2 Ebyomumirembe 29:1-36 LGCB2014 - Bible AI

¹ⓢ Keezeekiya yali wa myaka amakumi abiri mu etaano bwe yalya obwakabaka; nʼafugira emyaka amakumi abiri mu mwenda mu Yerusaalemi. Nnyina ye yali Abiya muwala wa Zekkaliya.

²Keezeekiya nʼakola ebirungi mu maaso ga Mukama, nga jjajjaawe Dawudi bwe yakola.

³Mu mwaka gwe ogwasooka, mu mwezi ogwʼolubereberye, nʼaggulawo enzigi za yeekaalu ya Mukama, nʼaziddaabiriza.

⁴Nʼayingiza bakabona nʼAbaleevi, nʼabakuŋŋaanyiza mu luggya olugazi ku luuyi olwʼebuvanjuba,

⁵nʼabagamba nti, “Mumpulirize Abaleevi, kaakano mwetukuze, ate mutukuze ne yeekaalu ya Mukama Katonda wa bajjajjammwe, muggye buli kitali kirongoofu mu watukuvu.

⁶ⓣ Bajjajjaffe baayonoona, ne bakola ebitali birungi mu maaso ga Mukama Katonda waffe ne bamuvaako. Baggya amaaso gaabwe ku kifo Mukama gyʼabeera, ne bamukuba amabega.

⁷Baggalawo nʼenzigi ezʼekisasi ne bazikiza nʼettabaaza, so tebootereza bubaane wadde okuwaayo ebiweebwayo ebyokebwa mu watukuvu eri Katonda wa Isirayiri.

⁸Obusungu bwa Mukama kyebwava bukka ku Yuda ne ku Yerusaalemi, era abafudde ekikangabwa, nʼekisekererwa era ekinyoomebwa, nga bwe mulaba nʼamaaso gammwe.

⁹Bajjajjaffe kyebaava bagwa nʼekitala, ate batabani baffe, ne bawala baffe ne bakyala baffe bo ne batwalibwa mu busibe.

¹⁰Kaakano mmaliridde mu mutima gwange okukola endagaano ne Mukama, Katonda wa Isirayiri obusungu bwe obwʼamaanyi butuveeko.

¹¹ⓤ Batabani bange temuddangayo kulagajjala nate, kubanga Mukama abalonze okuyimiriranga mu maaso ge okumuweerezanga, nʼokumwoterezanga obubaane.”

¹²Awo Abaleevi ne batandika okukola era baali: ne Yoweeri mutabani wa Azaliya abʼomu lulyo lwa Bakokasi, ne Kiisi mutabani wa Abudi, ne Azaliya mutabani wa Yekalereri abʼomu lulyo lwa Merali, ne Yowa mutabani wa Zimma, ne Adeni mutabani wa Yowa abʼomu lulyo lwa Bagerusoni,

¹²Makasi mutabani wa Amasayi,

¹³ne Simuli ne Yeweri ne Zekkaliya ne Mattaniya, bazzukulu ba Asafu,

¹³bazzukulu ba Erizafani,

¹⁴ne Yekweri ne Simeeyi, ne Semaaya ne Wuziyeeri bazzukulu ba Yedusuni.

¹⁴bazzukulu ba Kemani,

¹⁵Ne bakuŋŋaanya baganda baabwe, ne beetukuza bo bennyini, nʼoluvannyuma ne bayingira okutukuza yeekaalu ya Mukama nga kabaka bwe yali alagidde, ngʼagoberera ebigambo bya Mukama.

¹⁶Bakabona ne bayingira mu watukuvu wa Mukama ne batukuzaamu. Ne bafulumya ebitaali birongoofu byonna ebyasangibwa mu yeekaalu ya Mukama ne babiteeka mu luggya lwa yeekaalu ya Mukama, Abaleevi ne babitwala ebweru mu Kiwonvu Kiduloni.

¹⁷Okutukuza ne kutandika ku lunaku olusooka mu mwezi ogwʼolubereberye; ku lunaku olwʼomunaana mu mwezi ogwo ne batuuka ku kisasi kya Mukama. Ne bamala ennaku munaana nga batukuza yeekaalu ya Mukama; ku lunaku olwʼekkumi nʼomukaaga olwʼomwezi ogwʼolubereberye ne bamaliriza.

¹⁸Awo ne bagenda eri kabaka Keezeekiya ne bamutegeeza nti, “Tutukuzizza yeekaalu ya Mukama yonna, ekyoto ekyʼokuweerayo ebiweebwayo ebyokebwa nʼebintu byakwo byonna, nʼemmeeza eyʼemigaati egyʼokulaga nʼebintu byakwo byonna.

¹⁹Nʼebintu byonna kabaka Akazi bye yaggyamu olwʼobutali bwesigwa bwe, tubiteeseteese ne tubitukuza, era laba biri mu maaso gʼekyoto kya Mukama.”

²⁰Awo bwe bwakya, enkeera kabaka Keezeekiya nʼakuŋŋaanya abakungu abʼomu kibuga, ne balaga mu yeekaalu ya Mukama.

²¹ⓥ Ne baleeta ente ennume musanvu, nʼendiga ennume musanvu, nʼendiga ento nga nnume musanvu, nʼembuzi ennume musanvu okuba ebiweebwayo olwʼekibi ku lwʼobwakabaka, ne ku lwa watukuvu, ne ku lwa Yuda. Nʼalyoka alagira bakabona, bazzukulu ba Alooni okubiweerayo ku kyoto kya Mukama.

²²ⓦ Awo ne batta ente ennume, bakabona ne baddira omusaayi ne bagumansira ku kyoto, oluvannyuma ne batta endiga ennume ne bamansira omusaayi gwazo ku kyoto, nʼoluvannyuma ne batta nʼendiga ento ne bamansira omusaayi gwazo ku kyoto.

²³Embuzi ennume ezaali ezʼekiweebwayo ku lwʼekibi ne zireetebwa mu maaso ga kabaka nʼekibiina, ne bazisaako emikono gyabwe,

²⁴ⓧ nʼoluvannyuma bakabona ne bazitta, ne bawaayo omusaayi gwazo ngʼekiweebwayo olwʼekibi ku kyoto, okutangiririra Isirayiri yenna, kubanga kabaka yali alagidde okuwaayo ekiweebwayo ekyokebwa nʼekiweebwayo olwʼekibi ku lwa Isirayiri yenna.

²⁵Nʼateeka Abaleevi mu yeekaalu ya Mukama nga balina ebitaasa, entongooli, nʼennanga, ngʼekiragiro kya Dawudi, ne Gaadi omulabi wa kabaka ne Nasani nnabbi bwe kyali; kubanga ekiragiro ekyo kyava eri Mukama ngʼayita mu bannabbi be.

²⁶Awo Abaleevi ne bayimirira nga bakutte ebivuga bya Dawudi, ne bakabona nga bakutte amakondeere.

²⁷Keezeekiya nʼalagira okuwaayo ssaddaaka eyʼekiweebwayo ekyokebwa ku kyoto. Era okuwaayo ekiweebwayo ekyokebwa bwe kwatandika, abayimbi nabo ne batandika okuyimbira Mukama, nʼamakondeere nʼebivuga ebirala ebya Dawudi kabaka wa Isirayiri nabyo ne bivuga.

²⁸Ekibiina kyonna ne basinza, abayimbi ne bayimba, nʼabamakondeere ne bagafuuwa, era ebyo byonna ne byongerwa okukolebwa okutuusa okuwaayo ssaddaaka eyʼekiweebwayo ekyokebwa bwe kwaggwa.

²⁹Awo okuwaayo ebiweebwayo bwe kwaggwa, kabaka nʼabo bonna abaaliwo ne bavuunama ne basinza.

³⁰Kabaka Keezeekiya nʼabakungu ne balagira Abaleevi okuyimba nga batendereza Mukama mu bigambo bya Dawudi nʼebya Asafu omulabi. Ne bayimba nga batendereza nʼessanyu, ne bavuunama ne basinza.

³¹Awo Keezeekiya nʼayogera nti, “Kaakano mwetukuzizza eri Mukama, musembere, muleete ssaddaaka nʼebiweebwayo ebyokwebaza mu yeekaalu ya Mukama.” Ekibiina ne kireeta ssaddaaka nʼebiweebwayo ebyʼokwebaza, nʼabo bonna abeesiimira ne baleeta ebiweebwayo ebyokebwa.

³²Omuwendo gwʼebiweebwayo ebyokebwa ekibiina gwe kyaleeta gwali ente ennume nsanvu, nʼendiga ennume kikumi, nʼendiga ento nga nnume ebikumi bibiri, ngʼebyo byonna bye byali ebiweebwayo ebyokebwa eri Mukama.

³³Nʼensolo ezatukuzibwa okuba ssaddaaka zaali ente ennume lukaaga, nʼendiga enkumi ssatu.

³⁴Wabula bakabona ne baba batono ne batayinza kubaaga biweebwayo ebyokebwa byonna, baganda baabwe Abaleevi ne babayambako okutuusa bakabona abalala bwe beetukuza; omulimu ne guggwa, kubanga Abaleevi baali beegendereza nnyo mu kwetukuza okusinga bakabona.

³⁵ⓨ Ebiweebwayo ebyokebwa bingi, wamu nʼamasavu agʼebiweebwayo olwʼemirembe, nʼebiweebwayo ebyokunywa ebyawerekerezebwa ku biweebwayo ebyokebwa.

³⁵Okuweereza mu yeekaalu ya Mukama ne kuzzibwawo.

³⁶Awo Keezeekiya nʼabantu bonna ne bajaguza olwʼekyo Katonda kye yali akoledde abantu be mu bbanga ettono ennyo.