2 Ebyomumirembe 6:1-42 LGCB2014 - Bible AI

¹ⓛ Mu kiseera ekyo Sulemaani nʼayogera nti, “Mukama eyagamba nti Alituula mu kizikiza ekikutte;

²Nkuzimbidde yeekaalu eyʼekitiibwa, ekifo kyʼonoobeerangamu emirembe gyonna.”

³Awo kabaka nʼakyuka nʼatunuulira ekibiina kyonna ekya Isirayiri ekyali kiyimiridde awo, nʼabasabira omukisa.

⁴Nʼayogera nti,

⁴“Yeebazibwe Mukama Katonda wa Isirayiri, atuukiriza nʼomukono gwe ekyo kye yasuubiza nʼakamwa ke eri Dawudi kitange, ngʼagamba nti,

⁵‘Okuva ku lunaku lwe naggya abantu bange mu nsi yʼe Misiri, tewali kibuga kye nnalonda mu bika byonna ebya Isirayiri okuzimba mu eyeekaalu olwʼerinnya lyange, wadde omuntu yenna okuba omukulembeze wʼabantu bange Isirayiri.

⁶Naye kaakano nnonze Yerusaalemi okubeeramu Erinnya lyange, era nnonze Dawudi okufuga abantu bange Isirayiri.’ ”

⁷“Kitange Dawudi yali akiteeseteese mu mutima gwe okuzimbira Erinnya lya Mukama Katonda wa Isirayiri eyeekaalu.

⁸Naye Mukama nʼagamba kitange Dawudi nti, ‘Newaakubadde nga kyali mu mutima gwo okuzimbira Erinnya lyange eyeekaalu, era wakola bulungi okuba nakyo mu mutima gwo,

⁹naye si ggwe olizimba yeekaalu eyo, wabula mutabani wo, owʼomubiri gwo nʼomusaayi gwo; yʼalizimbira Erinnya lyange eyeekaalu.’ ”

¹⁰“Kaakano, Mukama atuukirizza kye yasuubiza. Nsikidde Dawudi kitange, era ntudde ku ntebe eyʼobwakabaka bwa Isirayiri, nga Mukama bwe yasuubiza, era nzimbidde Erinnya lya Mukama Katonda wa Isirayiri eyeekaalu.

¹¹Era omwo mwe ntadde essanduuko, omuli endagaano eya Mukama ggye yakola nʼabantu ba Isirayiri.”

¹²Awo Sulemaani nʼayimirira mu maaso gʼekyoto kya Mukama mu maaso gʼekibiina kyonna ekya Isirayiri, nʼayimusa emikono gye.

¹³Yali akoze ekituuti ekyʼekikomo, ekyali mita bbiri ne desimoolo ssatu obuwanvu nʼobugazi mita bbiri ne desimoolo ssatu, nʼobugulumivu mita emu ne desimoolo ssatu, era ngʼakitadde wakati mu luggya olwʼebweru era kye yali ayimiriddeko. Nʼafukamira mu maaso gʼekibiina kyonna ekya Isirayiri, nʼayimusa emikono gye eri eggulu.

¹⁴Nʼayogera nti,

¹⁴“Ayi Mukama Katonda wa Isirayiri tewali Katonda akufaanana mu ggulu newaakubadde ku nsi, atuukiriza endagaano ye eyʼokwagala eri abaddu be abatambulira mu maaso ge nʼemitima gyabwe gyonna.

¹⁵Otuukirizza ekyo kye wasuubiza omuddu wo Dawudi kitange, kubanga wasuubiza nʼakamwa ko, era okituukirizza nʼomukono gwo leero.”

¹⁶ⓜ “Kaakano Ayi Mukama Katonda wa Isirayiri, tuukiriza ebyo bye wasuubiza Dawudi kitange bwe wayogera nti, ‘Tolirema kufuna musika mu maaso gange kutuula ku ntebe eyʼobwakabaka bwa Isirayiri, abʼezzadde lyo bwe baneegenderezanga okutambuliranga mu maaso gange ngʼetteeka lyange bwe liri, nga ggwe bwʼotambulidde mu maaso gange.’

¹⁷Kale nno, Ayi Mukama Katonda wa Isirayiri ekigambo kyo kye wasuubiza Dawudi omuddu wo kituukirire.”

¹⁸ⓝ “Naye ddala Katonda alituula nʼabantu ku nsi? Laba, eggulu nʼeggulu erisinga okuba erya waggulu toligyamu, kale ate olwo yeekaalu gye nzimbye gyʼoyinza okugyamu?

¹⁹Wuliriza okusaba kwʼomuddu wo nʼokwegayirira kwe, Ayi Mukama Katonda wange, owulire okusaba kwʼomuddu wo kwasaba gyʼoli.

²⁰ⓞ Amaaso go gatunuulirenga eyeekaalu eno emisana nʼekiro, ekifo kye wayogerako nti oliteeka omwo Erinnya lyo, era owulire okusaba kwʼomuddu wo eri ekifo kino.

²¹ⓟ Wulira kaakano okwegayirira kwʼomuddu wo nʼokwʼabantu bo Isirayiri, bwe banaabanga basaba nga batunuulidde ekifo kino; owulirenga okuva mu kifo eyo gyʼobeera, era bwʼowuliranga, osonyiwenga.”

²²“Omuntu bwʼanaayonoonanga ku muliraanwa we, ne kimugwanira okulayira, era nʼajja nʼalayira mu maaso gʼekyoto mu yeekaalu eno,

²³ⓠ owulirenga okuva mu ggulu, obeeko kyʼokola. Osalenga omusango wakati wʼabaddu bo osasulenga gwe gusinze, ngʼebikolwa bye bwe bimusaanira. Oyatulenga atalina musango, era omusasulenga ngʼobutuukirivu bwe, bwe bunaabanga.”

²⁴“Abantu bo Isirayiri bwe banaabanga bawanguddwa omulabe olwʼobutali butuukirivu bwabwe, naye ne bakyuka ne baatula erinnya lyo, ne basaba ne beegayiririra mu maaso go mu yeekaalu eno,

²⁵kale owulirenga ngʼosinziira mu ggulu, osonyiwe ekibi kyʼabantu bo Isirayiri era obakomyewo mu nsi gye wabawa bo ne bajjajjaabwe.”

²⁶“Eggulu bwe linaggalwangawo ne wataba nkuba, kubanga boonoonye gyʼoli, naye ne basaba nga batunuulidde ekifo kino, ne baatula erinnya lyo, ne bakyuka okuleka ekibi kyabwe ekibaweezesezza ekibonerezo,

²⁷kale owulirenga ngʼosinziira mu ggulu, osonyiwe ekibi kyʼabaddu bo, abantu bo Isirayiri, obayigirize ekkubo eggolokofu, lye bateekwa okutambulirangamu, era obaweereze enkuba ku nsi gye wawa abantu bo, obusika bwo.”

²⁸“Bwe wanaagwangawo enjala oba kawumpuli mu nsi, oba ne wabaawo okugengewala oba obukuku, oba enzige oba ebisaanyi, oba abalabe baabwe ne babazingiriza mu bibuga byabwe wadde ne bwʼanaabanga kawumpuli owʼengeri etya, oba bulwadde bwa ngeri ki,

²⁹ne wabaawo okusaba oba okwegayirira okwʼengeri zonna okukoleddwa omuntu yenna, oba abantu bo bonna Isirayiri, nga buli omu ategedde endwadde ye, nʼobuyinike bwe, era ngʼayanjulurizza engalo ze eri yeekaalu eno,

³⁰kale owulirenga ngʼosinziira mu ggulu gyʼobeera osonyiwe, era osasule buli muntu ngʼebikolwa bye bwe biri, kubanga ggwe wekka gwʼomanyi emitima gyʼabaana bʼabantu;

³¹ⓡ balyoke bakutyenga, era batambulirenga mu makubo go ennaku zonna ze banaabeeranga mu nsi gye wawa bajjajjaffe.”

³²“Era mu ngeri yʼemu, bwe wanaabangawo munnaggwanga atali wa ku bantu bo Isirayiri, ngʼava mu nsi eyʼewala, olwʼerinnya lyo ekkulu, nʼolwʼomukono gwo ogwʼamaanyi, nʼomukono gwo ogugoloddwa, bwʼanajjanga nʼasaba ngʼatunuulidde eyeekaalu eno,

³³kale owulirenga ngʼosinziira mu ggulu gyʼobeera, okolere omunnaggwanga oyo kyonna kyʼanaakusabanga; abantu bonna abʼomu nsi balyoke bamanye erinnya lyo era bakutye, ngʼabantu bo Isirayiri bwe bakola, era bategeere nti ennyumba eno gye nzimbye etuumiddwa Erinnya lyo.”

³⁴“Abantu bo bwe banaatabaalanga abalabe baabwe, yonna gyʼonoobasindikanga, ne basaba nga batunuulidde ekibuga kino kyʼolonze ne yeekaalu gye nzimbidde Erinnya lyo,

³⁵kale owulirenga okusaba kwabwe nʼokwegayirira kwabwe, ngʼosinziira mu ggulu, obaddiremu.”

³⁶ⓢ “Bwe banaakolanga ebisobyo, kubanga tewaliwo muntu atasobya, nʼobasunguwalira, nʼobawaayo eri omulabe, ne batwalibwa nga basibe mu nsi eyʼewala oba eyʼokumpi,

³⁷ⓣ oluvannyuma ne beenenya mu mutima nga bali mu nsi gye bali abasibe, ne bakwegayiririra mu nsi eyʼokusibibwa kwabwe nga boogera nti, ‘Twayonoona, twakola ebyʼobubambavu, era twagira ekyejo,’

³⁸era bwe beenenyanga nʼomutima gwabwe gwonna nʼemmeeme yaabwe yonna mu nsi eyʼokusibibwa kwabwe gye baatwalibwa, ne basaba nga batunuulidde ensi gye wawa bajjajjaabwe, nʼeri ekibuga kye walonda, nʼeri eyeekaalu gye nazimba ku lwʼErinnya lyo,

³⁹kale, owulirenga okusaba kwabwe nʼokwegayirira kwabwe, ngʼosinziira mu ggulu, ekifo gyʼobeera obaddiremu, era osonyiwe abantu bo abakwonoonye.”

⁴⁰ⓤ “Kaakano Katonda wange, amaaso go gazibukenga, nʼamatu go gawulirenga okusaba okunaaweerwangayo mu kifo kino.”

⁴¹ⓥ “Era kaakano, Ayi Mukama Katonda golokoka, okke mu kifo kyo ekyʼokuwummulirangamu, ggwe nʼessanduuko eyʼamaanyi go. Bakabona bo Ayi Mukama Katonda, bambazibwe obulokozi, era nʼabatukuvu bo basanyukire obulungi bwo.

⁴²ⓦ Ayi Mukama Katonda, tokyusa maaso go okuva ku oyo gwe wafukako amafuta. Ojjukire ekisa kye walaga Dawudi omuddu wo.”