2 Ebyomumirembe 32:1-33 LGCB2014 - Bible AI

¹ⓚ Oluvannyuma lwʼebyo byonna Keezeekiya bye yakola nʼobwesigwa, Sennakeribu kabaka wʼe Bwasuli nʼalumba Yuda, nʼasiisira ebweru wʼebibuga ebiriko bbugwe, nʼalowooza mu mutima gwe okubyetwalira.

²Awo Keezeekiya bwe yalaba nga Sennakeribu azze, era ngʼamaliridde okulwana ne Yerusaalemi,

³nʼateesa nʼabakungu be nʼabasajja be abalwanyi abazira, ku kyʼokuziba enzizi ezaali ebweru wʼekibuga, era ne bakikola.

⁴ⓛ Ekibiina kinene ekyʼabantu ne kikuŋŋaana, ne baziba enzizi zonna nʼakagga akayita mu nsi, nga bagamba nti, “Lwaki bakabaka bʼe Bwasuli bajja ne basanga amazzi amangi bwe gatyo?”

⁵Nʼafuba nnyo nʼaddaabiriza ebitundu byonna ebya bbugwe ebyali bimenyese, nʼazimba nʼeminaala ku bbugwe, nʼanyweza nʼebigulumu ebyanywezanga ekibuga kya Dawudi. Nʼakozesa nʼebyokulwanyisa bingi nʼengabo nnyingi.

⁶Nʼalonda abaduumizi bʼeggye okukulembera abantu, ne babakuŋŋaanyiza gyʼali mu kifo ekigazi awali wankaaki wʼekibuga; nʼabagumya ngʼagamba nti,

⁷“Mube nʼamaanyi, mugume omwoyo. Temutya so temwelariikirira olwa kabaka wʼe Bwasuli nʼeggye lye eddene, kubanga waliwo eggye eririsinga eriri awamu naffe.

⁸Sennakeribu akozesa omukono ogwʼomubiri, naye ffe tulina Mukama Katonda waffe atulwanirira mu ntalo zaffe.” Abantu ne baguma omwoyo olwʼebigambo Keezeekiya kabaka wa Yuda bye yayogera.

⁹ⓜ Awo Sennakeribu kabaka wʼe Bwasuli nʼeggye lye lyonna bwe baali bakyali e Lakisi kye baali bazingizza, nʼatuma abakungu be e Yerusaalemi eri Keezeekiya kabaka wa Yuda, nʼeri abantu bonna aba Yuda abaaliyo, ngʼagamba nti,

¹⁰ⓝ “Bwʼati bwʼayogera Sennakeribu kabaka wʼe Bwasuli nti, ‘Mwesiga ki okusigala mu Yerusaalemi nga kizingiziddwa?

¹¹ⓞ Mulowooza nga Keezeekiya bwʼayogera nti, “Mukama Katonda waffe alitulokola mu mukono gwa kabaka wʼe Bwasuli,” abatalimba, nʼokwagala okubassa enjala nʼennyonta?

¹²ⓟ Keezeekiya si ye yaggyawo ebifo ebigulumivu nʼebyoto, nʼalagira Yuda ne Yerusaalemi ngʼagamba nti, “Munaasinzizanga mu maaso gʼekyoto kimu, era okwo kwe munaayoterezanga obubaane?”

¹³ⓠ Temumanyi, nze ne bajjajjange bye twakola amawanga gonna agʼomu nsi endala? Bakatonda abamawanga ago, baayinza okubawonya mu mukono gwange?

¹⁴Ani ku bakatonda abamawanga ago bajjajjange ge baazikiriza, eyayinza okubalokola mu mukono gwange? Katonda wammwe anaabawonya atya mu mukono gwange?

¹⁵ⓡ Kale nno, Keezeekiya aleme kubalimbalimba newaakubadde okubasendasenda mu nsonga eyo. Temumukkiriza, kubanga tewali katonda owʼeggwanga lyonna oba bwakabaka, eyayinza okulokola abantu be mu mukono gwange newaakubadde eyayinza okubalokola mu mukono gwa bajjajjange. Kale Katonda wammwe alibawonya atya mu mukono gwange?’”

¹⁶Abakungu ba Sennakeribu ne boogera bingi nnyo nʼokusingawo ku Mukama Katonda ne ku muddu we Keezeekiya.

¹⁷ⓢ Kabaka oyo nʼawandiika nʼamabaluwa agavuma Mukama Katonda wa Isirayiri, ngʼagamba nti, “Nga bakatonda abamawanga agʼensi bwe bataabawonya mu mukono gwange, bwʼatyo ne Katonda wa Keezeekiya bwʼataliwonya bantu be mu mukono gwange.”

¹⁸ⓣ Ne bakoowoola abantu ba Yerusaalemi abaali ku bbugwe mu lwʼEbbulaniya, nga babatiisatiisa baggweemu amaanyi, balyoke bawambe ekibuga.

¹⁹Ne boogera ku Katonda wa Yerusaalemi nga bwe baayogeranga ku bakatonda abamawanga amalala agʼomu nsi endala, abakolebwa abantu.

²⁰ⓤ Awo Kabaka Keezeekiya ne nnabbi Isaaya mutabani wa Amozi ne basaba nga bakaabira eri eggulu ku nsonga eyo.

²¹Mukama nʼatuma malayika, nʼatemaatema abasajja abalwanyi abazira abʼamaanyi bonna nʼabaduumizi, nʼabakungu mu nkambi ya kabaka wʼe Bwasuli. Sennakeribu nʼaddayo mu nsi ye ngʼensonyi zimukutte. Bwe yayingira mu yeekaalu ya katonda we, abamu ku batabani be ne bamutta nʼekitala.

²²Awo Mukama nʼalokola Keezeekiya nʼabantu ba Yerusaalemi mu mukono gwa Sennakeribu kabaka wʼe Bwasuli ne mu mukono gwʼabalabe baabwe bonna abalala. Nʼabaakuumanga enjuuyi zonna.

²³Bangi ne baleetera Mukama ebirabo e Yerusaalemi, ne Keezeekiya kabaka wa Yuda nʼafuna ebirabo ebyʼomuwendo omungi. Nʼokuva ku lunaku olwo nʼaweebwa ekitiibwa kinene mu mawanga gonna.

²⁴Mu biro ebyo, Keezeekiya nʼalwala nnyo kumpi nʼokufa. Nʼasaba Mukama amuwonye, nʼamuddamu nʼakabonero.

²⁵Naye Keezeekiya nʼateebaza ebyekisa ekya mukolerwa, olwʼamalala agaali mu ye. Obusungu bwa Mukama kyebwava bubuubuukira ku ye ne ku Yuda ne ku Yerusaalemi.

²⁶Oluvannyuma, Keezeekiya ne yeenenya amalala agaali mu ye, ku lulwe ne ku lwʼabantu abʼomu Yerusaalemi, ekiruyi kya Mukama ne butababuubuukirako mu mirembe gya Keezeekiya.

²⁷Keezeekiya yalina ebyʼobugagga bingi nnyo nʼekitiibwa, ne yeezimbira nʼamawanika agʼokukuumirangamu effeeza, ne zaabu, nʼamayinja agʼomuwendo omungi, nʼebyakaloosa, nʼengabo, nʼebintu ebyʼengeri zonna ebyʼomuwendo.

²⁸Nʼazimba nʼamaterekero agʼeŋŋaano, ne wayini, nʼamafuta; nʼazimba nʼebiraalo ebyʼebika byʼente byonna, nʼebifo ebyʼebisibo byʼendiga.

²⁹Ne yeezimbira ebibuga, ne yeefunira nʼebisibo nʼamagana mangi, kubanga Katonda yali amuwadde ebyʼobugagga bingi nnyo nnyini.

³⁰Keezeekiya, ye yaziba oluzzi olwa waggulu olwa Gikoni, amazzi nʼagaserengesa ku luuyi olwʼebugwanjuba olwʼekibuga kya Dawudi. Nʼalaba omukisa mu buli kye yakolanga.

³¹Naye mu bigambo ebyʼababaka abaatumibwa abakungu bʼe Babulooni okumubuuza ku byamagero ebyakolebwa mu nsi ye, Katonda nʼamugeza alyoke ategeere byonna ebyali mu mutima gwe.

³²Ebyafaayo ebirala ebyabaawo mu mirembe gya Keezeekiya, nʼebikolwa bye ebirungi ebyʼobunyiikivu, byawandiikibwa mu kwolesebwa kwa Isaaya nnabbi mutabani wa Amozi, mu kitabo kya bassekabaka ba Yuda ne Isirayiri.

³³Keezeekiya ne yeebakira wamu ne bajjajjaabe, nʼaziikibwa mu masiro ga bazzukulu ba Dawudi, era Yuda yonna, nʼabatuuze bonna aba Yerusaalemi ne bamukungubagira ne bamuwa ekitiibwa ne mu kufa kwe. Manase mutabani we nʼamusikira.