2 Ebyomumirembe 28:1-27 LGCB2014 - Bible AI

¹ⓚ Akazi yali wa myaka amakumi abiri we yaliira obwakabaka, nʼafugira emyaka kkumi na mukaaga mu Yerusaalemi. Naye obutafaanana nga jjajjaawe Dawudi, yakola ebitali bya butuukirivu mu maaso ga Mukama.

²Nʼatambulira mu makubo ga bassekabaka ba Isirayiri, nʼokukola nʼakola ebifaananyi ebisaanuuse ebyakozesebwanga mu kusinza Baali.

³Nʼayoterezanga obubaane mu kiwonvu kya mutabani wa Kinomu, nʼawaayo batabani be okuba ebiweebwayo ebyokebwa, ngʼagoberera emizizo gyʼabannaggwanga, Mukama be yagoba mu maaso gʼAbayisirayiri.

⁴Nʼawangayo ssaddaaka wamu nʼokwoterezanga obubaane mu bifo ebigulumivu, ne ku ntikko zʼensozi, ne wansi wa buli muti omubisi.

⁵ⓛ Mukama Katonda we kyeyava amuwaayo mu mukono gwa kabaka wʼe Busuuli, eyamuwangula nʼatwala abantu ba Yuda bangi nga basibe, nʼabaleeta e Ddamasiko. Ate era yaweebwayo ne mu mukono gwa kabaka wa Isirayiri, eyaleeta ku bantu ba Yuda ebisago ebinene.

⁶ⓜ Peka mutabani wa Lemaliya yatta abaserikale ba Yuda emitwalo kkumi nʼebiri mu lunaku lumu, kubanga baali bavudde ku Mukama Katonda wa bajjajjaabwe.

⁷Ne Zikuli, omusajja omulwanyi omuzira owa Efulayimu nʼatta Maaseya mutabani wa kabaka, ne Azulikamu omukulu wʼolubiri ne Erukaana omukungu, addirira kabaka.

⁸Abayisirayiri ne bawamba abakyala, nʼabaana aboobulenzi, nʼaboobuwala, emitwalo amakumi abiri ku baganda baabwe, ne babatwala nga basibe e Samaliya, ate ne babatwalako nʼomunyago mungi.

⁹ⓝ Awo Odedi nnabbi wa Mukama eyali eyo nʼagenda okusisinkana eggye eryali lijja e Samaliya, nʼabagamba nti, “Laba, kubanga Mukama Katonda wa bajjajjammwe yasunguwalira Yuda, kyeyava abawaayo mu mukono gwammwe, kyokka mubasse nʼekiruyi nʼokutuuka ne kituuka mu ggulu.

¹⁰Kaakano, abasajja nʼabakazi aba Yuda ne Yerusaalemi mumaliridde, okubafuula abaddu bammwe. Naye bwe mmwekebera, temulina kyemwali musobezza Mukama Katonda wammwe?

¹¹ⓞ Kale nno, mumpulirize, muleke baganda bammwe be muwambye baddeyo ewaabwe, kubanga Mukama abasunguwalidde mmwe.”

¹²Awo abamu ku bakadde ba Efulayimu, Azaliya mutabani wa Yokanaani, ne Berakiya mutabani wa Mesiremosi, ne Yekizukiya mutabani wa Sallumu, ne Amasa mutabani wa Kadalayi, ne bayimirira okuziyiza abo abaali bava mu lutalo.

¹³Ne babagamba nti, “Temujja kuleeta basibe abo wano, kubanga mujja kutuleetako omusango eri Mukama nga mwongereza ku kibi ne ku musango bye tulina. Omusango gwaffe munene, nʼobusungu bwe buli ku Isirayiri.”

¹⁴Awo abaserikale ne basumulula abasibe, nʼomunyago ne baguwaayo mu maaso gʼabakungu nʼekibiina kyonna.

¹⁵Ne balonda abasajja abaatwala abasibe ne baggya engoye mu munyago ne bambaza abo bonna abaali obwereere, ne babawa engoye endala, nʼengatto, ne babawa emmere nʼekyokunywa, ne babanyiga nʼebiwundu. Nʼabaali abanafu ennyo bonna ne babasitulira ku ndogoyi, ne babazzaayo eri baganda baabwe e Yeriko, ekibuga ekyʼenkindu, bo ne bakomawo e Samaliya.

¹⁶ⓟ Awo mu biro ebyo kabaka Akazi nʼasaba kabaka wʼe Bwasuli amuyambe,

¹⁷ⓠ kubanga Abayedomu baali bazeemu okulumba Yuda, ne batwala abantu mu busibe.

¹⁸Mu kiseera kyekimu Abafirisuuti baali balumbye ebibuga ebyʼomu nsenyi nʼebyʼomu bukiikaddyo obwa Yuda, nga bawambye Besusemesi, ne Ayalooni, ne Gederosi, ne Soko, ne Timuna, ne Gimuzo nʼebyalo ebyali byetoolodde ebibuga ebyo, era ngʼomwo mwe babeera.

¹⁹Mukama yakkakkanya nnyo Yuda olwʼebibi nʼobutali bwesigwa bwa Akazi kabaka wa Isirayiri eri Mukama, Akazi bye yakola mu Yuda.

²⁰Tigulasupireseri kabaka wʼe Bwasuli nʼajja gyʼali, nʼamucocca mu kifo ekyʼokumuyamba.

²¹Akazi nʼaggya ebimu ku bintu ebyali mu yeekaalu ya Mukama, ne ku ebyo ebyali mu lubiri lwa kabaka, ne ku bya balangira nʼabiwa kabaka wʼe Bwasuli; naye ekyo ne kitamuyamba.

²²Mu kiseera ekyo kabaka Akazi we yalabira ennyo ennaku, yeeyongera obutaba mwesigwa eri Mukama.

²³Nʼawangayo ssaddaaka eri bakatonda bʼe Ddamasiko, abaali bamuwangudde, kubanga yalowooza nti, “Engeri bakatonda ba bakabaka bʼe Busuuli bwe babayambye, nnaawaayo ssaddaaka gye bali, nange bannyambe.” Naye okwo kwe kwali okuzikirira kwe nʼokwa Isirayiri yenna.

²⁴Akazi nʼakuŋŋaanya ebintu ebyʼomu yeekaalu ya Katonda, nʼabiggyamu, nʼaggalawo enzigi za yeekaalu ya Mukama, ne yeezimbira ebyoto mu buli nsonda mu Yerusaalemi.

²⁵Mu buli kibuga kya Yuda nʼazimbamu ebifo ebigulumivu okuwerangayo ssaddaaka eri bakatonda abalala, nʼasunguwaza Mukama Katonda wa bajjajjaabe.

²⁶ⓡ Ebyafaayo ebirala ebyʼomu mulembe gwe nʼempisa ze zonna, okuva ku ntandikwa okutuusa ku nkomerero, byawandiikibwa mu kitabo kya bassekabaka ba Yuda ne Isirayiri.

²⁷Akazi nʼafa nʼaziikibwa mu kibuga kya Yerusaalemi, naye si mu masiro ga bassekabaka ba Isirayiri. Keezeekiya mutabani we nʼamusikira.