2 Peetero 3:1-18 LGCB2014 - Bible AI

¹Abaagalwa, eno yʼebbaluwa eyookubiri gye mbawandiikira. Mu bbaluwa zombi ngezezzaako okubakubiriza mutegeerere ddala ebyo ebituufu era ebisaana.

²Mujjukire ebyo ebyayogerwa bannabbi abatukuvu nʼekiragiro kya Mukama waffe era Omulokozi waffe ekyaweebwa abatume bammwe.

³Ekisooka, mutegeerere ddala nga mu nnaku ezʼoluvannyuma abantu abagoberera okwegomba kwʼomubiri gwabwe balijja mu mmwe nga babasekerera,

⁴nga bwe bagamba nti, “Eyasuubiza nti alijja, aluwa? Kubanga kasookedde bajjajjaffe bafa, ebintu byonna biri nga bwe byabanga okuva ensi lwe yatondebwa!”

⁵Beefuula abatamanyi nti Edda Katonda yalagira bulagizi, era olwʼekigambo eggulu nʼensi ne bitondebwa. Olwʼekigambo kya Katonda ensi yatondebwa ngʼeggyibwa mu mazzi era nʼebeera wakati wʼamazzi.

⁶Era olwʼekigambo ekyo ensi eyo eyʼedda, amazzi gaagisaanyaawo nʼezikirira.

⁷Era olwʼekigambo ekyo, eggulu nʼensi ebiriwo kaakano bikuumibwa nga birindiridde okwokebwa omuliro ku lunaku olwʼokusalirako omusango, nʼokuzikirizibwa kwʼabo abatatya Katonda.

⁸Naye, abooluganda, temusaana, kwerabira nti mu maaso ga Mukama emyaka olukumi giri ngʼolunaku olumu, era nʼolunaku olumu luli ngʼemyaka olukumi.[1]

⁹Mukama waffe taludde kutuukiriza ekyo kye yasuubiza ngʼabamu bwe balowooza. Wabula ye akyabagumiikiriza, nga tayagala muntu yenna kubula, naye bonna beenenye.

¹⁰Naye olunaku lwa Mukama waffe lulijja ngʼomubbi bwʼajja nga tewali nʼomu amanyi; eggulu lirivaawo nga liwuuma nnyo, nʼebiririko birizikirizibwa nʼomuliro, era ensi nʼebintu ebigirimu birisirikka.

¹¹Kale obanga ebintu byonna bya kuzikirizibwa, mugwanidde kubeeranga bantu ba mpisa ntukuvu era abatya Katonda,

¹²nga mulindirira era nga mwegomba nnyo olunaku lwa Katonda okutuuka, olunaku obwengula bwonna[2] bwe buryokebwa ne buzikirizirwa nʼebiburimu ne bisaanuuka ne bisirikka.

¹³Naye nga Katonda bwe yatusuubiza, tulindirira obwengula obuggya nʼensi empya omuli obutuukirivu.

¹⁴Kale, abaagalwa, nga bwe mulindirira ebintu ebyo okubaawo mufubenga nnyo okuba abalongoofu abataliiko kya kunenyezebwa nga mulina emirembe.

¹⁵Kyokka mulowoozenga ku kubonyaabonyezebwa okwʼobulokozi bwa Mukama waffe, nga ne muganda waffe omwagalwa Pawulo kye yabategeeza mu bbaluwa ze yabawandiikira mu magezi Katonda ge yamuwa.

¹⁶Weewaawo ebbaluwa ze zirimu bingi ebizibu okutegeera, kyokka buli lwʼawandiika aba ayogera ku nsonga ezo; wabula bo abatamanyi era abatali banywevu babinnyonnyola nga bwe bannyonnyola ebyawandiikibwa ebirala ne beereetako okuzikirira.

¹⁷Kale, mmwe abaagalwa, ebyo nga bwe mubitegedde, mwekuume muleme kukyamizibwa abantu abo abajeemu, si kulwa nga babaleetera okugwa ne muva we munyweredde.

¹⁸Mweyongere okukula mu kisa ne mu kutegeera Mukama waffe era Omulokozi waffe Yesu Kristo. Oyo aweebwenga ekitiibwa kaakano nʼemirembe gyonna. Amiina.