⁸Ebyafaayo ebirala ebyabaawo mu mirembe gya Akaziya ne bye yakola, tebyawandiikibwa mu kitabo ekyʼebyomumirembe gya bassekabaka ba Isirayiri?