2 Bassekabaka 16:1-20 LGCB2014 - Bible AI

¹Mu mwaka ogwʼekkumi nʼomusanvu ogwʼobufuzi bwa Peka mutabani wa Lemaliya, Akazi[27] mutabani wa Yosamu kabaka wa Yuda, nʼatandika okufuga.

²Akazi yali wa myaka amakumi abiri we yatandikira okufuga, era nʼafugira emyaka kkumi na mukaaga mu Yerusaalemi. Nʼakola ebibi mu maaso ga Mukama Katonda we, obutafaanana nga jjajjaawe Dawudi.

³Nʼatambulira mu ngeri za bassekabaka ba Isirayiri, era nʼokuwaayo nʼawaayo mutabani we ngʼekiweebwayo, ngʼagoberera ebyʼemizizo ebyʼamawanga Mukama ge yali agobye mu maaso gʼAbayisirayiri.

⁴Nʼawangayo ssaddaaka, era nʼayoterezanga nʼobubaane ku bifo ebigulumivu, ku nsozi waggulu, ne wansi wa buli muti.

⁵Lezini kabaka wa Busuuli ne Peka, mutabani wa Lemaliya kabaka wa Isirayiri ne bambuka okulumba Yerusaalemi ne bazingiza Akazi, naye ne batayinza kumuwangula.

⁶Mu kiseera kye kimu, Lezini kabaka wa Busuuli nʼagoba abasajja ba Yuda okuva mu Erasi nʼakiddiza Abasuuli, era gye babeera ne leero.

⁷Awo Akazi nʼatuma ababaka eri Tigulasupireseri kabaka wʼe Bwasuli, okumugamba nti, “Ndi muddu wo era mutabani wo, nkwegayiridde jjangu ondokole okuva mu mukono gwa kabaka wa Busuuli; nʼokuva mu mukono gwa kabaka wa Isirayiri abannumbye[28].”

⁸Akazi nʼaggya effeeza ne zaabu ebyabeeranga mu yeekaalu ya Mukama, ne mu mawanika agʼomu lubiri lwa kabaka, nʼagiweereza ngʼekirabo eri kabaka wʼe Bwasuli.

⁹Awo kabaka wʼe Bwasuli nʼawulira okwegayirira kwe, nʼalumba Ddamasiko, nʼakiwamba, nʼabantu abaabeerangamu nʼabaweereza mu buwaŋŋanguse e Kiri, era nʼokutta nʼatta Lezini.

¹⁰Awo kabaka Akazi nʼagenda e Ddamasiko okusisinkana Tigulasupireseri kabaka wʼe Bwasuli, era eyo nʼalabayo ekyoto ekyali mu Ddamasiko. Amangwago kabaka Akazi nʼaweereza Uliya kabona ekifaananyi kyʼekyoto ekyo, nʼengeri gye kiteekwa okuzimbibwa.

¹¹Awo Uliya kabona nʼazimba ekyoto, ngʼebiragiro bya kabaka Akazi bye yaweereza okuva e Ddamasiko bwe byali, era nʼagimaliriza nga kabaka Akazi tannava Ddamasiko.

¹²Kabaka bwe yakomawo okuva e Ddamasiko, nʼalaba ekyoto, nʼakisemberera era ku kyo nʼaweerako ssaddaaka.

¹³Nʼaweerayo ssaddaaka eyʼekyokebwa ne ssaddaaka eyʼobutta nʼayiwako ne ssaddaaka eyʼekyokunywa, era nʼamansirako omusaayi ogwʼebiweebwayo olwʼemirembe ku kyoto.

¹⁴Nʼaggyawo ekyoto ekyʼekikomo ekyabeeranga mu maaso ga Mukama mu yeekaalu wakati wʼekyoto kye ne yeekaalu ya Mukama, nʼakiteeka ku luuyi olwʼobukiikaddyo obwʼekyoto kye.

¹⁵Awo kabaka Akazi nʼalagira Uliya kabona nti, “Ku kyoto ekinene, weerayo ekiweebwayo ekyokebwa ekyʼenkya nʼekiweebwayo ekyʼobutta ekyʼakawungeezi, ekyʼokuwaayo ekyokebwa ekya kabaka, nʼekyokuwaayo kye ekyʼobutta, nʼekyokuwaayo ekyokebwa ekyʼabantu abʼomu nsi, nʼekiweebwayo kyabwe ekyʼobutta, nʼekiweebwayo kyabwe ekyokunywa. Omansire ku kyoto omusaayi gwonna ogwʼebiweebwayo ebyokebwa, nʼomusaayi gwonna ogwa ssaddaaka. Wabula ekyoto ekyʼekikomo kinaabeeranga kyange nga kya kwebuuzaako.”

¹⁶Uliya kabona nʼakola byonna, nga kabaka Akazi bwe yamulagira.

¹⁷Kabaka Akazi nʼatemako emigo gye biyimirirwako, ne bensani nʼaziggya kwe zaabeeranga, ate nʼaggya nʼennyanja okuva ku nte ennume ezʼekikomo, eza giwaniriranga, nʼagiteeka ku mayinja amaliire.

¹⁸Nʼaggyawo nʼekyabikkanga ku kkubo erya ssabbiiti eryali lizimbiddwa okumpi ne yeekaalu, ate era nʼaggyawo nʼekkubo erya kabaka eryʼebweru wa yeekaalu ya Mukama, olwa kabaka wʼe Bwasuli.

¹⁹Ebyafaayo ebirala ebyabaawo mu bufuzi Akazi, ne bye yakola, tebyawandiikibwa mu kitabo ekyʼebyomumirembe gya bassekabaka ba Yuda?

²⁰Awo Akazi nʼafa nʼaziikibwa ku biggya bya bajjajjaabe mu kibuga kya Dawudi. Keezeekiya mutabani we nʼamusikira okuba kabaka.