2 Samwiri 13:1-39 LGCB2014 - Bible AI

¹ⓣ Abusaalomu, mutabani wa Dawudi yalina mwannyina omulungi, omubalagavu erinnya lye Tamali[15], naye Amunoni omu ku batabani ba Dawudi omulala nʼayagala okwebaka naye.

²Amunoni nʼatawaana nnyo mu nsonga eyo nʼokulwala nʼalwala, kubanga Tamali yali mbeerera[16], Amunoni nʼakisanga nga kizibu okumufuna.

³Naye Amunoni yalina mukwano gwe ennyo, eyayitibwanga Yonadabu mutabani wa Simeeya mukulu wa Dawudi, eyali omusajja omukujjukujju.

⁴Nʼabuuza Amunoni nti, “Kiki ekikutawanyanga buli nkya, ggwe omwana wa kabaka? Lwaki tombulira?” Amunoni nʼamugamba nti, “Njagala Tamali, mwannyina Abusaalomu muganda wange.”

⁵Yonadabu nʼamugamba nti, “Genda mu kitanda weefuule okuba omulwadde. Kitaawo bwʼanajja okukulaba mugambe nti, ‘Gamba mwannyinaze Tamali ajje ampe ku kyokulya. Mukkirize anteekereteekere ekyokulya nga mmulabako nʼamaaso, nʼoluvannyuma andiise.’ ”

⁶ⓤ Awo Amunoni nʼagenda nʼagalamira ku kitanda kye ne yeefuula okuba omulwadde; kabaka bwe yagenda okumulaba nʼokumusaasira, Amunoni nʼamugamba nti, “Nkwegayiridde, kkiriza Tamali ajje anfumbire emigaati nga mulaba ku maaso, nʼoluvannyuma andiise.”

⁷Awo Dawudi nʼatumya Tamali nʼamugamba nti, “Genda ewa muganda wo Amunoni mu nnyumba ye, omuteekereteekere ekyokulya.”

⁸Tamali nʼagenda ewa Amunoni nʼamusanga ngʼagalamidde ku kitanda kye. Tamali nʼaddira obuwunga nʼabukanda, nʼakola emigaati Amunoni ngʼalaba, nʼagifumba.

⁹ⓥ Tamali nʼaddira olukalango, nʼaluggyako bye yafumbirako, Amunoni ngʼalaba naye nʼagaana okulya.

⁹Awo Amunoni nʼalagira abaddu be nti, “Buli muntu afulume.” Buli muntu nʼafuluma, nʼasigalamu ne Tamali.

¹⁰Amunoni nʼagamba Tamali nti, “Ndeetera emmere eno mu kisenge kyange, ondiise.” Awo Tamali nʼaddira emigaati gyʼafumbye, nʼagitwalira Amunoni mwannyina mu kisenge kye.

¹¹ⓦ Naye bwe yagimusembereza okulya nʼamukwata, nʼamugamba nti, “Jjangu weebake nange, mwannyinaze.”

¹²ⓧ Nʼamuddamu nti, “Nedda, mwannyinaze, tonkwata nʼamaanyi. Ekyo tekikolwa mu Isirayiri. Tokola kya kivve bwe kityo.

¹³ⓨ Nsaasira, nnadda wa obuswavu? Ate ggwe, onoobeera ngʼomu ku basajja abasirusiru mu Isirayiri. Nkwegayiridde yogera ne kabaka, tajja kukuziyiza nkufumbirwe.”

¹⁴Naye nʼagaana okumuwuliriza, nʼamukwata olwʼempaka, kubanga yali amusinza amaanyi, ne yeebaka naye.

¹⁵Oluvannyuma Amunoni nʼamukyawa nnyo nnyini, okusinga ne bwe yamwagala, nʼamulagira nti, “Golokoka ofulume.”

¹⁶Tamali nʼamuddamu nti, “Nedda! Okungoba kibi okusinga ekikolwa kyʼonkoze.” Naye nʼagaana okumuwuliriza.

¹⁷Nʼayita omuddu eyʼamuweerezanga nʼamugamba nti, “Omukazi oyo muggye mu maaso gange, omuggalire ebweru.”

¹⁸ⓩ Awo omuddu we nʼafulumya Tamali ebweru, nʼaggalawo oluggi. Yali ayambadde ekyambalo ekiwanvu nga kyʼamabala mangi, kubanga eyo ye yabeeranga ennyambala eyʼabambejja embeerera.

¹⁹ⓐ Tamali nʼateeka evvu mu mutwe gwe, nʼayuza ekyambalo kye, nʼateeka omukono ku mutwe gwe nʼagenda ngʼakaaba.

²⁰Abusaalomu mwannyina nʼamubuuza nti, “Obadde ne mwannyoko Amunoni? Sirikawo mwannyinaze, oyo mwannyoko. Ekyo kireme okukunakuwaza.” Awo Tamali nʼabeeranga ne mwannyina Abusaalomu, nga mukazi munaku.

²¹Kabaka Dawudi bwe yakiwulira, nʼasunguwala nnyo.

²²ⓑ Naye Abusaalomu nʼatabaako kigambo kyʼayogera ne Amunoni, ekirungi oba ekibi, kyokka nʼakyawa Amunoni kubanga yayonoonyesa Tamali mwannyina.

²³Bwe waayitawo emyaka ebiri nga kiseera kya kusala ebyoya byʼendiga, ngʼabasazi ba Abusaalomu bali e Baalukazoli, ekiriraanye Efulayimu, Abusaalomu nʼayita abaana ba kabaka bonna.

²⁴Abusaalomu nʼagenda eri kabaka nʼamugamba nti, “Omuddu wo alina abasazi abʼebyoya byʼendiga baaleese. Nkusaba kabaka nʼabakungu be, mujje munjagulizeeko.”

²⁵Kabaka nʼamuddamu nti, “Nedda, mwana wange. Ffenna bwe tunajja, tujja kuzitoowerera.” Abusaalomu nʼamwegayirira nga bwʼamuwaliriza, naye nʼagaana okugenda, wabula nʼamusabira omukisa.

²⁶Awo Abusaalomu nʼamugamba nti, “Ggwe bwʼoba nga tojje, nkwegayiridde okkirize Amunoni agende naffe.” Kabaka nʼamubuuza nti, “Lwaki Amunoni agenda nammwe?”

²⁷Naye Abusaalomu nʼamwegayirira nnyo okutuusa bwe yakkiriza Amunoni nʼabaana ba kabaka bonna okugenda naye.

²⁸ⓒ Awo Abusaalomu nʼalagira abaddu be nti, “Muwulire! Mugenderere okulaba Amunoni ngʼatudde, nʼomutima gwe nga musanyuukirivu; bwe nʼabagamba nti, ‘mutte Amunoni,’ mumutte. Temutya, si nze mpadde ekiragiro? Mube nʼamaanyi era mube bazira.”

²⁹Awo abasajja ba Abusaalomu ne batta Amunoni nga Abusaalomu bwe yabalagira. Abaana ba kabaka bonna ne basituka ne beebagala buli muntu ennyumbu ye ne badduka.

³⁰Bwe baali bakyali mu kkubo, amawulire ne gatuuka eri Dawudi nti, “Abusaalomu asse abaana ba kabaka bonna, era tewasigadde nʼomu.”

³¹Kabaka nʼagolokoka nʼayuza ebyambalo bye, ne yeebaka mu ttaka nʼabaddu be bonna abaaliwo ne bayuza ebyambalo byabwe.

³²Naye Yonadabu mutabani wa Simeeya, mukulu wa Dawudi, nʼayogera nti, “Mukama wange kabaka aleme okulowooza nga basse abalangira bonna, Amunoni yekka yʼafudde. Era ekyo kye kyali ekigendererwa kya Abusaalomu okuva ku lunaku Amunoni lwe yakwata Tamali mwannyina.

³³Noolwekyo mukama wange kabaka aleme okweraliikirira olwʼamawulire gʼafunye agagamba nti abaana ba kabaka bonna bafudde. Amunoni yekka ye afudde.”

³⁴Kyokka Abusaalomu nʼadduka. Omuvubuka omukuumi nʼayimusa amaaso ge, nʼalengera abantu bangi mu kkubo eryʼebugwanjuba nga bakkirira ku mabbali gʼolusozi.

³⁵Awo Yonadabu nʼagamba kabaka nti, “Laba abaana ba kabaka bajja; kituukiridde omuddu wo kye yayogedde.”

³⁶Bwe yali yakamala okwogera, abaana ba kabaka ne bayingira nga bakuba ebiwoobe. Kabaka nʼabaddu be nabo ne bakaaba nnyo nnyini.

³⁷Abusaalomu ye nʼaddukira eri Talumaayi mutabani wa Ammikuli, kabaka wʼe Gesuli, Dawudi nʼamukaabiranga buli lunaku.

³⁸Abusaalomu nʼamala e Gesuli emyaka esatu.

³⁹Naye omutima gwa Dawudi ne gwegomba okulaba ku Abusaalomu, kubanga yali akubagizibbwa olwʼokufa kwa Amunoni.