2 Ebyomumirembe 3:1-17 LGCB2014 - Bible AI

¹ⓢ Awo Sulemaani nʼatandika okuzimba yeekaalu ya Mukama mu Yerusaalemi ku lusozi Moliya, Mukama gye yalabikira Dawudi kitaawe, ekifo Dawudi kye yali alonze ku gguuliro lya Olunaani Omuyebusi.

²Yatandika okugizimba mu mwezi ogwokubiri mu mwaka ogwokuna ogwʼobufuzi bwe.

³ⓣ Omusingi Sulemaani gwe yasima ogwa yeekaalu ya Katonda gwali obuwanvu mita amakumi abiri mu musanvu ngʼobugazi mita mwenda, mu kukozesa ebipimo okwʼedda.

⁴Ekisasi ekyali mu maaso ga yeekaalu kyali obuwanvu mita mwenda nʼobugazi nga kye kimu, nʼobugulumivu kyali mita mwenda. Munda mu yeekaalu nʼasiigamu ne zaabu ennongoofu.

⁵ⓤ Mu kisenge ekinene nʼassaamu embaawo ezʼemiberosi, ne munda waakyo nʼakisiiga ne zaabu ennongoofu, ate era nʼakitimba nʼenkindu nʼemikuufu.

⁶Nʼayonja yeekaalu nʼamayinja agʼomuwendo, ne zaabu gwe yakozesa yali zaabu owa Paluvayimu.

⁷ⓥ Ku myango, ne ku miryango, ne ku bisenge ne ku nzigi za yeekaalu, byonna nʼabisiigako zaabu; ate era nʼawoola ne bakerubi ku bisenge.

⁸Nʼazimba nʼEkifo Ekitukuvu Ennyo, ngʼobuwanvu kyenkanankana obugazi bwa yeekaalu, obuwanvu kyali mita mwenda nʼobugazi mita mwenda. Munda waakyo nʼasiigamu ttani amakumi abiri mu ssatu eza zaabu ennongoofu.

⁹Obuzito bwʼemisumaali bwali desimoolo mukaaga era nga gya zaabu.

¹⁰Mu Kifo Ekitukuvu Ennyo nʼabajjirayo bakerubi babiri nʼabasiiga ne zaabu.

¹¹Obugazi bwe biwaawaatiro bya bakerubi bwali mita mwenda, ngʼekimu obuwanvu bwakyo kiri mita bbiri ne desimoolo ssatu, nga kituuka ku kisenge kya yeekaalu, nʼekirala obuwanvu nga kiri mita bbiri ne desimoolo ssatu, nga kituuka ku kerubi omulala.

¹²Nʼekiwaawaatiro kya kerubi omulala kyali obuwanvu mita bbiri ne desimoolo ssatu nga kituuka ku ludda lwʼekisenge kya yeekaalu ekirala, nʼekiwaawaatiro ekirala obuwanvu nga kiri mita bbiri ne desimoolo ssatu, nga kituuka ku kerubi oli omulala.

¹³Obuwanvu bwʼebiwaawaatiro bya bakerubi bwali mita mwenda awamu, era baasimbibwa ku bigere byabwe, nga batunuuliraganye.

¹⁴Nʼakola olutimbe nga lulimu bbululu, effulungu, era nga lutwakaavu, ne bafuta ennungi nʼalukubako ebifaananyi bya bakerubi.

¹⁵Mu maaso ga yeekaalu yassaawo empagi bbiri, obuwanvu bwazo mita kkumi na mukaaga, nga buli emu ku zo eriko omutwe ogwenkana mita bbiri ne desimoolo ssatu.

¹⁶ⓦ Nʼakola emikuufu mu kifo ekyʼomunda awasinzirwa okwogera nʼagissa ku mitwe gyʼempagi, ate era nʼakola nʼamakomamawanga kikumi, nʼagateeka ku mikuufu egyo.

¹⁷Nʼasimba empagi mu maaso ga yeekaalu, emu ku luuyi olwʼebugwanjuba obwa ddyo, nʼendala ku luuyi olwʼebugwanjuba obwa kkono. Eyʼoku luuyi olwʼebugwanjuba obwa ddyo yagituuma Yakini[1], nʼeyo ku luuyi olwʼebugwanjuba obwa kkono nʼagituuma Bowaazi[2].