2 Ebyomumirembe 23:1-21 LGCB2014 - Bible AI

¹ⓨ Naye mu mwaka ogwʼomusanvu Yekoyaada nʼalaga obuyinza bwe. Nʼakola endagaano nʼabaduumizi abʼebibinja ebyʼekikumi, era baali Azaliya mutabani wa Yekokamu, ne Isimayiri mutabani wa Yekokanani, ne Azaliya mutabani wa Obedi, ne Maaseya mutabani wa Adaya, ne Erisafaati mutabani wa Zikuli.

²ⓩ Ne bagenda mu Yuda yonna ne bakuŋŋaanya Abaleevi nʼabakulembeze bʼennyumba za bajjajja ba Isirayiri okuva mu bibuga byonna ebya Yuda ne bajja e Yerusaalemi.

³Ekibiina kyonna ne bakola endagaano ne kabaka mu yeekaalu ya Katonda.

³Awo Yekoyaada nʼabagamba nti, “Mutabani wa kabaka yʼalifuga, nga Mukama bwe yasuubiza bazzukulu ba Dawudi.

⁴Era bwe muti bwe munaakola: kimu kya kusatu ku mmwe bakabona nʼAbaleevi abanaaberanga ku luwalo ku ssabbiiti munaakuumanga wankaaki,

⁵ate kimu kya kusatu ekirala munaakuumanga olubiri lwa kabaka, nʼekimu kya kusatu ekirala munaakuumanga Omulyango ogwʼOmusingi, nʼabantu abalala bonna banaabeeranga mu luggya olwa yeekaalu ya Mukama.

⁶Tewabanga nʼomu ayingira mu yeekaalu ya Mukama wabula bakabona, nʼAbaleevi abanaabeeranga mu luwalo; abo banaayingiranga kubanga batukuvu, naye abantu abalala bonna banaagobereranga ekyo Mukama kye yalagira.

⁷Abaleevi banaayimiriranga okwetooloola kabaka, buli omu ku bo ngʼakutte ebyokulwanyisa bye mu mukono gwe, na buli anaayingiranga mu yeekaalu wa kuttibwa. Mubeere kumpi nnyo ne kabaka, buli gyʼanaalaganga.”

⁸Abaleevi nʼabantu bonna aba Yuda ne bakola nga Yekoyaada kabona bwe yalagira. Buli omu ku bo nʼatwala abasajja be, abo abaali mu luwalo ku Ssabbiiti, wamu nʼabo abaali bamaliriza olwabwe, kubanga Yekoyaada kabona yali tannabagaba mu mpalo.

⁹ⓐ Nʼawa abaduumizi abʼekikumi amafumu, nʼengabo ennene, nʼengabo entono, ebyali ebya Kabaka Dawudi, ebyabeeranga mu yeekaalu ya Katonda.

¹⁰Era nʼateekateeka buli musajja okuba omukuumi wa kabaka, nga buli omu ku bo akutte ekyokulwanyisa mu mukono gwe, nga beetoolodde kabaka, nʼokwetooloola ekyoto ne yeekaalu, okuva mu bukiikaddyo, okutuuka ku bukiikakkono obwa yeekaalu.

¹¹ⓑ Awo Yekoyaada ne batabani be ne bafulumya mutabani wa kabaka ne bamutikkira engule eyʼobwakabaka, ne bakola endagaano, era ne bamulangirira okuba kabaka. Ne bamufukako amafuta, ne boogera mu ddoboozi eryʼomwanguka nti, “Wangaala kabaka!”

¹²Naye Asaliya bwe yawulira oluyoogaano lwʼabantu nga badduka era nga batendereza kabaka, nʼagenda gye bali mu yeekaalu ya Mukama.

¹³Nʼatunula, laba, kabaka ngʼayimiridde okuliraana empagi ye ku mulyango, nʼabakungu nʼabafuuwa amakondeere nga bayimiridde okumwetooloola, era nga nʼabantu bonna abʼensi nga basanyuka nga bafuuwa nʼamakondeere, nʼabayimbi nga bakutte ebivuga byabwe nga bakulembedde okujaguza. Awo Asaliya nʼayuza ebyambalo bye, nʼaleekaanira waggulu nti, “Bujeemu! Bujeemu!”

¹⁴Yekoyaada kabona nʼatuma abaduumizi abʼebibinja ebyʼekikumi, abaavunaanyizibwanga eggye, nʼabagamba nti, “Mumufulumye mumuteeke wakati wʼenyiriri, mutte nʼekitala omuntu yenna anaamugoberera.” Kabona yali ayogedde nti, “Temumuttira mu yeekaalu ya Mukama.”

¹⁵Bwe yali ngʼanaatera okutuuka ku mulyango ogwʼembalaasi mu luggya olwokubiri, ne bamukwata ne bamuttira eyo.

¹⁶ⓒ Awo Yekoyaada nʼakola endagaano wakati we nʼabantu bonna era ne kabaka, nti baliba bantu ba Mukama.

¹⁷ⓓ Abantu bonna ne bagenda mu ssabo lya Baali ne balimenyaamenya, ne bamenyaamenya nʼebyoto bye nʼebifaananyi bye, era ne battira ne Matani kabona wa Baali mu maaso gʼebyoto bya Baali.

¹⁸Awo Yekoyaada nʼassaawo abanaalabiriranga yeekaalu ya Mukama, era nʼalonda bakabona nʼAbaleevi Dawudi be yali awadde obuvunaanyizibwa obwʼokuwangayo ebiweebwayo ebyokebwa eri Mukama, nga bwe kyawandiikibwa mu mateeka ga Musa, nga bajaguza era nga bayimba, nga Dawudi bwe yalagira.

¹⁹Nʼateeka nʼabaggazi ku wankaaki za yeekaalu ya Mukama, waleme okubaawo omuntu yenna atali mulongoofu ayingira.

²⁰ⓔ Nʼagenda nʼabaduumizi abʼekikumi, nʼabakungu, nʼabafuzi bʼabantu, nʼabantu bonna abʼeggwanga, ne baggya kabaka mu yeekaalu ya Mukama, ne bayita mu wankaaki owʼekyengulu ne balaga mu lubiri lwa kabaka. Ne batuuza kabaka ku ntebe ye eyʼobwakabaka.

²¹Abantu bonna abʼensi ne bajaguza, nʼekibuga ne kitereera, kubanga Asaliya yali attiddwa nʼekitala.