2 Peetero 2:1-22 LGCB2014 - Bible AI

¹Naye waaliwo ne bannabbi abʼobulimba mu bantu, era nga bwe walibaawo abayigiriza abʼobulimba mu mmwe. Baliyingiza mu nkiso enjigiriza enkyamu etwala abantu mu kuzikirira. Balyegaana ne Mukama waffe, ne beereetako okuzikirira okwa mangu.

²Abantu bangi baligoberera empisa zaabwe ezʼobukaba ne bavumaganyisa ekkubo eryʼamazima;

³balibafunamu amagoba mangi nga bakozesa ebigambo ebyʼobulimba olwʼomululu gwabwe. Abo Katonda yabasalira dda omusango era nʼokuzikirizibwa kwabwe tekubuusibwabuusibwa.

⁴Katonda teyasaasira bamalayika abaayonoona, wabula yabasuula mu lukonko oluwanvu olujjudde ekizikiza, gye bali, nga basibiddwa mu njegere nga balindirira olunaku olwʼokusalirwako omusango.

⁵Nʼensi eyʼedda teyagisaasira, nʼaleeta amataba ku nsi okuzikiriza abo abataamutya, nʼalokolako Nuuwa eyabuulira obutuukirivu wamu nʼabalala musanvu.

⁶Era yasalira omusango abaali mu bibuga byʼe Sodomu nʼe Ggomola bwe yabazikiriza, ne bisirikka mu muliro, bwʼatyo nʼalaga ebyo ebigenda okutuuka ku buli atatya Katonda.

⁷Kyokka nʼawonya Lutti, omutuukirivu, eyalumwanga ennyo olwʼobulamu obwʼabantu abo abajeemu.

⁸Olwʼokubanga yababeerangamu, buli lunaku, yalabanga era nʼawuliranga ebikolwa ebyʼobujeemu bye baakolanga, ekyo ne kimuleetera okunyolwa mu mwoyo gwe omutuukirivu.

⁹Mukama amanyi okuwonya nʼokuggya mu kugezesebwa abamutya, nʼabonereza abatali bakkiriza okutuusa ku lunaku olwʼokusalirako omusango,

¹⁰nʼokusingira ddala abo abagoberera okwegomba kwabwe okwʼomubiri ne banyooma abakulembeze baabwe.

¹⁰Tebaliiko kye batya, beerowoozaako bokka, era tebakwatibwa na nsonyi kuvuma baakitiibwa.

¹¹Kyokka bo bamalayika newaakubadde be basinga abayigiriza abo amaanyi nʼobuyinza, bwe batwala ensonga ezo eri Mukama waffe tebakozesa lulimi luvuma.

¹²Abantu bali bavuma ne bye batategeera, bali ngʼensolo obusolo ezitaliimu magezi ezikwatibwa okuttibwa ne zizikirizibwa; era nabo okufaanana ngʼensolo ezo, bagenda kuzikirizibwa.

¹³Abantu abo bagenda kubonerezebwa olwʼebibi bye bakola. Kubanga buli lunaku bagoberera okwegomba kwabwe olwʼokwesanyusa, era abantu abo bakwasa mmwe ensonyi era babaswaza bwe beegatta nammwe mu mbaga zammwe, nga bakola effujjo mu masanyu gaabwe.

¹⁴Balina amaaso agajjude obukaba, tebalekaayo kukola kibi buli kiseera boonoona era basendasenda abatali banywevu, bajjudde omululu. Baana abaakolimirwa,

¹⁵abaakyama ne bava mu kkubo okufaanana nga Balamu mutabani wa Beyoli, eyayagala empeera eyʼobutali butuukirivu.

¹⁶Kyokka endogoyi etayogera, Katonda bwe yagyogeza nʼemumanya olwʼobujeemu bwe nʼeziyiza eddalu lya nnabbi oyo.

¹⁷Abantu abo nzizi ezitaliimu mazzi. Bali ngʼebire ebitwalibwa embuyaga, era baterekeddwa ekifo ekyʼekizikiza ekikutte be zigizigi.

¹⁸Boogera ebigambo ebyʼokwekuluntaza era ebitaliimu nsa. Mu kwegomba kwʼomubiri ne mu bukaba bwabwe basendasenda abo abali okumpi nʼokubadduka abakyatambulira mu kibi.

¹⁹Babasuubiza eddembe, so nga bo bennyini baddu ba bikolwa ebibi ebyʼokuzikirira. Kubanga omuntu afuuka muddu wʼekyo ekimufuga.

²⁰Era abantu bwe bategeera Mukama waffe era Omulokozi waffe Yesu Kristo, ne badduka okuva mu bintu ebyo ebyʼensi ebyonoona era ebitwala abantu mu kuzikirira, ate ne bava awo ne babiddamu, bibasibira ddala era obulamu bwabwe bufuuka bubi nnyo okusinga bwe bwali okusooka.

²¹Ekyandisinze be bantu abo obutategeerera ddala kkubo lya Mukama waffe eryʼobutuukirivu, eriggya abantu mu kuzikirira, okusinga lwe bamala okulitegeera, ate ne bava ku biragiro ebitukuvu bye baaweebwa.

²²Olugero olwagerebwa kyeluva lutuukirira ku bo olugamba nti, ⓑ “Embwa eridde ebisesemye byayo,” na luno nti: “Embizzi eva okunaazibwa ezzeeyo okwekulukuunya mu bitosi.”