2 Ebyomumirembe 31:1-21 LGCB2014 - Bible AI

¹ⓔ Ebyo byonna bwe byaggwa, Abayisirayiri bonna abaaliyo ne bagenda mu bibuga bya Yuda, ne baasaayasa amayinja agaasinzibwanga, ne bamenyaamenya nʼempagi za Baasera. Ne basaanyizaawo ddala ebifo ebigulumivu nʼebyoto ebyali mu Yuda, ne mu Benyamini, ne mu Efulayimu ne mu Manase. Awo Abayisirayiri bwe baamala okubisaanyaawo byonna, ne baddayo mu bibuga byabwe, ku butaka bwabwe.

²Keezeekiya nʼaddira bakabona nʼAbaleevi nʼabassa mu bibinja, buli omu ngʼobuweereza bwe bwali, oba kabona oba muleevi, okuwangayo ebiweebwayo ebyokebwa nʼebiweebwayo olwʼemirembe okuweerezanga, nʼokwebazanga, nʼokutenderezanga ku nzigi eza yeekaalu ya Mukama.

³Kabaka nʼawaayo ku byobugagga bwe ebiweebwayo ebyokebwa ebyʼenkya nʼebyʼakawungeezi, nʼebiweebwayo ebyokebwa ebya ssabbiiti, nʼebyʼemyezi egyakaboneka, nʼassaawo nʼembaga ezaalagirwa nga bwe kyawandiikibwa mu tteeka lya Mukama.

⁴ⓕ Nʼalagira abantu abaabeeranga mu Yerusaalemi okuwangayo omugabo nga bwe kyali kibagwanira eri bakabona nʼAbaleevi, nabo beeweerengayo ddala nga bwe kyalagirwa mu tteeka lya Mukama.

⁵Awo ekiragiro ekyo bwe kyabuna wonna, amangwago Abayisirayiri ne bawaayo ku bibala byabwe ebibereberye bingi ebyʼeŋŋaano, nʼebya wayini omusu, nʼebyʼamafuta, nʼebyʼomubisi gwʼenjuki ne ku ebyo byonna ebyava mu nnimiro. Ne baleeta bingi nnyo, ekitundu ekyʼekkumi ku buli kintu.

⁶ⓖ Abantu ba Isirayiri ne Yuda abaabeeranga mu bibuga bya Yuda, nabo ne baleeta ekimu ekyʼekkumi ku nte nʼendiga, nʼekimu ekyʼekkumi ekyʼebintu ebyatukuzibwa ebyayawulirwa Mukama Katonda waabwe, ne babituuma entuumo.

⁷Baatandika okutuuma ebintu ebyo entuumo mu mwezi ogwokusatu ne bamaliriza mu mwezi ogwʼomusanvu.

⁸Awo Keezeekiya nʼabakungu be, bwe bajja ne balaba entuumo ne beebaza Mukama, ne basabira nʼabantu be, Isirayiri, omukisa.

⁹Keezeekiya nʼabuuza bakabona nʼAbaleevi ebikwata ku ntuumu.

¹⁰Azaliya kabona asinga obukulu owʼomu nnyumba ya Zadooki nʼamuddamu nti, “Okuva abantu lwe baatandika okuleeta ebirabo byabwe mu yeekaalu ya Mukama, tubadde nʼebyokulya ebiwera nʼebirala ne bifikkawo, kubanga Mukama awadde abantu be omukisa, nʼebifisseewo bye bino obungi.”

¹¹Awo Keezeekiya nʼalagira bateeketeeke amaterekero mu yeekaalu ya Mukama, ne bagateekateeka.

¹²Ne balyoka baleeta ebirabo, ebintu ebyʼekimu ekyʼekkumi, nʼebintu ebyatukuzibwa. Konaniya Omuleevi ye yavunaanyizibwanga ebintu ebyo, ate nga Simeeyi muganda we ye mumyuka we.

¹³Yekyeri, ne Azaziya, ne Nakasi, ne Asakeri, ne Yerimosi, Yozabadi, ne Eryezi, ne Isumakiya, ne Makasi ne Benaya be baabayambangako. Konaniya ne Simeeyi muganda we, baalondebwa Kabaka Keezeekiya ne Azaliya omukungu omukulu eyavunaanyizibwanga yeekaalu ya Katonda.

¹⁴ⓗ Kole mutabani wa Imuna Omuleevi, omuggazi wʼomulyango ogwʼebuvanjuba, ye yavunaanyizibwanga ebyo bye baawangayo eri Katonda ku bwabwe awatali kuwalirizibwa, ngʼagabanyamu ebyatonebwanga eri Mukama, nʼebirabo ebyayawulibwanga.

¹⁵Edene, ne Miniyamini, ne Yesuwa, ne Semaaya, ne Amaliya ne Sekaniya, be baamuyambangako nʼobwesigwa mu bibuga bya bakabona okugabiranga bakabona bannaabwe ngʼebibinja byabwe bwe byali, abakulu nʼabato.

¹⁶Ate era baagabiranga nʼabalenzi abʼemyaka esatu nʼokukirawo abaali babalibbwa ngʼokuzaalibwa kwe mbala bwe kwalinga, abo bonna abayingiranga mu yeekaalu ya Mukama okutuukirizanga emirimu gyabwe nga bwe kyabagwaniranga, mu bibinja byabwe.

¹⁷Ne bagabiranga ne bakabona abaabalibwa ngʼenzaalwa mu kubala okwʼokuzaalibwa kwabwe bwe kwali, nʼAbaleevi abaali abʼemyaka amakumi abiri nʼokukirawo ne babagabira ngʼebyʼobuvunaanyizibwa bwabwe mu bibinja byabwe bwe byali.

¹⁸Omwo mwe mwali abaana abato, nʼabakyala, ne batabani baabwe, ne bawala baabwe ngʼebitundu byabwe bwe byali biwandiikiddwa mu byafaayo ebyʼokuzaalibwa. Ne babeera beesigwa mu kwekuuma nga batukuvu.

¹⁹ⓘ Bazzukulu ba Alooni, bakabona abaabeeranga ku ttaka okwalimibwanga, eryabanga eryʼebibuga byabwe, mu buli kibuga, buli musajja mu bo yaweebwa omugabo, nʼabo bonna abaali bawandiikiddwa mu byafaayo ebyʼokuzaalibwa kwʼAbaleevi, nabo ne bagabana.

²⁰Bwʼatyo Keezeekiya bwe yakola ne mu Yuda yonna, nʼakola ebirungi era ebituufu nʼobwesigwa mu maaso ga Mukama Katonda we.

²¹ⓙ Buli mulimu gwe yatandika mu buweereza mu yeekaalu ya Katonda, ngʼagoberera amateeka nʼebiragiro, yanoonyanga Katonda we, era nʼakolanga nʼomutima gwe gwonna, nʼalaba omukisa.