2 Samwiri 18:1-33 LGCB2014 - Bible AI

¹ⓨ Awo Dawudi nʼakuŋŋaanya abasajja be yalina, nʼabalondamu abaduumizi bʼenkumi nʼabaduumizi bʼebikumi.

²ⓩ Dawudi nʼabalagira bagende, ekimu kya kusatu nga kiduumirwa Yowaabu, ekimu kya kusatu ekirala nga kiduumirwa muganda wa Yowaabu, Abisaayi batabani wa Zeruyiya, nʼekimu kya kusatu ekirala nga kiduumirwa Ittayi Omugitti. Kabaka nʼagamba abasajja nti, “Nange nʼagenda nammwe.”

³Naye abasajja ne boogera nti, “Toteekwa kugenda naffe, kubanga ffe bwe tunadduka tebaatufeeko. Ekitundu ku ffe ne bwe tunaafa tebaafeeyo. Ggwe olimu abantu omutwalo gumu ku ffe ffenna. Ekisinga obulungi weeteeketeeke okutudduukirira ngʼosinziira mu kibuga.”

⁴Kabaka nʼaddamu nti, “Kye musiimye kye nnaakola.” Awo kabaka nʼayimirira ku mabbali ga wankaaki, ngʼeggye lyonna likumba okufuluma mu bibinja ebyʼekikumi nʼebyʼolukumi.

⁵Kabaka nʼalagira Yowaabu, ne Abisaayi ne Ittayi ngʼayogera nti, “Omuvubuka Abusaalomu mumukwate nʼekisa ku lwange.”

⁵Abantu bonna ne bawulira kabaka ngʼawa abaduumizi bonna ebiragiro ebikwata ku Abusaalomu.

⁶ⓐ Awo eggye ne lifuluma ku ttale okulwana ne Isirayiri, olutalo ne luba mu kibira kya Efulayimu.

⁷Abasajja ba Isirayiri ne bakubibwa abasajja ba Dawudi, era bangi ne battibwa ku lunaku olwo. Baawera ngʼemitwalo ebiri.

⁸Olutalo ne lubuna ensi yonna, abantu bangi ne bafiira mu kibira okusinga nʼabattibwa nʼekitala.

⁹Awo Abusaalomu nʼasisinkana nʼabasajja ba Dawudi. Yali yeebagadde ennyumbu ye. Ennyumbu nʼeyita wansi wʼamatabi amangi agʼomwera omunene, omutwe gwa Abusaalomu ne gulaaliramu, nʼasigala ngʼalengejja mu bbanga, ennyumbu gye yali yeebagadde nʼegenda mu maaso.

¹⁰Omu ku basajja bwe yakiraba nʼategeeza Yowaabu nti, “Laba nnalengedde Abusaalomu ngʼawanikiddwa ku mwera.”

¹¹Yowaabu nʼagamba omusajja eyajja okumubuulira nti, “Kiki, wamulabye? Kiki ekyakulobedde okumuttirawo? Nʼandikusasudde gulaamu kikumi mu kkumi na ttaano eza ffeeza ne nkuwa nʼolukoba olwʼobuzira.”

¹²Naye omusajja nʼamuddamu nti, “Ne bwe wandinsasudde kilo kkumi nʼemu eza ffeeza, sandigololedde mukono gwange ku mwana wa kabaka. Ffenna twawulidde kabaka ngʼabalagira ggwe, Abisaayi ne Ittayi nti, ‘Waleme okubaawo omuntu yenna anaakola Abusaalomu akabi ku lwange.’

¹³Kale singa mmusse ne ngwa mu mitawaana, tewandimpolerezza, kubanga omanyi nga tewali kigambo ekikwekebwa kabaka.”

¹⁴Yowaabu nʼayogera nti, “Sirina bbanga lya kukwonoonerako.” Nʼaddira obusaale busatu nʼabulasa mu kifuba kya Abusaalomu ngʼakyali mulamu mu mwera.

¹⁵Nʼabavubuka kkumi abaasitulanga ebyokulwanyisa bya Yowaabu ne beetooloola Abusaalomu ne bamukuba ne bamutta.

¹⁶Awo Yowaabu nʼafuuwa ekkondeere, eggye ne lireka okugoberera Isirayiri kubanga Yowaabu yabayimiriza.

¹⁷ⓑ Ne batwala Abusaalomu, ne bamusuula mu lunnya oluwanvu mu kibira, ne bamutuumako amayinja. Isirayiri yenna ne badduka nga buli muntu adda ewuwe.

¹⁸ⓒ Mu bulamu bwe, Abusaalomu yaddira empagi nʼagiteeka mu kiwonvu kya kabaka ngʼekijjukizo kye; nʼayogera nti, “Sirina mwana wabulenzi kwe balijjuukirira erinnya lyange.” Empagi nʼagituuma erinnya lye, era eyitibwa kijjukizo kya Abusaalomu ne leero.

¹⁹Akimaazi mutabani wa Zadooki nʼayogera nti, “Ka nziruke, ntwalire kabaka amawulire nga Mukama bwʼamulokodde mu mukono gwʼomulabe we.”

²⁰Naye Yowaabu nʼamugamba nti, “Si ggwe onootwala amawulire leero. Oligatwala olunaku olulala olutali lwa leero, kubanga mutabani wa kabaka afudde.”

²¹Awo Yowaabu nʼagamba omusajja Omukusi nti, “Genda otegeeze kabaka byʼolabye.” Omukusi nʼavuunama mu maaso ga Yowaabu nʼadduka.

²²Akimaazi mutabani wa Zadooki nʼagamba Yowaabu nate nti, “Nkwegayiridde, nzikiriza mmale gagoberera Omukusi.” Yowaabu nʼamuddamu nti, “Mutabani wange, kiki ekinaaba kikutwala ate nga tolina mawulire gʼonootwala aganakuweesa ekirabo?”

²³Nʼayogera nti, “Ka mmale ga genda.” Awo Yowaabu nʼamugamba nti, “Dduka.” Akimaazi nʼaddukira mu kkubo eryʼolusenyi lwa Yoludaani nʼayisa Omukusi.

²⁴ⓓ Awo Dawudi yali atudde wakati wʼemiryango ebiri ogwʼomunda nʼogwʼebweru, omukuumi nʼalinnya waggulu ku wankaaki ku bbugwe. Bwe yayimusa amaaso ge nʼalengera omusajja ngʼajja adduka yekka.

²⁵Omukuumi nʼayogerera waggulu nʼategeeza kabaka. Awo kabaka nʼamugamba nti, “Bwʼaba ngʼali yekka ateekwa okuba ngʼaleeta mawulire malungi.” Omusajja nʼasembera.

²⁶Omukuumi nʼalengera omusajja omulala ngʼajja adduka, nʼakoowoola omuggazi nti, “Laba omusajja omulala ajja adduka yekka.” Kabaka nʼayogera nti, “Naye ateekwa okuba ngʼaleeta mawulire malungi.”

²⁷ⓔ Awo omukuumi nʼayogera nti, “Kindabikira nga enziruka eyʼoli akulembedde eri ngʼeya Akimaazi mutabani wa Zadooki.” Kabaka nʼayogera nti, “Oyo musajja mulungi era ajja nʼamawulire malungi.”

²⁸Awo Akimaazi nʼayogerera mu ddoboozi eryʼomwanguka ngʼagamba kabaka nti, “Byonna birungi.” Nʼavuunama mu maaso ga kabaka, ne yeeyala wansi nʼayogera nti, “Yeebazibwe Mukama Katonda wo, azikirizza abasajja abayimusizza omukono ku mukama wange kabaka.”

²⁹Awo kabaka nʼabuuza nti, “Omuvubuka Abusaalomu ali bulungi?” Akimaazi nʼaddamu nti, “Yowaabu bwe yabadde ngʼanaatera okutuma omuddu wa kabaka, nange omuddu wo, nalabye oluyoogaano olunene, naye saategedde kyabadde wo.”

³⁰Kabaka nʼamugamba nti, “Ggwe dda wabbali.” Nʼadda wabbali nʼayimirira awo.

³¹Awo Omukusi nʼatuuka, nʼayogera nti, “Wulira amawulire amalungi mukama wange kabaka. Mukama akulokodde leero mu mukono gwʼabo bonna abakuyimukiramu.”

³²Kabaka nʼabuuza Omukusi nti, “Omuvubuka Abusaalomu mulamu?” Omukusi nʼaddamu nti, “Ekituuse ku muvubuka oyo, kituuke ku balabe ba mukama wange kabaka, nʼabo bonna abamuyimukiramu okumukola akabi.”

³³Kabaka nʼafuna ensisi, nʼayambuka mu kisenge ekyali waggulu wa wankaaki, nʼakaaba. Nʼagenda nga bwʼayogera nti, “Mutabani wange Abusaalomu, mutabani wange, mutabani wange Abusaalomu. Singa nze nfudde mu kifo kyo, Abusaalomu, mutabani wange!”