2 Ebyomumirembe 1:1-17 LGCB2014 - Bible AI

¹ⓐ Sulemaani mutabani wa Dawudi nʼatebenkera ku bwakabaka bwe, kubanga Mukama Katonda we yali wamu naye, era nʼamugulumiza nnyo.

²Awo Sulemaani nʼayita Isirayiri yonna, nʼatumya abaduumizi bʼenkumi nʼabʼebikumi, nʼabalamuzi, nʼabakadde bonna mu Isirayiri yonna, nʼabakulembeze bʼennyumba za bajjajjaabwe.

³ⓑ Sulemaani nʼekibiina kyonna ne bagenda e Gibyoni eyali ekifo ku lusozi awaali Eweema ya Katonda eyʼOkusisinkanirangamu, Musa omuweereza wa Mukama gye yakuba, eyo mu ddungu.

⁴ⓒ Naye Dawudi yali aggye essanduuko ya Katonda okuva e Kiriyasuyalimu, nʼagitwala e Yerusaalemi gye yali agitegekedde ngʼagizimbidde eweema.

⁵ⓓ Era nʼekyoto ekyʼekikomo Bezaaleeri mutabani wa Uli, muzzukulu wa Kuuli kye yali azimbye, kyali eyo mu lusiisira lwa Mukama, ne Sulemaani nʼekibiina kyonna gye beebuulizanga ku Mukama.

⁶Sulemaani nʼayambuka eri ekyoto ekyʼekikomo nʼalaga mu maaso ga Mukama mu Weema eyʼOkusisinkanirangamu nʼaweerayo ku kyoto ebiweebwayo ebyokebwa lukumi.

⁷Ekiro ekyo Katonda nʼalabikira Sulemaani nʼamugamba nti, “Saba kyonna kyʼoyagala nkuwe.”

⁸ⓔ Sulemaani nʼaddamu Katonda nti, “Olazze kitange Dawudi ekisa nʼokwagala kungi nnyo, nʼonfuula omusika we.

⁹Kaakano, Mukama Katonda, kye wasuubiza kitange Dawudi, nsaba kituukirizibwe, kubanga onfudde kabaka owʼeggwanga eryenkana ngʼenfuufu ku nsi mu bungi bwayo.

¹⁰ⓕ Ompe amagezi nʼokumanya, ndyoke nkulembere abantu bano; kubanga ani ayinza okufuga eggwanga lyo lino eddene bwe liti?”

¹¹Katonda nʼaddamu Sulemaani nti, “Kubanga ekyo kibadde mu mutima gwo, nʼotosaba bintu, oba obugagga, wadde ekitiibwa newaakubadde okuwangula abalabe bo, ate nʼotosaba na buwangaazi, naye nʼosaba amagezi nʼokumanya osobole okufuga abantu bange, ggwe, nga kabaka waabwe,

¹²ⓖ amagezi nʼokumanya bikuweereddwa. Era nzija kukuwa obugagga, nʼebintu, nʼekitiibwa, ebitenkana ebyo bakabaka abaakusooka bye baalina, wadde abalijja ngʼovuddewo, bye balifuna.”

¹³Awo Sulemaani nʼava mu maaso gʼEweema eyʼOkukuŋŋaanirangamu e Gibyoni nʼaddayo e Yerusaalemi. Nʼafuga Isirayiri.

¹⁴Sulemaani nʼakuŋŋaanya amagaali nʼabeebagala embalaasi; nʼaba nʼamagaali lukumi mu bina, nʼabeebagala embalaasi omutwalo gumu mu enkumi bbiri, be yateeka mu bibuga ebyʼamagaali, ne mu Yerusaalemi gye yabeeranga.

¹⁵ⓗ Kabaka nʼafuula effeeza ne zaabu okuba ebyabulijjo mu Yerusaalemi, nga bingi ngʼamayinja; era nʼafuula nʼemivule okuba emingi ngʼemisukamooli mu nsenyi.

¹⁶Embalaasi za Sulemaani zaasubulibwanga okuva e Misiri, era abasuubuzi ba kabaka be baazigulangayo.

¹⁷Eggaali baagisuubulanga kilo musanvu eza ffeeza, embalaasi ne bagisuubulanga kilo emu ne desimoolo musanvu eza ffeeza okuva e Misiri. Ate era baazitunzanga ne bakabaka bonna abʼAbakiiti ne bakabaka abʼe Busuuli.