2 Ebyomumirembe 4:1-22 LGCB2014 - Bible AI

¹ⓧ Yazimba ekyoto ekyʼekikomo, obuwanvu bwakyo mita mwenda, nʼobugazi bwakyo mita mwenda, ngʼobugulumivu bwakyo mita nnya ne kitundu.

²ⓨ Nʼakola Ennyanja ensaanuuse, nga neekulungirivu, nga ya mita nnya ne kitundu okuva ku mugo okutuuka ku mugo, ngʼobugulumivu eri mita bbiri ne desimoolo ssatu, ate ngʼobwetooloovu eri mita kkumi na ssatu ne kitundu.

³Wansi waakyo waaliyo ebifaananyi byʼente ennume nga mumbe, nga buli emu eri kitundu kya mita obuwanvu, era nga zikyetoolodde. Ebifaananyi byasaanuusibwanga mu nnyiriri bbiri bbiri, ekidiba bwe kyasaanuusibwanga.

⁴ⓩ Ennyanja yatuulanga ku bifaananyi byʼente ennume kkumi na bbiri, essatu nga zitunuulira obukiikakkono, nʼessatu endala nga zitunuulira ebugwanjuba, nʼessatu endala nga zitunuulira obukiikaddyo, nʼessatu endala nga zitunuulira ebuvanjuba. Ennyanja yatuulanga ku zo waggulu, nʼamagulu gaazo agʼemabega nga gatunudde munda, wakati waayo.

⁵Obukwafu bwayo bwali nga luta, nʼomugo gwayo ngʼomugo gwʼekikopo, nʼokufaanana ngʼefaanana ngʼekimuli kyʼamalanga. Yatekebwangamu lita emitwalo mukaaga.

⁶ⓐ Nʼakolayo ne bensani kkumi ezʼokwolezangamu, etaano nʼazissa ku luuyi olwʼobukiikaddyo, nʼettaano endala nʼazissa ku luuyi olwʼobukiikakkono. Omwo mwe mwanyumungulizibwanga ebintu ebyakozesebwanga mu kiseera ekyʼokuwaayo ebiweebwayo ebyokebwa, naye ngʼEnnyanja ya bakabona okuginaabirangamu.

⁷Nʼakola ebikondo ebyʼettaala ezʼomukono kkumi nga bya zaabu, ngʼekiragiro kyabyo bwe kyali, nʼabiteeka mu yeekaalu, ebitaano ku luuyi olwʼobukiikaddyo, nʼebitaano ebirala ku luuyi olwʼobukiikakkono.

⁸Nʼakola nʼemmeeza kkumi, nʼaziteeka mu yeekaalu, etaano ku luuyi olwʼobukiikaddyo, nʼetaano endala ku luuyi olwʼobukiikakkono. Nʼakola ne bbakuli ezikozesebwa okumansira kkumi nga za zaabu.

⁹ⓑ Nʼakola oluggya lwa bakabona, nʼoluggya olunene ddala, nʼenzigi ezʼoluggya, nʼenzigi nʼazisaaba nʼekikomo.

¹⁰Ennyanja nʼagiteeka ku luuyi olwʼobukiikaddyo obwʼebuvanjuba mu yeekaalu.

¹¹ⓒ Nʼakola nʼensuwa, nʼebisena, ne bbakuli. Awo Kulamu nʼamaliriza omulimu ogwali gumuwereddwa kabaka Sulemaani ku yeekaalu ya Katonda:

¹²empagi bbiri, nʼemitwe egifaanana ngʼebakuli ku mitwe gyʼempagi, nʼebitimba bya mirundi ebiri nga bibeera ku mitwe egyali ku mpagi,

¹³nʼamakomamawanga ebikumi bina obwʼebitimba biri ebibiri, buli kitimba nga kirina ennyiriri bbiri ezʼamakomamawanga, nga zitimbye emitwe gye mpagi.

¹³

¹⁴Nʼakola nʼebiyimirirwako, nʼamabensani gaakwo,

¹⁴

¹⁵nʼEnnyanja nʼebifaananyi byʼente ennume emumbe,

¹⁵

¹⁶ⓓ nʼensuwa, nʼebisena, nʼewuuma ezʼennyama, nʼebintu byonna ebigenderako.

¹⁷Ebintu byonna Kulamu bye yakolera Kabaka Sulemaani ku lwa yeekaalu ya Mukama yabizigula nʼekikomo. Mu lusenyi lwa Yoludaani, kabaka gye yabisaanuusiza awali ettaka eryʼebbumba wakati wa Sukkosi ne Zereda.

¹⁸Sulemaani nʼakola ebintu ebyo byonna nga bingi nnyo nnyini, nʼobuzito bwʼekikomo mwe byakolebwa ne butamanyibwa.

¹⁹Sulemaani nʼakola ebintu byonna ebyole mu yeekaalu ya Katonda: ekyoto ekya zaabu, nʼemmeeza okwabanga emigaati egyʼokulaga,

²⁰ⓔ nʼebikondo ebyʼettaala ezʼomukono nga bya zaabu, wamu ne ttaala zaabyo, okwakiranga mu maaso gʼawaayimirirwanga okwogera, ngʼekiragiro bwe kyali,

²⁰

²¹nʼebimuli, ne ttaala, ne wuuma nga byonna zaabu ntuukirivu,

²¹

²²nʼebisalako ebisirinza, ne bensani, ne bbakuli ezʼokumansira akaloosa, ne fulampeni nga bya zaabu ennongoose, nʼenzigi za yeekaalu, nʼenzigi ezʼomunda mu Kifo Ekitukuvu Ennyo, nʼenzigi ezʼekisenge ekinene, nga byonna bya zaabu.