2 Ebyomumirembe 16:1-14 LGCB2014 - Bible AI

¹ⓛ Mu mwaka ogwʼamakumi asatu mu omukaaga ogwʼobufuzi bwa Asa, Baasa kabaka wa Isirayiri nʼalumba Yuda, nʼazimba ebigo ku Laama okuziyiza omuntu yenna okuyingira wadde okufuluma mu nsalo ya Asa kabaka wa Yuda.

²Awo Asa nʼaddira ffeeza ne zaabu ebyali mu mawanika ga yeekaalu ya Mukama, nʼebyali mu lubiri lwa kabaka, nʼabiweereza Benikadadi kabaka wʼe Busuuli, eyabeeranga e Ddamasiko, nʼaweereza nʼobubaka nti,

³“Wabeerewo endagaano wakati wo nange, ngʼeri eyaliwo wakati wa kitange ne kitaawo. Laba, nkuweerezza ffeeza ne zaabu omenyewo endagaano yo wakati wo ne Baasa kabaka wa Isirayiri, anveeko.”

⁴Benikadadi nʼakkiriziganya ne kabaka Asa, era nʼaweereza abaduumizi bʼeggye lye okulumba ebibuga bya Isirayiri; ne bawamba Yiyoni, ne Ddaani ne Aberumayimu, nʼebibuga byonna ebyʼamaterekero ebya Nafutaali.

⁵Awo Baasa bwe yawulira ekyo, nʼalekeraawo okuzimba mu Laama, nʼomulimu nʼagukomya.

⁶Kabaka Asa nʼaleeta Yuda yenna e Laama, ne baggyayo amayinja nʼembaawo Baasa bye yali azimbisa, Asa nʼabikozesa okuzimba Geba ne Mizupa.

⁷Mu biro ebyo Kanani omulabi nʼajja eri Asa kabaka wa Yuda, nʼamugamba nti, “Olwʼokwesiga kabaka wʼe Busuuli mu kifo kyʼokwesiga Mukama Katonda wo, eggye lya kabaka wʼe Bwasuli kye livudde likuddukako.

⁸Abaesiyopiya nʼAbalubimu tebaali ggye ddene nga balina amagaali mangi nʼabeebagala embalaasi bangi? Naye, olwokubanga weesiga Mukama, kyeyava abagabula mu mukono gwo.

⁹ⓜ Kubanga amaaso ga Mukama galaba wonna mu nsi, nga ganyweza emitima gyʼabo abamwesigira ddala. Kyʼokoze kya busirusiru, era okuva ne leero ojja kubeeranga nʼentalo.”

¹⁰ⓝ Awo Asa nʼanyiigira nnyo omulabi, nʼamuteeka ne mu kkomera. Mu kiseera kye kimu Asa nʼayisa bubi nnyo abantu abamu.

¹¹ⓞ Ebyafaayo ebyʼobufuzi bwa Asa okuva ku ntandikwa okutuusa ku nkomerero, byawandiikibwa mu kitabo kya bassekabaka ba Yuda ne Isirayiri.

¹²Mu mwaka ogwʼamakumi asatu mu mwenda ogwʼobufuzi bwe, Asa nʼalwala ebigere. Newaakubadde ngʼobulwadde bweyongera, teyanoonyanga buyambi okuva eri Mukama, yabunoonyanga mu basawo bokka.

¹³ⓟ Awo mu mwaka ogwʼamakumi ana mu ogumu ogwʼobufuzi bwe, Asa ne yeebakira awamu ne bajjajjaabe.

¹⁴Nʼaziikibwa mu ntaana gye yali yeezimbidde mu kibuga kya Dawudi. Ne bamuteeka ku kitanda ekyaliko obuloosa obwenjawulo nʼobuwoowo obwa buli kika, ne bamukumira nʼekyoto kyʼomuliro kinene nnyo okujjukira bye yakola.