2 Ebyomumirembe 36:1-23 LGCB2014 - Bible AI

¹Awo abantu bʼensi eyo ne balonda Yekoyakaazi mutabani wa Yosiya, nʼasikira kitaawe mu Yerusaalemi.

²Yekoyakaazi yali wa myaka amakumi abiri mu esatu bwe yalya obwakabaka, nʼafugira mu Yerusaalemi emyezi esatu.

³Kabaka wʼe Misiri yamugoba ku ntebe eyʼobwakabaka mu Yerusaalemi, nʼasalira Yuda obusuulu obwa ttani ssatu nʼobutundu buna obwa ffeeza ne kilo amakumi asatu mu nnya eza zaabu.

⁴Kabaka wʼe Misiri nʼafuula Eriyakimu muganda wa Yekoyakaazi okuba kabaka wa Yuda ne Yerusaalemi, nʼakyusa nʼerinnya lye, nʼamutuuma Yekoyakimu, naye nʼatwala Yekoyakaazi muganda we nga musibe e Misiri.

⁵Yekoyakimu yali wa myaka amakumi abiri mu etaano bwe yalya obwakabaka, nʼafugira emyaka kkumi na gumu mu Yerusaalemi. Nʼakola ebitali bya butuukirivu mu maaso ga Mukama Katonda we.

⁶Awo lumu Nebukadduneeza kabaka wʼe Babulooni nʼamulumba, nʼamusiba mu masamba, nʼamutwala e Babulooni.

⁷Nebukadduneeza nʼatwala nʼebintu ebyali mu yeekaalu ya Mukama e Babulooni, nʼabiteeka mu ssabo lye.

⁸Ebyafaayo ebirala ebyabaawo ku mulembe gwa Yekoyakimu, ebyʼekivve bye yakola, ne byonna bye yavunaanibwa, byawandiikibwa mu kitabo kya bassekabaka ba Isirayiri ne Yuda. Yekoyakini mutabani we nʼamusikira.

⁹ⓥ Yekoyakini yali wa myaka munaana bwe yalya obwakabaka, nʼafugira emyezi esatu nʼennaku kkumi mu Yerusaalemi. Nʼakola ebitali bya butuukirivu mu maaso ga Mukama.

¹⁰ⓦ Awo omwaka bwe gwali nga gunaatera okuggwaako, kabaka Nebukadduneeza nʼamutumya, nʼaleetebwa e Babulooni nʼebintu byonna ebyʼomuwendo okuva mu yeekaalu ya Mukama. Nebukadduneeza nʼafuula Zeddekiya kitaawe omuto okuba kabaka wa Yuda ne Yerusaalemi.

¹¹Zeddekiya yali wa myaka amakumi abiri mu gumu bwe yalya obwakabaka, nʼafugira emyaka kkumi na gumu mu Yerusaalemi.

¹²Nʼakola ebitali bya butuukirivu mu maaso ga Mukama Katonda we, nʼateetoowaza mu maaso ga nnabbi Yeremiya, eyayogeranga ekigambo kya Mukama.

¹³Nʼajeemera ne kabaka Nebukadduneeza eyamulayiza mu maaso ga Katonda. Nʼakakanyaza ensingo ye nʼomutima gwe, nʼatakyuka kudda eri Mukama Katonda wa Isirayiri.

¹⁴Ate ne bakabona abakulu bonna nʼabantu, ne bataba beesigwa ne bagoberera ebyʼobukaafiiri ebyʼamawanga amalala, ne bagwagwawaza yeekaalu ya Mukama, gye yali atukuzizza mu Yerusaalemi.

¹⁵Awo Mukama Katonda wa bajjajjaabwe nʼayogera nabo ngʼayita mu babaka be, ngʼasaasira abantu be nʼekifo mu abeera.

¹⁶Naye ne baduuliranga ababaka ba Katonda, ne banyoomanga nʼebigambo bye, ne basekereranga bannabbi be, okutuusa obusungu bwa Katonda bwe bwabuubuukira ku bantu be awatali kubasaasira.

¹⁷Kyeyava aweereza kabaka wʼAbakaludaaya okubalumba, nʼatta nʼekitala abavubuka baabwe mu nnyumba awasinzizibwa, nʼatalekaawo muvubuka nʼomu newaakubadde abawala abato, newaakubadde abasajja abakulu wadde abakadde ennyo. Bonna Katonda yabawaayo mu mukono gwa Nebukadduneeza.

¹⁸Ne yeetikka ebintu ebinene nʼebitono byonna okuva mu yeekaalu ya Katonda, nʼebyʼobugagga ebyʼomu yeekaalu ya Mukama, nʼamawanika ga kabaka nʼabakungu be.

¹⁹Ne bookya yeekaalu ya Katonda ne bamenyaamenya ne bbugwe wa Yerusaalemi, ne bookya nʼembiri zonna, ne bazikiriza nʼebintu ebyʼomuwendo byonna.

²⁰Nʼabo abaawona ekitala, nʼabatwala mu buwaŋŋanguse e Babulooni, ne babeera baddu be nʼaba batabani be okutuusa ku kufuga kwʼobwakabaka bwʼObuperusi.

²¹Ensi nʼekuuma ssabbiiti zaayo, ekiseera kyonna kye yamala mu kubonaabona kwayo okutuusa emyaka ensanvu bwe gyagwako, ngʼekyo kituukiriza ekigambo Mukama kye yayogera mu Yeremiya.

²²Mu mwaka ogwʼolubereberye ogwa Kuulo kabaka wa Buperusi, Mukama nʼakoma ku mutima gwa Kuulo kabaka wa Buperusi ngʼekigambo Mukama kye yayogerera mu Yeremiya bwe kyali, okulangirira mu bwakabaka bwe bwonna, nʼokuwandiika nti,

²³“Bwʼatyo bwʼayogera Kuulo kabaka wa Buperusi nti, ‘Mukama Katonda wʼeggulu ampadde obwakabaka bwonna obwʼomu nsi, era annonze okumuzimbira yeekaalu e Yerusaalemi mu Yuda. Bwe wabaawo omuntu yenna mu mmwe owʼoku bantu be, Mukama Katonda abeere naye, ayambuke.’ ”