2 Bassekabaka 15:1-38 LGCB2014 - Bible AI

¹Mu mwaka ogwʼamakumi abiri mu omusanvu ogwʼobufuzi bwa Yerobowaamu kabaka wa Isirayiri, Azaliya mutabani wa ssekabaka Amaziya nʼalya obwakabaka bwa Yuda[23].

²Yalina emyaka kkumi na mukaaga bwe yatandika okufuga, nʼafugira emyaka amakumi ataano mu ebiri mu Yerusaalemi. Erinnya lya nnyina ye yali Yekoliya owʼe Yerusaalemi.

³Yakola ebyali ebirungi mu maaso ga Mukama, nga kitaawe Amaziya bwe yali akoze.

⁴Wabula ebifo ebigulumivu gye baweeranga ssaddaaka tebyaggibwawo, era abantu beeyongeranga okuweerangayo ssaddaaka nʼokwoterezangayo obubaane.

⁵Awo Mukama nʼaleetera kabaka obulwadde nʼagengewala[24], ennaku ze zonna okutuusa bwe yafa, era nʼaggyibwako emirimu egyʼobuvunaanyizibwa nʼateekebwa mu nnyumba eyʼenjawulo. Azaliya nʼasigira Yosamu[25] mutabani we okuvunaanyizibwanga ensonga zonna ezʼomu lubiri, era nʼafuganga nʼabantu abʼomu nsi.

⁶Ebyafaayo ebirala byonna ebyabaawo mu mirembe gya Azaliya, ne bye yakola byonna, tebyawandiikibwa mu kitabo ekyʼebyomumirembe gya bassekabaka ba Yuda?

⁷Awo Azaliya nʼafa, nʼaziikibwa ku biggya bya bajjajjaabe mu kibuga kya Dawudi, Yosamu mutabani we nʼamusikira okuba kabaka.

⁸Mu mwaka ogwʼamakumi asatu mu omunaana ogwʼobufuzi bwa Azaliya kabaka wa Yuda, Zekkaliya mutabani wa Yerobowaamu nʼalya obwakabaka bwa Isirayiri mu Samaliya, nʼafugira emyezi mukaaga.

⁹Nʼakola ebibi mu maaso ga Mukama, nga bajjajjaabe bwe baakola, nʼatakyuka okuva mu bibi bya Yerobowaamu mutabani wa Nebati bye yayonoonyesa Isirayiri.

¹⁰Awo Sallumu mutabani wa Yabesi, nʼasala olukwe nʼamuttira mu lujjudde lwʼabantu, era nʼalya obwakabaka.

¹¹Ebyafaayo ebirala ebyabaawo mu mirembe gya Zekkaliya, byawandiikibwa mu kitabo ekyʼebyomumirembe gya bassekabaka ba Isirayiri.

¹²ⓓ Awo ekigambo Mukama kye yagamba Yeeku ne kituukirira, era kyali kigamba nti, “Bazzukulu bo balirya obwakabaka bwa Isirayiri okutuusa ku muzzukulu owookuna.”

¹³Awo Sallumu mutabani wa Yabesi nʼatandika okufuga mu mwaka ogwʼamakumi asatu mu mwenda ogwʼobufuzi bwa Uzziya kabaka wa Yuda, era nʼafugira omwezi gumu mu Samaliya.

¹⁴Menakemu mutabani wa Gaadi nʼava e Tiruza nʼagenda okulumba Sallumu mutabani wa Yabesi e Samaliya, era nʼamutta. Ye nʼafuuka kabaka mu kifo kye.

¹⁵Ebyafaayo ebirala ebyabaawo mu mirembe gya Sallumu, nʼolukwe lwe yasala, byawandiikibwa mu kitabo ekyʼebyomumirembe gya bassekabaka ba Isirayiri.

¹⁶Mu kiseera ekyo Menakemu nʼalumba Tifusa nʼazikiriza buli muntu eyalimu, na buli kintu ekyali kikirinaanye ngʼatandikira ku nsalo yaakyo ne Tiruza, kubanga tebaamwaniriza. Abakyala abaali embuto nabo nʼabatta ngʼababaaga.

¹⁷Mu mwaka ogwʼamakumi asatu mu mwenda ogwʼobufuzi bwa Azaliya kabaka wa Yuda, Menakemu mutabani wa Gaadi nʼalya obwakabaka bwa Isirayiri, era nʼafugira emyaka kkumi mu Samaliya.

¹⁸Yakola ebibi mu maaso ga Mukama, era ebbanga lyonna we yabeerera kabaka, nʼatakyuka kuleka bibi bya Yerobowaamu mutabani wa Nebati bye yayonoonyesa Isirayiri.

¹⁹Awo Puli[26] kabaka wʼe Bwasuli nʼalumba Isirayiri, naye Menakemu nʼamusuubiza okumuwa ttani amakumi asatu mu nnya eza ffeeza ngʼamusaba okumuwanirira nʼokumunyweza ku ntebe eyʼobwakabaka.

²⁰Menakemu nʼasoloozanga ensimbi ku Bayisirayiri, buli musajja omugagga ngʼawaayo gulaamu desimoolo mukaaga eza ffeeza, okuwa kabaka wʼe Bwasuli. Awo kabaka wʼe Bwasuli nʼabaviira mu nsi yaabwe.

²¹Ebyafaayo ebirala ebyabaawo mu mirembe gya Menakemu, ne bye yakola byonna, tebyawandiikibwa mu kitabo ekyʼebyomumirembe gya bassekabaka ba Isirayiri?

²²Menakemu nʼafa, Pekakiya mutabani we nʼamusikira okuba kabaka.

²³Mu mwaka ogwʼamakumi ataano ogwʼobufuzi bwa Azaliya kabaka wa Yuda, Pekakiya mutabani wa Menakemu nʼalya obwakabaka bwa Isirayiri mu Samaliya, era nʼafugira emyaka ebiri.

²⁴Yakola ebibi mu maaso ga Mukama, nʼatakyuka kuleka bibi bya Yerobowaamu mutabani wa Nebati bye yayonoonyesa Isirayiri.

²⁵Awo omu ku baserikale be abakulu nga mukulu wa kibinja erinnya lye Peka mutabani wa Lemaliya, ne yeekobaana nʼabasajja abalala amakumi ataano Abagireyaadi ne battira Pekakiya wamu ne Alugobu, ne Aliye mu kigo ekyʼomu lubiri e Samaliya. Peka nʼatta Pekakiya, nʼalya obwakabaka.

²⁶Ebyafaayo ebirala ebyabaawo mu mirembe gya Pekakiya, ne bye yakola byonna, byawandiikibwa mu kitabo ekyʼebyomumirembe gya bassekabaka ba Isirayiri.

²⁷Mu mwaka ogwʼamakumi ataano mu ebiri ogwʼobufuzi bwa Azaliya kabaka wa Yuda, Peka mutabani wa Lemaliya nʼalya obwakabaka bwa Isirayiri mu Samaliya, era nʼafugira emyaka amakumi abiri.

²⁸Yakola ebibi bya Yerobowaamu mutabani wa Nebati bye yayonoonyesa Isirayiri.

²⁹Mu biro bya Peka kabaka wa Isirayiri, Tigulasupireseri kabaka wʼe Bwasuli nʼalumba ebibuga: byʼe Iyoni, nʼe Aberubesumaaka, nʼe Yanowa, nʼe Kedesi, nʼe Kazoli, nʼe Gireyaadi nʼe Ggaliraaya, nʼensi yonna eya Nafutaali, abantu baayo nʼabatwala nga basibe e Bwasuli.

³⁰Awo Koseya mutabani wa Era nʼasala olukwe okutta Peka mutabani wa Lemaliya, nʼamulumba era nʼamutta, nʼalya obwakabaka mu mwaka ogwʼamakumi abiri ogwʼobwakabaka bwa Yosamu mutabani wa Uzziya.

³¹Ebyafaayo ebirala ebyabaawo mu mirembe gya Peka, ne bye yakola byonna byawandiikibwa mu kitabo ekyʼebyomumirembe gya bassekabaka ba Isirayiri.

³²Mu mwaka ogwokubiri ogwʼobufuzi bwa Peka mutabani wa Lemaliya, Yosamu mutabani wa Uzziya nʼalya obwakabaka bwa Yuda.

³³Yali wa myaka amakumi abiri mu etaano we yatandikira okufuga, era nʼafugira emyaka kkumi na mukaaga mu Yerusaalemi, ne nnyina erinnya lye nga ye Yerusa muwala wa Zadooki.

³⁴Nʼakola ebirungi mu maaso ga Mukama, nga kitaawe Uzziya bwe yakola.

³⁵Naye ebifo ebigulumivu tebyaggibwawo, era abantu ne beeyongeranga okuweerangayo ssaddaaka nʼokwoterezangako obubaane. Yaddaabiriza nʼOmulyango ogwʼekyengulu ogwa yeekaalu ya Mukama.

³⁶Ebyafaayo ebirala ebyabaawo mu mirembe gya Yosamu, ne bye yakola byonna, tebyawandiikibwa mu kitabo ekyʼebyomumirembe gya bassekabaka ba Yuda?

³⁷Mu biro ebyo Mukama nʼatandika okusindikira Yuda abalabe nga Lezini kabaka wʼe Busuuli ne Peka mutabani wa Lemaliya.

³⁸Yosamu nʼafa, nʼaziikibwa ku biggya bya bajjajjaabe mu kibuga kya Dawudi jjajjaawe, Akazi mutabani we nʼamusikira okuba kabaka.