2 Bassekabaka 6:1-33 LGCB2014 - Bible AI

¹Awo ekibiina kya bannabbi ne bagamba Erisa nti, “Laba, ekifo we tukuŋŋaanira wafunda nnyo.

²Leka tulage ku lubalama lwa Yoludaani, buli omu ku ffe atemeyo omuti gumu, twezimbire ekifo ekigazi mwe tuyinza okubeera.” Nʼabagamba nti, “Mugende.”

³Awo omu ku bo nʼamubuuza nti, “Toogende nʼabaddu bo?” Nʼaddamu nti, “Nzija kugenda nammwe.”

⁴Nʼagenda nabo.

⁴Ne baserengeta ne balaga ku Yoludaani, ne batandika okutema emiti.

⁵Naye omu ku bo bwe yali ngʼatema omuti, omutwe gwʼembazzi ye ne gusowokamu ne gugwa mu mazzi, nʼayogerera waggulu nti, “Ayi mukama wange, nagyeyazise bweyazisi!”

⁶Awo omusajja wa Katonda nʼamubuuza nti, “Yagudde wa?” Bwe yamulaga ekifo, Erisa nʼatema akati, nʼakakanyuga mu kifo ekyo, ekyuma ne kiva wansi ne kiseeyeeya kungulu ku mazzi.

⁷Erisa nʼamugamba nti, “Giggyeemu.” Omusajja nʼagiggyamu.

⁸Awo olwatuuka kabaka wa Busuuli yali atabadde Isirayiri, ne yeebuza ku baserikale be ngʼagamba nti, “Kifo ki mwe ndikuba olusiisira lwange?”

⁹Naye mu kiseera kye kimu omusajja wa Katonda nʼaweereza kabaka wa Isirayiri obubaka nti, “Weegendereze obutayita mu kifo gundi, kubanga Abasuuli bajja kubeerayo.”

¹⁰Awo kabaka wa Isirayiri nʼatuma bakebere mu kifo ekyo omusajja wa Katonda kye yayogerako. Era bulijjo Erisa yamulabulanga, kabaka nʼawona si mulundi gumu so si ebiri.

¹¹Ekyo kyanyiiza nnyo kabaka wa Busuuli, era nʼayita abaserikale be, nʼababuuza nti, “Muntegeeze, ani mu ffe ali ku ludda lwa kabaka wa Isirayiri?”

¹²Omu ku bo nʼamuddamu nti, “Tewali nʼomu ku ffe mukama wange kabaka, naye Erisa nnabbi ali mu Isirayiri, yʼategeeza kabaka wa Isirayiri, ebigambo byʼoyogerera mu kisenge kyo.”

¹³Kabaka nʼalagira nti, “Mugende mulabe wʼali, ndyoke ntume abasajja bamukwate.” Ne bakomyawo obubaka nti, “Ali mu Dosani.”

¹⁴Amangwago nʼasindika embalaasi, nʼamagaali, nʼeggye eryʼamaanyi, ne bajja mu kiro ne bazingiza ekibuga.

¹⁵Omuweereza owʼomusajja wa Katonda bwe yazuukuka ku makya nʼafuluma ebweru, laba, eggye eririna embalaasi, nʼamagaali nga lyetoolodde ekibuga. Omuweereza nʼayogerera waggulu nti, “Ayi mukama wange tunaakola tutya?”

¹⁶Nnabbi nʼaddamu nti, “Totya kubanga abali naffe bangi okusinga abali nabo.”

¹⁷Awo Erisa nʼasaba ngʼagamba nti, “Ayi Mukama, zibula amaaso ge asobole okulaba.” Amangwago Mukama nʼazibula amaaso agʼomuweereza, laba ngʼensozi zijjudde embalaasi nʼamagaali agʼomuliro nga geetoolodde Erisa.

¹⁸Abalabe bwe baaserengeta okulumba Erisa, nʼasaba Mukama, nʼayogera nti, “Nkwegayiridde, ozibe amaaso gʼabantu bano.” Nʼaziba amaaso gaabwe nga Erisa bwe yamusaba.

¹⁹Erisa nʼabagamba nti, “Lino si lye kkubo, era kino si kye kibuga. Mungoberere, mbatwale eri omusajja gwe munoonya.” Nʼabakulemberamu nʼabatwala e Samaliya.

²⁰Olwayingira mu kibuga, nʼasaba Mukama nti, “Zibula amaaso gʼabasajja bano, balabe.” Mukama nʼazibula amaaso gaabwe, ne batunula, laba nga bali mu Samaliya wakati.

²¹Awo kabaka wa Isirayiri bwe yabalaba, nʼabuuza Erisa nti, “Kitange, mbatte? Mbatte?”

²²Nʼamuddamu nti, “Tobatta. Oyinza okutta abo bʼowambye nʼekitala kyo, nʼomutego gwʼakasaale? Bategekere emmere nʼamazzi, balye nʼokunywa banywe, nʼoluvannyuma obasindike baddeyo eri mukama waabwe.”

²³Nʼabateekerateekera embaga nnene, era bwe baamala okulya nʼokunywa, nʼabasindika ne baddayo eri mukama waabwe. Abasuuli okwo kwe baakoma okulumba ensi ya Isirayiri.

²⁴Bwe waayitawoko ebbanga, Benikadadi kabaka wʼe Busuuli, nʼakuŋŋaanya eggye lye lyonna, nʼalumba nʼazingiza Samaliya.

²⁵Ne waba enjala nnyingi nnyo mu kibuga olwʼokuzingiza okwo, omutwe gwʼendogoyi[11] ne gutundibwanga kilo emu eya ffeeza, nʼekimu ekyokuna ekyʼekibya ekyʼobusa bwʼenjiibwa ne kitundibwanga gulaamu ataano mu ttaano eza ffeeza.

²⁶Awo kabaka wa Isirayiri yali ayita okumpi ne bbugwe, omukazi omu nʼayogerera mu ddoboozi eryʼomwanguka ngʼagamba nti, “Nnyamba mukama wange kabaka!”

²⁷Kabaka nʼamuddamu nti, “Mukama bwʼataakuyambe, nze nnaakuyamba ntya? Obuyambi nnaabuggya mu gguuliro oba mu ssogolero?”

²⁸Era kwe kumubuuza nti, “Mutawaana ki?”

²⁸Omukazi nʼamuddamu nti, “Omukazi ono gwʼolaba yateesezza nti, ‘Waayo omwana wo owoobulenzi tumulye leero, enkya tulye owange.’

²⁹Ne nzikiriza, ne tufumba owange ne tumulya. Enkeera ne mugamba nti, ‘Waayo omwana wo owoobulenzi tumulye,’ naye amukwese.”

³⁰Kabaka bwe yawulira ebigambo byʼomukazi oyo, nʼayuza ebyambalo bye. Bwe yali ngʼatambula ku bbugwe, abantu ne bamulengera, laba ngʼayambadde ebibukutu wansi wʼebyambalo bye.

³¹Nʼayogera nti, “Katonda ankole bwʼatyo nʼokusingawo, omutwe gwa Erisa mutabani wa Safati bwe gunaabeera ku bibegabega bye leero!”

³²Mu kiseera kye kimu ekyo, Erisa yali atudde mu nnyumba ye nga nʼabakadde batudde wamu naye, kabaka nʼatuma omubaka okumukulemberamu, naye omubaka oyo bwe yali tannatuuka, Erisa nʼagamba abakadde nti, “Mulaba omutemu oyo bwʼatumye omuntu okuntemako omutwe? Laba, omubaka ajja, muggaleewo oluggi mulunyweze so temumukkiriza kuyingira. Ebigere bya mukama we tebiri mabega we, tamuvaako mabega?”

³³Awo Erisa bwe yali ngʼakyayogera nabo, omubaka nʼatuuka, nʼayogera nti, “Akabi kano kavudde eri Mukama. Lwaki nnindirira Mukama nate?”