2 Bassekabaka 19:1-37 LGCB2014 - Bible AI

¹Kabaka Keezeekiya olwawulira ebyo byonna, nʼayuza ebyambalo bye, nʼayambala ebibukutu, nʼalaga mu yeekaalu ya Mukama.

²Nʼatuma Eriyakimu eyali ssabakaaki, ne Sebuna omuwandiisi ne bakabona abʼoku ntikko, nga bonna bambadde ebibukutu, okugenda eri Isaaya nnabbi mutabani wa Amozi.

³Ne bamugamba nti, “Bwʼati bwʼayogera Keezeekiya nti Leero lunaku lwa buyinike, era lwa kunenyezebwa, era lwa kuswazibwa, ngʼabaana bwe batuuka okuzaalibwa, naye ne wataba maanyi ga ku bazaala.

⁴Kiyinzika okuba nga Mukama Katonda wo yawulidde obubaka bwonna obwa Labusake, mukama we kabaka wʼe Bwasuli bwe yaweereza ngʼanyooma Katonda omulamu, era nti amunenye olwʼebigambo byonna Mukama Katonda wo byʼawulidde. Noolwekyo ssabira ekitundu ekikyasigaddewo.”

⁵Awo abakungu ba Kabaka Keezeekiya bwe baatuuka eri Isaaya,

⁶Isaaya nʼabagamba nti, “Mutegeeze mukama wammwe nti, ‘Bwʼati bwʼayogera Mukama nti, totya bigambo byʼowulidde, ebigambo ebyo abaddu ba kabaka wʼe Bwasuli bye banvumye,

⁷Wuliriza! Nzija kumuteekamu omwoyo, awulire olugambo ku bikwata ku nsi ye addeyo mu nsi ye, era gye ndimuzikiririza nʼekitala.’ ”

⁸Labusake bwe yawulira nti kabaka wʼe Bwasuli avudde mu Lakisi, nʼavaayo, nʼasanga kabaka ngʼalwana ne Libuna.

⁹Awo Sennakeribu nʼafuna obubaka obukwata ku Tiraka kabaka wʼe Esiyopya nti, “Laba amaliridde okulwana naawe,” era nʼaddamu nʼatuma ababaka eri Keezeekiya ngʼagamba nti,

¹⁰“Bwe muti bwe munagamba Keezeekiya kabaka wa Yuda nti, ‘Tokkiriza Katonda wo gwe weesiga kukulimbalimba ngʼakusuubiza nti Yerusaalemi teriweebwayo mu mukono gwa kabaka wʼe Bwasuli.’

¹¹Ekyamazima wawulira bakabaka bʼe Bwasuli kye bakoze amawanga gonna, nga bagasaanyizaawo ddala. Olowooza nti olirokolebwa?

¹²Bakatonda baamawanga agʼe Gozani, nʼe Kalani, nʼe Lezefu, nʼabantu ba Adeni abaali mu Terasali, abasaanyizibwawo bajjajjange, babalokola?

¹³Kabaka wʼe Kamasi, kabaka wʼe Alupadi, kabaka wʼekibuga kya Sefavayimu, oba kabaka wʼe Kena oba kabaka wʼe Yiva, bali ludda wa?”

¹⁴Keezeekiya nʼafuna ebbaluwa eyaleetebwa ababaka, nʼagisoma. Nʼayambuka nʼagenda mu yeekaalu ya Mukama, nʼagyanjuluza mu maaso ga Mukama.

¹⁵Keezeekiya nʼasaba eri Mukama ngʼagamba nti, “Ayi Mukama Katonda wa Isirayiri, atuula waggulu ku bakerubi, ggwe wekka, ggwe Katonda owʼobwakabaka bwonna obwʼensi, era ggwe wakola eggulu nʼensi.

¹⁶Otege okutu kwo, Ayi Mukama, owulire; ozibule amaaso go Ayi Mukama, olabe; owulire ebigambo bya Sennakeribu, byayogedde ngʼavvoola Katonda omulamu.

¹⁷“Kyamazima, Ayi Mukama, nti bakabaka bʼe Bwasuli baazikiriza amawanga nʼensi zaabwe,

¹⁸ne basuula bakatonda baabwe mu muliro. Naye abo tebaali Katonda, baali mirimu gyʼemikono gyʼabantu, nga mbaawo nʼamayinja, era kyebaava bazikirizibwa.

¹⁹Kaakano, Ayi Mukama, Katonda waffe, tukwegayiridde, otulokole mu mukono gwe, amawanga gonna ku nsi gamanye nga ggwe, Ayi Mukama, gwe Katonda wekka.”

²⁰Awo Isaaya mutabani wa Amozi nʼaweereza Keezeekiya obubaka nti, “Bwʼati bwʼayogera Mukama, Katonda wa Isirayiri nti, Mpulidde okusaba kwo ku bikwata ku Sennakeribu kabaka wʼe Bwasuli.

²¹Kino kye kigambo Mukama kyʼayogedde ku bimukwatako;

²¹Omuwala wa Sayuuni embeerera akunyooma era akusekerera. Omuwala wa Yerusaalemi akunyeenyeza omutwe gwe nga bwʼodduka.

²²Ani gwʼovumye era nʼovvoola? Ani gwʼokandulidde eddoboozi lyo, era ani gwʼoyimusirizza amaaso go nʼamalala? Obikoze Omutukuvu wa Isirayiri!

²³Ojereze Mukama ngʼoyita mu babaka bo, era ogambye nti, ‘Nninye ku ntikko zʼensozi nʼamagaali gange amangi, ku ntikko ezisingirayo ddala obuwanvu eza Lebanooni. Ntemye emivule egisingirayo ddala obuwanvu nʼemiberosi gyayo egisingirayo ddala obulungi. Ntuuse ne mu bifo ebisingirayo ddala okuba ebikusike ne mu bibira ebisingirayo ddala okuba ebirungi.

²⁴Nsimye enzizi mu bannamawanga, nʼenywa amazzi gaamu. Nkazizza emigga egyʼe Misiri gyonna, nga ngirinnyirira nʼebisinziiro byʼebigere byange.’ ”

²⁴

²⁵“Tewawulira nga nakisalawo dda? Mu biro ebyʼedda nakiteekateeka, era kaakano nkituukirizza, olyoke ofuule ebibuga ebiriko bbugwe okuba ngʼentuumo yʼamayinja.

²⁶Ababituulamu tebakyalina buyinza, batekemuse era baswazibbwa. Bafaanana ngʼebimera ebyʼomu nnimiro, ngʼomuddo omubisi, ngʼomuddo ogusibuse mu busolya bwʼennyumba, ne gutugibwa nga tegunnakula.”

²⁶

²⁷“Naye mmanyi obutuuliro bwo era mmanyi okufuluma kwo nʼokuyingira kwo nʼobuswandi bwʼondaga.

²⁸Kubanga ondaze obuswandi bwo, nʼobujoozi bwo ne mbuwulira mu matu gange, kyendiva nteeka eddobo lyange mu nnyindo yo nʼolukoba lwange mu mumwa gwo, era oliddirayo mu kkubo lye wajjiramu.”

²⁹“Era kano ke kanaaba akabonero ko, ggwe Keezeekiya. Omwaka guno olirya ekyo ekimera kyokka, ne mu mwaka ogwokubiri ekiriva mwʼekyo. Naye mu mwaka ogwokusatu siga era okungule; era simba ennimiro ezʼemizabbibu, olye ku bibala bya kwo.

³⁰Ekitundu ekisigaddewo ekyʼennyumba ya Isirayiri kyekiriva kiddamu ne kisimba emizi wansi, ne kibala ebibala waggulu.

³¹Mu Yerusaalemi muliva ekitundu ekifisseewo, ne mu Lusozi Sayuuni ne muva abo abaliwona.”

³¹Obuggya bwa Mukama owʼEggye bulikituukiriza.

³²“Mukama kyava ayogera bwʼati ku bikwata ku kabaka wʼe Bwasuli, nti, ‘Taliyingira mu kibuga kino, wadde okulasayo akasaale. Talikisemberera nʼengabo wadde okutuumako ekifunvu ngʼakitaayiza.

³³Ekkubo lye yakwata ngʼajja, omwo mwʼaliddira, naye taliyingira mu kibuga kino,’

³³bwʼayogera Mukama.

³⁴‘Ndirwanirira ekibuga kino okukirokola, ku lwange, ne ku lwʼomuddu wange Dawudi.’ ”

³⁵Ekiro ekyo malayika wa Mukama nʼagenda mu nkambi eyʼAbasuuli nʼatta abasajja emitwalo kkumi na munaana mu enkumi ttaano. Ku makya abantu bwe baagolokoka, laba nga bonna mirambo.

³⁶Awo Sennakeribu kabaka wʼe Bwasuli nʼava mu nkambi, nʼaddayo ewuwe, nʼagenda nʼabeera e Nineeve.

³⁷Awo bwe yali ngʼasinziza mu ssabo lya katonda we Nisuloki Adulammereki ne Salezeri batabani be ne bamutta nʼekitala, ne baddukira mu nsi yʼe Alalati. Esaladoni mutabani we nʼamusikira.