2 Samwiri 10:1-19 LGCB2014 - Bible AI

¹ⓢ Mu kiseera ekyo kabaka wʼabaana ba Amoni[14] nʼafa, mutabani we Kamuni nʼamusikira.

²Dawudi nʼalowooza nga kyandibadde kirungi, okumukolera ebyekisa nga kitaawe bwe yali akoze. Awo Dawudi nʼamutumira ekibinja okugenda okumukubagiza olwʼokufa kwa kitaawe.

²Abasajja ba Dawudi bwe baatuuka mu nsi eyʼAbamoni,

³abakungu ba Amoni ne bagamba Kamuni mukama waabwe nti, “Olowooza nga Dawudi okukuweereza ababaka okukubagiza, aba assaamu kitaawo kitiibwa? Olowooza nga Dawudi tabasindise okujja okulawuna nʼokuketta ekibuga nʼokukiwamba?”

⁴ⓣ Awo Kamuni nʼakwata abasajja ba Dawudi nʼabamwako ekitundu kyʼebirevu byabwe nʼabasalira ebyambalo byabwe wakati okukoma ku manyuma gaabwe, nʼabagoba baddeyo ewaabwe.

⁵Dawudi bwe yategeezebwa ebyo, nʼatumira abasajja be ababaka, kubanga baali mu buswavu bungi, nʼabagamba nti, “Musigale e Yeriko ebirevu byammwe bimale okukula mulyoke mukomewo.”

⁶ⓤ Awo Abamoni bwe bategeera nga Dawudi bamufuukidde ekyenyinyalwa, ne bapangisa abaserikale abʼebigere Abasuuli emitwalo ebiri okuva e Besukekobu nʼe Zoba, nʼabalala abasajja lukumi okuva ewa kabaka wʼe Maaka, nʼabalala omutwalo gumu mu enkumi bbiri okuva e Tobu.

⁷Dawudi olwawulira ebyo, nʼasindika Yowaabu nʼeggye lyonna eryʼabasajja abalwanyi abazira.

⁸Abamoni ne bavaayo ne basimba ennyiriri awayingirirwa mu wankaaki wʼekibuga kyabwe, Abasuuli abʼe Zoba nʼabʼe Lekobu, nʼabasajja abʼe Tobu nʼe Maaka bo ne babeera mu ttale.

⁹Awo Yowaabu bwe yalaba ngʼolutalo lumutaayizza mu maaso nʼemabega, nʼalondamu abasajja abazira mu Isirayiri, nʼabasindika batabaale Abasuuli.

¹⁰Abaasigalawo nʼabakwasa Abisaayi muganda we okubaduumira, nʼabasindika batabaale Abamoni.

¹¹Yowaabu nʼagamba muganda we nti, “Bwe munaalaba Abasuuli nga batuyitiridde amaanyi, munajja ne mutubeera. Abamoni bwe banaabayinga amaanyi, tunajja ne tubabeera.

¹²ⓥ Tuddemu amaanyi tulwane masajja olwʼabantu baffe, nʼolwʼebibuga bya Katonda waffe. Mukama akole nga bwʼasiima.”

¹³Awo Yowaabu nʼabasajja abaali naye ne bambuka okutabaala Abasuuli, Abasuuli ne babadduka.

¹⁴Abamoni bwe baalaba nga Abasuuli badduse, nabo ne badduka Abisaayi, ne bayingira mu kibuga. Yowaabu nʼalekeraawo okulwana nʼAbamoni, nʼaddayo e Yerusaalemi.

¹⁵Awo Abasuuli bwe baalaba nga bawanguddwa Isirayiri, ne beekuŋŋaanya.

¹⁶Kadadezeri nʼatumya Abasuuli okuva emitala wʼOmugga Fulaati, ne bagenda e Keramu nga bakulembeddwamu Sobaki omuduumizi wʼeggye lya Kadadezeri.

¹⁷Awo Dawudi bwe yakiwulira, nʼakuŋŋaanya Isirayiri yenna nʼasomoka Yoludaani nʼagenda e Keramu. Abasuuli ne basimba ennyiriri okwolekera Dawudi balwane naye.

¹⁸ⓦ Naye ne badduka mu maaso ga Isirayiri, Dawudi nʼatta abasajja lusanvu ku bavuzi bʼamagaali gʼembalaasi, era nʼemitwalo ena ku beebagala embalaasi, nʼafumita ne Sobaki omuduumizi wʼeggye lyabwe nʼafiirawo.

¹⁹Awo bakabaka bonna abaali abaddu ba Kadadezeri bwe baalaba nga bawanguddwa Isirayiri, ne beeweerayo ddala eri Abayisirayiri, era ne babawanga nʼobusuulu.

¹⁹Awo Abasuuli ne batya okuddamu okuyamba Abamoni.