2 Samwiri 11:1-27 LGCB2014 - Bible AI

¹ⓧ Awo mu biro ebyo, ekiseera bakabaka mwe bagendera okutabaala, Dawudi nʼasindika Yowaabu nʼabasajja be nʼeggye lyonna erya Isirayiri. Ne bazikiriza abaana ba Amoni ne bazingiza nʼekibuga kya Labba. Naye Dawudi nʼasigala mu Yerusaalemi.

²ⓨ Olunaku olumu, mu ssaawa ezʼolweggulo, Dawudi nʼagolokoka, nʼatambulatambula ku kasolya akʼolubiri lwe. Nʼasinziira waggulu eyo nʼalengera omukazi ngʼanaaba, era omukyala yali mulungi omubalagavu.

³ⓩ Dawudi nʼatuma omuntu okugenda okumunoonyerezaako. Ne bakomawo ne bamutegeeza nti, “Oyo ye Basuseba muwala wa Eriyaamu mukyala wa Uliya Omukiiti.”

⁴ⓐ Awo Dawudi nʼamutumya, nʼajja gyʼali, ne yeebaka naye. Yali mu kiseera ekyʼokwelongoosa obutali bulongoofu bwe. Oluvannyuma nʼaddayo ewuwe.

⁵Omukyala nʼaba olubuto, nʼatumira Dawudi nti, “Ndi lubuto.”

⁶Awo Dawudi nʼatumira Yowaabu nti, “Mpeereza Uliya Omukiiti.” Yowaabu nʼaweereza Uliya eri Dawudi.

⁷Uliya bwe yagenda gyʼali, Dawudi nʼabuuza Yowaabu nʼabaserikale bwe baali, nʼolutalo bwe lwali.

⁸ⓑ Awo Dawudi nʼagamba Uliya nti, “Serengeta mu nnyumba yo, onaabe ku bigere.” Uliya nʼafuluma olubiri, kabaka nʼamuweereza ekirabo.

⁹Naye Uliya nʼataserengeta wuwe, nʼasula ku mulyango gwʼolubiri nʼabaddu ba mukama we, Dawudi.

¹⁰Dawudi bwe yategeezebwa nti, “Uliya teyazeeyo waka we,” nʼabuuza Uliya nti, “Waakava olugendo, kiki ekikulobedde okuddayo eka ewuwo?”

¹¹Uliya nʼaddamu Dawudi nti, “Essanduuko ne Isirayiri ne Yuda baasigadde mu weema, ne mukama wange Yowaabu nʼabaddu ba mukama wange basiisidde ku ttale. Kale nnyinza ntya okugenda mu nnyumba yange okulya nʼokunywa, nʼokwebaka ne mukyala wange? Mazima nga bwʼoli omulamu, sijja kukola kigambo bwe kityo.”

¹²Awo Dawudi nʼagamba Uliya nti, “Sigalawo olunaku olulala olabe obanga enkya siikusindike kuddayo.” Bwatyo Uliya nʼasigalawo olunaku olwo nʼolwʼenkya.

¹³ⓒ Dawudi nʼayita Uliya alye naye ekyekiro, nʼamutamiiza akawungeezi akʼolunaku olwo, Uliya nʼagenda nʼagalamira ku mukeeka gwe nʼabaddu ba mukama we, nʼataddayo wuwe.

¹⁴ⓓ Enkeera Dawudi nʼawandiikira Yowaabu ebbaluwa nʼagiwa Uliya agitwale.

¹⁵Yawandiika mu bbaluwa nti, “Uliya muteeke mu maaso ddala olutalo we luli olwʼamaanyi, mumwabulire, afumitibwe afe.”

¹⁶Awo Yowaabu bwe yali ngʼataayizza ekibuga, nʼaddira Uliya nʼamuteeka mu kifo kye yamanya nga waaliyo abalabe abʼamaanyi.

¹⁷Abasajja abʼekibuga bwe baafuluma okulwana ne Yowaabu, abamu ku basajja ba Dawudi ne battibwa, ne Uliya Omukiiti yali omu ku abo abattibwa.

¹⁸Awo Yowaabu nʼaweereza Dawudi amawulire gonna agafudde mu lutalo,

¹⁹nʼalagira gwe yatuma nti, “Bwʼonoomala okutegeeza kabaka amawulire gonna agafudde mu lutalo,

²⁰nʼalabika nga munyiivu, nʼabuuza nti, ‘Lwaki mwasemberedde nnyo ekibuga nga mulwana? Temwamanya nga bajja kulasa nga basinziira ku Bbugwe?

²¹ⓔ Ani eyatta Abimereki mutabani wa Yerubbesesi? Teyali mukazi e Sebezi eyamukanyugako ejjinja eddene, kwe baseera emmere eyʼempeke, ngʼasinziira ku bbugwe, nʼafiirawo? Lwaki mwasembedde okumpi ennyo ne bbugwe?’ Awo onoomutegeeza nti, ‘Omuddu wo Uliya Omukiiti naye afudde.’ ”

²²Awo omubaka nʼagenda nʼategeeza Dawudi byonna Yowaabu bye yamutuma okwogera.

²³Omubaka nʼagamba Dawudi nti, “Abasajja batusinzizza amaanyi ne batulumba ku ttale, naye ne tubagoba okutuusa ku wankaaki owʼekibuga.

²⁴Naye abalasi basinzidde ku bbugwe ne balasa abaddu, era abamu ku baddu ba kabaka baafudde, nʼomuddu wo Uliya Omukiiti naye mwe yafiiridde.”

²⁵Dawudi nʼagamba omubaka nti, “Ggamba Yowaabu nti, ‘Ekigambo ekyo kireme okukubuza emirembe, kubanga ekitala olumu kitta omu nʼolulala ne kitta omulala. Munyiikirire okulumba ekibuga mukiwambe.’ Era Yowaabu mugambe agume omwoyo.”

²⁶Awo mukyala wa Uliya bwe yawulira nti bba afudde, nʼamukungubagira.

²⁷ⓕ Okukungubaga bwe kwaggwa, Dawudi nʼamutumya, nʼamuleeta mu nnyumba ye, nʼafuuka mukyala we, nʼamuzaalira omwana owoobulenzi. Naye ekigambo ekyo Dawudi kye yakola ne kitasanyusa Mukama.