2 Bassekabaka 3:1-27 LGCB2014 - Bible AI

¹Mu mwaka ogwʼekkumi nʼomunaana ogwʼobwakabaka bwa Yekosafaati kabaka wa Yuda, Yekolaamu mutabani wa Akabu nʼalya obwakabaka bwa Isirayiri e Samaliya, era nʼafugira emyaka kkumi nʼebiri.

²Yakola ebibi mu maaso ga Mukama, newaakubadde nga teyatuuka ku bibi bya kitaawe ne nnyina. Yazikiriza nʼempagi eya Baali kitaawe gye yali asimbye.

³Newaakubadde ngʼekyo yakikola, teyalekayo kukola ebibi ngʼebyo Yerobowaamu mutabani wa Nebati bye yakola, nʼayonoonyesa Isirayiri.

⁴Mesa Kabaka wa Mowaabu yalundanga endiga, era yalina omutemwa ogwʼokuwangayo abaana bʼendiga emitwalo kkumi, nʼebyoya byʼendiga ennume emitwalo kkumi eri Akabu.

⁵Naye Akabu olwafa, kabaka wa Mowaabu nʼatandika okujeemera kabaka wa Isirayiri.

⁶Awo mu biro ebyo kabaka Yekolaamu nʼasitula okuva e Samaliya, nʼakunga Isirayiri yenna okugenda naye.

⁷Nʼatumira ne Yekosafaati kabaka wa Yuda nti, “Kabaka wa Mowaabu anjeemedde, onooyinza okumbeera tumulwanyise?”

⁷Yekosafaati nʼamuddamu nti, “Nnaagenda naawe, kubanga nze ndi nga bwʼoli, era abantu bange be bantu bo, nʼembalaasi zange ze zizo.”

⁸Yekosafaati nʼamubuuza nti, “Ye, tunaalumba kuva ku luuyi ki?” Yekolaamu nʼamuddamu nti, “Tunaayita mu ddungu erya Edomu[4].”

⁹Awo kabaka wa Isirayiri, nʼasitukira wamu ne kabaka wa Yuda ne kabaka wa Edomu[5] ne bagenda mu lutalo. Ne batambula olugendo lwa nnaku musanvu, nʼoluvannyuma ne beesanga ngʼeggye amazzi galiweddeko, nga nʼebisolo byabwe tebirina wadde ettondo.

¹⁰Kabaka wa Isirayiri ne yeekanga nnyo. Nʼayogera nti, “Zitusanze! Ffenna abasatu, Mukama atuwaddeyo mu mukono gwa Mowaabu?”

¹¹Kyokka Yekosafaati nʼabuuza nti, “Tewali wano nnabbi wa Mukama tumwebuuzeeko?” Awo omu ku bakungu ba kabaka wa Isirayiri nʼamuddamu nti, “Wano waliwo Erisa mutabani wa Safati. Ye yali omuweereza wa Eriya owʼoku mwanjo.”

¹²Yekosafaati nʼayogera nti, “Alina ekigambo okuva eri Mukama.” Awo Yekosafaati kabaka wa Yuda, awamu ne kabaka wa Isirayiri, ne kabaka wa Edomu ne baserengeta gyʼali.

¹³Awo Erisa nʼagamba kabaka wa Isirayiri nti, “Onnanga ki? Genda eri bannabbi ba kitaawo nʼaba maama wo.” Kabaka wa Isirayiri nʼamuddamu nti, “Nedda sijja kugendayo; kubanga kirabika nga Mukama atukuŋŋaanyiza ffensatule, okutuwaayo mu mukono gwa Mowaabu.”

¹⁴Erisa nʼayogera nti, “Nga Mukama Katonda Ayinzabyonna gwe mpeereza bwʼali omulamu, singa nnali siwa Yekosafaati kabaka wa Yuda kitiibwa, sandikukubyeko munye ya liiso wadde okukusaako omwoyo.

¹⁵Naye kaakano, mundeetere omukubi wʼennanga.” Omukubi wʼennanga bwe yali ngʼakyakuba ennanga, amaanyi ga Mukama ne gakka ku Erisa,

¹⁶nʼayogera nti, “Bwʼati bwʼayogera Mukama nti, ‘Musime ensalosalo mu kiwonvu kino.’

¹⁷Mukama agamba nti, ‘Temuulabe mbuyaga wadde enkuba, naye ekiwonvu kino kijja kujjula amazzi, era mmwe munaanywa, nʼente zammwe zinaanywa, nʼebisolo byammwe ebirala nabyo binywe.

¹⁸Eyo nsonga nnyangu mu maaso ga Mukama, era nʼAbamowaabu mujja kubawangula.

¹⁹Mulizikiriza buli kibuga ekyetooloddwa bbugwe na buli kibuga ekikulu, era mulitema buli muti omulungi, ne muziyiza nʼenzizi okuleeta amazzi, era ne mwonoona buli nnimiro nga mugijjuza amayinja.’ ”

²⁰Awo obudde bwe bwakya, mu kiseera ekyʼokuweerayo ssaddaaka, amazzi ne gakulukuta nga gava ku luuyi olwa Edomu, ensi nʼejjula amazzi.

²¹Abamowaabu bonna bwe baawulira nga bakabaka babalumbye okulwana nabo, buli musajja, omuto nʼomukulu abaali basobola okwambala ebyokulwanyisa, ne bayitibwa okugenda okutabaala.

²²Enkeera enjuba bwe yayaka ku mazzi, Abamowaabu ne balowooza nti amazzi mamyufu kubanga gaabalabikira ngʼomusaayi.

²³Ne bagamba nti, “Guno musaayi! Kirabika nga bakabaka baalwanye bokka ne bokka, ne battiŋŋana, kale Mowaabu mugwe ku munyago.”

²⁴Naye Abamowaabu bwe baali nga baakayingira mu nkambi yʼAbayisirayiri, amangwago Abayisirayiri ne batandika okulwana nabo, okutuusa Abamowaabu lwe badduka.

²⁵Ne bamenyaamenya ebibuga byʼAbamowaabu, ne bakanyuga amayinja ku buli kibanja ekirungi okutuusa lwe gaakolangako entuumo; ne baziba enzizi zonna ezʼamazzi, ne batema na buli muti omulungi. Kirukalesesi kye kifo kyokka ekyali kitalumbiddwa, naye oluvannyuma abasajja abʼenvuumuulo ne bakirumba.

²⁶Awo kabaka wa Mowaabu bwe yalaba ngʼolutalo lumugendedde bubi, nʼatwala abasajja abʼebitala lusanvu, ne bagenda naye okulumba kabaka wa Edomu, kyokka ne balemelerwa.

²⁷Nʼaddira mutabani we omuggulanda, eyali ateekwa okumusikira, nʼamuweerayo ku bbugwe wʼekibuga ngʼekiweebwayo ekyokebwa. Abayisirayiri ne beesisiwala nnyo ne beetamwa, era ne baddayo mu nsi yaabwe.