2 Samwiri 1:1-27 LGCB2014 - Bible AI

¹ⓐ Oluvannyuma lwʼokufa kwa Sawulo, Dawudi nʼagenda nʼabeera e Zikulagi nʼamalayo ennaku bbiri, ngʼamaze okusaanyaawo Abamaleki.

²Awo olwatuuka ku lunaku olwokusatu, ne wajja omusajja ngʼava mu lusiisira lwa Sawulo, ngʼayuzizza ebyambalo bye, nga ne mu mutwe gwe mulimu enfuufu. Bwe yatuuka awali Dawudi, nʼavuunama ngʼamuwa ekitiibwa.

³Dawudi nʼamubuuza nti, “Ova wa?” Nʼamuddamu nti, “Ndi kaawonawo okuva mu lusiisira lwa Isirayiri.”

⁴Dawudi nʼayogera nti, “Ntegeeza ebyabaddewo.” Nʼayogera nti, “Abantu badduse mu lutalo, era bangi ku bo bafudde. Sawulo ne Yonasaani mutabani we nabo bafudde.”

⁵Awo Dawudi nʼagamba omuvubuka eyamutegeeza amawulire ago nti, “Otegedde otya nga Sawulo ne mutabani we Yonasaani nabo bafudde?”

⁶Omuvubuka nʼamugamba nti, “Bwe nnali awo ku lusozi Girubowa, ne ndaba Sawulo nga yeesigamye ku ffumu lye era nʼamagaali nʼabeebagala embalaasi ebyʼomulabe nga bamucocca.

⁷Awo bwe yakyusa amaaso ge nʼandaba, nʼankowoola, ne muddamu nti, ‘Nkukolere ki?’

⁸Nʼambuuza nti, ‘Ggwe ani?’ Ne muddamu nti, ‘Ndi Mwamaleki.’

⁹Nʼalyoka aŋŋamba nti, ‘Nnyimirirako onzite! Ndi mu masaŋŋanzira agʼokufa newaakubadde nga ndabika ngʼakyalimu obulamu.’

¹⁰ⓑ Kyennava muyimirirako ne mutta, kubanga nʼategeera nga takyalamye. Ne ntwala engule eyali ku mutwe gwe nʼekikomo ekyali ku mukono gwe, era biibino mbireetedde mukama wange.”

¹¹Awo Dawudi nʼabasajja bonna be yali nabo, ne bayuza ebyambalo byabwe.

¹²Ne bakaaba, ne bakungubaga ne basiiba okutuusa akawungeezi ku lwa Sawulo ne Yonasaani mutabani we; ne ku lwʼeggye lya Mukama, ne ku lwʼennyumba ya Isirayiri; kubanga bonna baali bafudde nʼekitala.

¹³Awo Dawudi nʼagamba omuvubuka eyamutegeeza amawulire ago nti, “Ova wa?” Nʼaddamu nti, “Ndi mwana wa munnaggwanga, Omwameleki.”

¹⁴ⓒ Dawudi nʼamugamba nti, “Lwaki tewatya kuzikiriza omuntu Mukama gwe yafukako amafuta?”

¹⁵Awo Dawudi nʼayita omu ku basajja be, nʼamugamba nti, “Mutte.” Nʼamufumita nʼamutta.

¹⁶ⓓ Dawudi nʼamugamba nti, “Omusaayi gwo gubeere ku mutwe gwo, kubanga akamwa ko ye mujulirwa ngʼoyogera nti, ‘Nnatta oyo Mukama gwe yafukako amafuta.’ ”

¹⁷Dawudi nʼakungubagira Sawulo ne Yonasaani mutabani we,

¹⁸ⓔ nʼalagira abantu ba Isirayiri bayigirizibwe oluyimba olwʼomutego olwʼokukungubaga olwawandiikibwa mu kitabo kya Yasali. Olugamba nti,

¹⁹“Ekitiibwa kyo, ayi Isirayiri, kifiiridde ku nsozi zo! Abʼamaanyi nga bagudde!

²⁰ⓕ “Temukyogeranga mu Gaasi, Temukyatuliranga mu nguudo za Asukulooni,[1] Abawala bʼAbafirisuuti baleme okusanyuka, Abawala bʼabatali bakomole baleme okujaguza.

²⁰

²¹ⓖ “Mmwe ensozi za Girubowa, muleme okugwibwako omusulo newaakubadde enkuba, newaakubadde ennimiro okumeramu ensigo. Kubanga eyo engabo[2] eyʼabʼamaanyi gye yanyoomerwa nʼengabo ya Sawulo, gye yafuukira ngʼetafukibwangako mafuta.

²²Omutego gwa Yonasaani tegwaddanga mabega nʼekitala kya Sawulo tekyaddanga nga kikalu, olwʼokubuna omusaayi gwʼabattibwanga, nʼamasavu gʼabʼamaanyi.

²²

²³ⓗ “Sawulo ne Yonasaani, mu bulamu bwabwe baali baagalwa nnyo era baali baakisa, ne mu kufa tebaayawukana. Baali bangu okusinga empungu, era baali bʼamaanyi nʼokusinga empologoma.

²³

²⁴“Mmwe abawala ba Isirayiri, mukaabire Sawulo, eyabambaza engoye ezinekaaneka ezʼokwesiima, eyabambaza ebyambalo ebyatonebwa ne zaabu.

²⁴

²⁵“Abʼamaanyi nga bagudde wakati mu lutalo! Yonasaani attiddwa ku nsozi zammwe.

²⁶Nnumwa nnyo ku lwa muganda wange Yonasaani, kubanga wali mukwano gwange ddala. Okwagala kwe wanjagala kwali kwa kitalo, nga kwa kitalo nʼokusinga okwʼabakyala.

²⁶

²⁷“Abʼamaanyi nga bagudde, nʼebyokulwanyisa nga bizikiridde!”