2 Ebyomumirembe 30:1-27 LGCB2014 - Bible AI

¹Awo Keezeekiya nʼaweereza obubaka eri Isirayiri yonna ne Yuda, nʼawandiikira ne Efulayimu ne Manase amabaluwa, ngʼabayita okujja e Yerusaalemi mu yeekaalu ya Mukama, okukwata Embaga eyʼOkuyitako eya Mukama Katonda wa Isirayiri.

²Kabaka nʼabakungu be, nʼekibiina kyonna mu Yerusaalemi baasalawo okukwata Embaga eyʼOkuyitako mu mwezi ogwokubiri;

³baali tebasobola kukwata mbaga eyo mu kiseera kyayo kubanga bakabona abaali beetukuzizza, baali batono ate nga nʼabantu tebanakuŋŋaanira mu Yerusaalemi.

⁴Enteekateeka eyo nʼerabika nga nnungi eri kabaka nʼekibiina kyonna.

⁵Ne basalawo okulangirira mu Isirayiri yenna, okuva e Beeruseba okutuuka e Ddaani, nga bategeeza abantu okujja e Yerusaalemi okukwata Embaga eyʼOkuyitako eya Mukama Katonda wa Isirayiri; baali batutte ebbanga nga tebagikwata ngʼekibiina ekinene ekyʼawamu, nga bwe kyawandiikibwa.

⁶Awo ababaka ne batwala amabaluwa mu Isirayiri yonna ne mu Yuda okuva ewa kabaka nʼabakungu be, ngʼekiragiro kya kabaka bwe kyali nti, “Abantu ba Isirayiri, mudde eri Mukama Katonda wa Ibulayimu, ne Isaaka, ne Isirayiri, Katonda alyoke adde gye muli, mmwe ekitundu ekisigaddewo, ekiwonye omukono gwa bakabaka bʼe Bwasuli.

⁷ⓩ Temuba nga bajjajjammwe ne baganda bammwe abataali beesigwa eri Mukama Katonda wa bajjajjaabwe nʼabafuula ekyelolerwa, nga bwe mulaba.

⁸So temuba ba nsingo nkakanyavu nga bajjajjammwe bwe baali, naye mukkakkane eri Mukama, mujje mu watukuvu we, we yatukuza emirembe gyonna, muweereze Mukama Katonda wammwe, obusungu bwe bubaveeko.

⁹ⓐ Bwe munadda eri Mukama, olwo ne baganda bammwe nʼabaana bammwe banaalaba ekisa mu maaso gʼabo abaabawamba, ne bakomawo mu nsi eno. Mukama Katonda wammwe wa kisa era ajjudde okusaasira, so taakyuse maaso ge, okubavaako bwe munadda gyali.”

¹⁰Ababaka ne bagenda mu buli kibuga mu nsi ya Efulayimu ne Manase, ne batuuka ne mu Zebbulooni, naye abasinga obungi ne babasekerera, ne babaduulira.

¹¹Kyokka abamu ku bantu abʼe Aseri, ne Manase ne Zebbulooni ne beetoowaza ne bagenda e Yerusaalemi.

¹²Ne mu Yuda, omukono gwa Katonda ne gukwata ku bantu ne bakkiriziganya ku ekyo kabaka nʼabakungu kye baalagira, nga bagoberera ekigambo kya Mukama.

¹³ⓑ Awo abantu bangi ne bakuŋŋaanira mu Yerusaalemi mu mwezi ogwokubiri okukwata Embaga eyʼEmigaati Egitali Mizimbulukuse.

¹⁴Ne baggyawo ebyoto ebyali mu Yerusaalemi, nʼebyoto byonna ebyʼokwoterezaako obubaane, ne babisuula mu Kiwonvu Kidulooni.

¹⁵Ne batta Endiga Ento eyʼEmbaga eyʼOkuyitako ku lunaku olwʼekkumi nʼennya olwʼomwezi ogwokubiri. Bakabona nʼAbaleevi ne baswala, ne beetukuza, ne baleeta ebiweebwayo ebyokebwa mu yeekaalu ya Mukama.

¹⁶Ne bayimirira mu bifo byabwe ngʼetteeka lya Musa omusajja wa Katonda bwe lyali libalagira. Bakabona ne bamansira omusaayi ogwabaweerezebwa Abaleevi.

¹⁷Bangi ku bo, baali tebeetukuzizza nga tebasobola kuwaayo ndiga zaabwe; Abaleevi kyebaava battira buli muntu ataali mulongoofu Endiga Ento eyʼEmbaga eyʼOkuyitako, okubatukuza eri Mukama.

¹⁸Newaakubadde ngʼabantu abasinga abaava mu Efulayimu, ne Manase, ne Isakaali, ne Zebbulooni baali tebeetukuzizza, baalya Embaga eyʼOkuyitako, ekyali tekikkiriziganya na biwandiike. Naye Keezeekiya nʼabasabira ngʼagamba nti, “Mukama omulungi asonyiwe buli muntu

¹⁹amaliridde mu mutima gwe okunoonya Katonda, Mukama Katonda wa bajjajjaabe, newaakubadde nga tabadde mulongoofu okusinziira ku mateeka gʼawatukuvu.”

²⁰Mukama nʼawulira okusaba kwa Keezeekiya, nʼatabazikiriza.

²¹Abayisirayiri abaali mu Yerusaalemi ne bakwata Embaga eyʼEmigaati Egitali Mizimbulukuse okumala ennaku musanvu nga bajjudde essanyu lingi; Abaleevi ne bakabona ne batenderezanga Mukama buli lunaku, nga bakuba nʼebivuga ebyʼokumutendereza.

²²Keezeekiya nʼayogera ebigambo ebyʼokugumya Abaleevi bonna abaalaga nga bategeera obuweereza bwa Mukama. Abantu ne balya emmere eyʼembaga okumala ennaku musanvu, ne bawaayo ssaddaaka ezʼebiweebwayo olwʼemirembe, ne batendereza Mukama Katonda wa bajjajjaabwe.

²³ⓒ Ekibiina kyonna ne bakkiriziganya okweyongerayo ennaku endala musanvu nga bali ku mbaga; bwe batyo ne bamala ennaku endala musanvu nga bajaguza.

²⁴Keezeekiya kabaka wa Yuda nʼawa ekibiina ente ennume nga nto lukumi nʼendiga kasanvu okuba ebiweebwayo, ne bakabona bangi nnyo ne beetukuza.

²⁵Ekibiina kyonna ekya Yuda, ne bakabona, nʼAbaleevi, nʼekibiina kyonna ekyava mu Isirayiri, nʼabagenyi abaali bavudde mu nsi ya Isirayiri, nʼabagenyi abaabeeranga mu Yuda ne bajaguliza wamu.

²⁶Ne waba essanyu lingi mu Yerusaalemi kubanga okuva mu biro bya Sulemaani mutabani wa Dawudi kabaka wa Isirayiri, waali tewabangawo kintu kifaanana bwe kityo mu Yerusaalemi.

²⁷ⓓ Awo bakabona nʼAbaleevi ne bayimirira ne basabira abantu omukisa, Katonda nʼabawulira; kubanga okusaba kwabwe kwatuuka mu kifo kye ekitukuvu gyʼabeera, mu ggulu.