2 Peetero 1:1-21 LGCB2014 - Bible AI

¹Nze Simooni Peetero omuddu era omutume wa Yesu Kristo mpandiikira abo abaafuna okukkiriza okwʼomuwendo nga ffe, mu butuukirivu bwa Katonda waffe era Omulokozi waffe Yesu Kristo,

²ekisa nʼemirembe byeyongerenga mu mmwe nga mutegeera Katonda ne Yesu Mukama waffe.

³Kubanga mu maanyi gʼobwakatonda bwe, mwetwaweerwa ebintu byonna olwʼobulamu buno nʼokutya Katonda mu kumanya oyo eyatuyita olwʼekitiibwa kye nʼobulungi bwe ye.

⁴Ebyo bye byatuweesa ebisuubizo ebyʼomuwendo ebikulu, mu byo mulyoke mugabanire awamu obuzaaliranwa bwʼobwakatonda, muwone okuzikirira okuva mu kwegomba okubi okwʼomu nsi.

⁵Noolwekyo mufubenga nnyo, okukkiriza kwammwe mukwongereko obulungi, ne ku bulungi mwongereko okutegeera,

⁶ne ku kutegeera mwongereko okwefuganga, ne ku kwefuganga mwongereko obugumiikiriza, ne ku bugumiikiriza mwongereko okutya Katonda,

⁷ne ku kutya Katonda mwongereko okufaayo ku booluganda abalala bonna ne ku kufaayo ku booluganda bonna abalala mwongereko okwagalananga.

⁸Kubanga bwe muba nʼebyo ne byeyongera obungi, bibafuula ba mugaso era ababala ebibala olwʼokutegeera Mukama waffe Yesu Kristo.

⁹Oyo atalina ebyo muzibe wa maaso era awunaawuna, era yeerabidde bwe yanaazibwako ebibi bye ebyʼedda.

¹⁰Kale, abooluganda mweyongerenga okunywerera mu kulondebwa kwammwe ne mu kuyitibwa kwammwe. Kubanga bwe munaakolanga bwe mutyo temulyesittala nʼomulundi nʼogumu.

¹¹Era mulyanirizibwa nʼessanyu lingi nnyo mu bwakabaka bwa Mukama waffe era Omulokozi waffe Yesu Kristo.

¹²Noolwekyo, ebyo nzija kubibajjukizanga buli kiseera, newaakubadde nga mubimanyi, era nga ddala munyweredde mu mazima ge mwategeera.

¹³Era ndowooza nti Kiŋŋwanira nga nkyali mu mubiri guno, okubakubirizanga nga nneeyongera okubibajjukiza.

¹⁴Kubanga mmanyi nga nnaatera okuva mu mubiri guno, nga Mukama waffe Yesu Kristo bwe yantegeeza.

¹⁵Kyenva nfuba ennyo okukola kyonna kye nsobola, ne bwe ndivaawo mube ngʼebyo byonna mubijjukira.

¹⁶Kubanga tetwagoberera ngero bugero ezaagunjibwa wabula twabategeeza ebyo bye twalabirako ddala, ebyʼamaanyi nʼokukomawo kwa Mukama waffe Yesu Kristo, era nʼobukulu bwe.

¹⁷Kubanga Katonda Kitaffe yamuwa ekitiibwa nʼettendo, eddoboozi bwe lyawulikika okuva mu ggulu mu kitiibwa ekingi ekimasamasa nti, ⓐ “Ono ye Mwana wange omwagalwa gwe nsanyukira ennyo.”

¹⁸Ffe bwe twali awamu naye ku lusozi olutukuvu, twawulirira ddala eddoboozi eryo eryava mu ggulu.

¹⁹Kyetuvudde tweyongera okukakasa ebyo bannabbi bye baategeeza, era bwe munaabigonderanga munaabanga mukoze bulungi. Kubanga biri ngʼettaala eyaka mu kizikiza okutuusa obudde lwe bukya, emunyeenye eyʼenkya nʼeryoka eyaka mu mitima gyammwe.

²⁰Okusooka mukimanye nga buli bunnabbi obuli mu byawandiikibwa, tewali ayinza kubunnyonnyola ku bubwe yekka.

²¹Kubanga bannabbi tebaayogeranga byabwe ku bwabwe, wabula baategeezanga ebyo Katonda bye yabalagiranga nga Mwoyo Mutukuvu bwe yabibawanga.