2 Bassekabaka 14:1-29 LGCB2014 - Bible AI

¹Mu mwaka ogwokubiri ogwʼobufuzi bwa Yowaasi mutabani wa Yowakaazi kabaka wa Isirayiri, Amaziya mutabani wa Yowaasi ssekabaka wa Yuda nʼalya obwakabaka.

²Yali aweza emyaka amakumi abiri mu etaano weyatandikira okufuga, era nʼafugira emyaka amakumi abiri mu mwenda mu Yerusaalemi. Nnyina erinnya lye ye yali Yekoyadiini owʼe Yerusaalemi.

³Nʼakola ebirungi mu maaso ga Mukama, newaakubadde nga tebyenkana bya jjajjaawe Dawudi bye yakola. Mu buli nsonga yonna yagobereranga ekyokulabirako kya Yowaasi kitaawe.

⁴Kyokka beeyongeranga okuweerayo ssaddaaka nʼokwoterezanga obubaane ku bifo ebigulumivu kubanga byali tebiggyiddwawo.

⁵Bwe yalaba ngʼobwakabaka bunywezeddwa mu buyinza bwe, nʼatta abakungu abaatemula kabaka kitaawe.

⁶ⓒ Wabula teyatta batabani baabwe kubanga mu byawandiikibwa mu Kitabo ekyʼAmateeka ga Musa, Mukama yalagira nti, “Abazadde tebattibwenga ku lwʼabaana, so nʼabaana tebattibwenga ku lwʼabazadde baabwe; buli muntu anaafanga olwʼebibi bye ye.”

⁷Yawangula abʼe Edomu mu Kiwonvu ekyʼOmunnyo, era nʼatta omutwalo gumu ku bo, nʼokuwamba nʼawamba Seera[22] mu lutalo, nʼakituuma Yokuseeri, era kye kikyayitibwa ne ku lunaku lwa leero.

⁸Awo mu biro ebyo Amaziya nʼatumira Yekoyaasi mutabani wa Yekoyakaazi, muzzukulu wa Yeeku, kabaka wa Isirayiri, obubaka ngʼamusosonkereza nti, “Jjangu tulabagane amaaso nʼamaaso.”

⁹Naye Yekoyaasi kabaka wa Isirayiri nʼaddamu Amaziya kabaka wa Yuda nti, “Omwennyango mu Lebanooni gwʼaweereza obubaka eri omuvule mu Lebanooni nga gugamba nti, ‘Waayo muwala wo afumbirwe mutabani wange.’ Naye ensolo enkambwe eya Lebanooni bwe yali ngʼeyitawo nʼerinnyirira omwennyango.

¹⁰Kaakano wegulumizza kubanga owangudde Edomu. Wenyumirize mu buwanguzi bwo ewuwo. Lwaki oyagala okweleetera emitawaana, nʼokugwa kwo era nʼokwa Yuda?”

¹¹Naye Amaziya teyawuliriza, era ekyavaamu Yekoyaasi kabaka wa Isirayiri nʼamulumba. Ne balabagana amaaso nʼamaaso mu lutalo e Besusemesi ekya Yuda.

¹²Yuda nʼawangulibwa Isirayiri, buli musajja nʼaddukira ewuwe.

¹³Awo Yekoyaasi kabaka wa Isirayiri nʼawambira Amaziya kabaka wa Yuda mutabani wa Yekoyaasi muzzukulu wa Akaziya e Besusemesi; Yekoyaasi ne yeeyongerayo e Yerusaalemi, nʼamenyaamenya bbugwe wa Yerusaalemi, obuwanvu mita kikumi mu kinaana, okuva ku wankaaki wa Efulayimu okutuuka ku wankaaki owʼoku Nsonda.

¹⁴Nʼatwala ezaabu nʼeffeeza yonna, nʼebikozesebwa byonna ebyali mu yeekaalu ya Mukama, nʼebyʼobugagga ebyali mu lubiri lwa kabaka, era nʼabantu nʼabatwala nga basibe, nʼaddayo e Samaliya.

¹⁵Ebyafaayo ebirala byonna ebyaliwo mu mirembe gya Yekoyaasi, ne bye yakola nʼebyamagero bye, ne bwe yatabaala Amaziya kabaka wa Yuda, tebyawandiikibwa mu kitabo ekyʼebyomumirembe gya bassekabaka ba Isirayiri?

¹⁶Yekoyaasi nʼafa nʼaziikibwa mu Samaliya mu masiro ga bakabaka ba Isirayiri. Mutabani we Yerobowaamu nʼamusikira okuba kabaka.

¹⁷Awo Amaziya mutabani wa Yowaasi nʼawangaala emyaka kkumi nʼettaano emirala oluvannyuma lwʼokufa kwa Yekoyaasi mutabani wa Yekoyakaazi kabaka wa Isirayiri.

¹⁸Ebyafaayo ebirala ebyʼomulembe gwa Amaziya, tebyawandiikibwa mu kitabo ekyʼebyomumirembe gya bassekabaka ba Yuda?

¹⁹Ne bamusalira olukwe olwʼokumuttira mu Yerusaalemi, nʼaddukira e Lakisi, naye ne bamuwerekereza abasajja era ne bamuttira e Lakisi.

²⁰Ne bakomyawo omulambo gwe ku mbalaasi, era nʼaziikibwa ku biggya bya bajjajjaabe mu Yerusaalemi, mu kibuga kya Dawudi.

²¹Awo eggwanga lyonna erya Yuda, ne bafuula Azaliya owʼemyaka ekkumi nʼomukaaga kabaka, ngʼasikira kitaawe Amaziya.

²²Ye yaddaabiriza Erasi era nʼazza Yuda obuggya, nga Amaziya amaze okufa.

²³Mu mwaka ogwʼekkumi nʼettaano ogwʼobufuzi bwa Amaziya mutabani wa Yowaasi kabaka wa Yuda, Yerobowaamu II mutabani wa Yowaasi ssekabaka wa Isirayiri nʼafuuka kabaka mu Samaliya, era nʼafugira emyaka amakumi ana mu gumu.

²⁴Nʼakola ebibi mu maaso ga Mukama, nʼatakyuka okuva mu bibi ebya Yerobowaamu mutabani wa Nebati bye yayonoonyesa Isirayiri.

²⁵Yatuukiriza ekigambo kya Mukama, Katonda wa Isirayiri kye yayogerera mu muddu we Yona mutabani wa Amitayi nnabbi owʼe Gasukeferi, nʼazzaawo ensalo ya Isirayiri okuva ku mulyango gwa Kamasi okutuuka ku Nnyanja eyʼOmunnyo.

²⁶Mukama yalaba okubonaabona kwa buli omu mu Isirayiri, omuddu nʼatali muddu, nga tewali ayinza ku babeera.

²⁷Olwʼokubanga Mukama yali tagambye nti alisaanyaawo erinnya lya Isirayiri wansi wʼeggulu, nʼatuma Yerobowaamu II mutabani wa Yowaasi okubalokola.

²⁸Ebyafaayo ebirala ebyabaawo mu mirembe gya Yerobowaamu II, ne byonna bye yakola, ne bwe yalwana entalo nʼobuzira, nʼengeri gye yakomezaawo Isirayiri Ddamasiko ne Kamasi ebyali ebya Yuda, tebyawandiikibwa mu kitabo ekyʼebyomumirembe gya bassekabaka ba Isirayiri?

²⁹Yerobowaamu ne yeebakira wamu ne bajjajjaabe, bassekabaka ba Isirayiri, Zekkaliya mutabani we nʼamusikira okuba kabaka.