2 Samwiri 2:1-32 LGCB2014 - Bible AI

¹ⓘ Oluvannyuma lwʼebyo Dawudi ne yeebuuza ku Mukama nti, “Nyambuke mu kimu ku bibuga bya Yuda?” Mukama nʼamuddamu nti, “Yambuka.” Nʼabuuza nate nti, “Ŋŋende mu kiruwa?” Mukama nʼamuddamu nti, “E Kebbulooni.”

²Awo Dawudi nʼagenda eyo ne bakyala be bombi, Akinoamu Omuyezuleeri ne Abbigayiri nnamwandu wa Nabali owʼe Kalumeeri.

³ⓙ Dawudi nʼatwala nʼabasajja abaali naye, buli muntu nʼamaka ge, ne basenga mu Kebbulooni ne mu byalo byakyo.

⁴Awo abantu ba Yuda ne bajja mu Kebbulooni, ne bafukirako eyo Dawudi amafuta okuba kabaka wʼennyumba ya Yuda.

⁴Dawudi nʼategeezebwa nti abantu abʼe Yabesugireyaadi be baaziika Sawulo,

⁵ⓚ nʼabatumira ababaka okubagamba nti, “Mukama abawe omukisa olwʼekisa nʼekitiibwa bye mwalaga Sawulo mukama wammwe ne mumuziika.

⁶Mukama abalage ekisa nʼokwagala, nange ndibalaga kyʼekimu olwʼekyo kye mukoze.

⁷Noolwekyo kyemunaava mubeera abʼamaanyi era abavumu, kubanga oluvannyuma olwʼokufa kwa Sawulo mukama wammwe, ennyumba ya Yuda enfuseeko amafuta okubeera kabaka waabwe.”

⁸ⓛ Mu biro ebyo, Abuneeri[3] mutabani wa Neeri, omuduumizi wʼeggye lya Sawulo, nʼatwala Isubosesi mutabani wa Sawulo e Makanayimu.

⁹Nʼamufuula kabaka wʼe Gireyaadi, owʼAbasuuli[4], owʼe Yezuleeri, owa Efulayimu, owa Benyamini era owa Isirayiri yenna.

¹⁰Isubosesi, mutabani wa Sawulo yali wa myaka amakumi ana we yatandika okufuga Isirayiri, era nʼafugira emyaka ebiri. Naye ennyumba ya Yuda ne bagoberera Dawudi.

¹¹Ebbanga Dawudi lye yabeerera kabaka mu Kebbulooni ngʼafuga ennyumba ya Yuda lyali emyaka musanvu nʼemyezi mukaaga.

¹²ⓜ Abuneeri mutabani wa Neeri nʼabasajja ba Isubosesi mutabani wa Sawulo, ne bava e Makanayimu ne bagenda e Gibyoni.

¹³ⓝ Yowaabu[5] mutabani wa Zeruyiya nʼabasajja ba Dawudi ne bagenda okubasisinkana ku kidiba ekyʼe Gibyoni. Ekibinja ekimu ne kituula ku luuyi olumu olwʼekidiba, nʼekirala ne kituula ku luuyi olulala.

¹⁴Awo Abuneeri nʼagamba Yowaabu nti, “Abamu ku basajja bagolokoke beegezeemu mu maaso gaffe.” Yowaabu nʼamuddamu nti, “Kale bagolokoke.”

¹⁵Ne bagolokoka, kkumi na babiri ne babalibwa okuva ku ludda lwa Benyamini ne Isubosesi mutabani wa Sawulo, nʼababala kkumi na babiri okuva ku ludda lwa Dawudi.

¹⁶Buli omu nʼakwatagana ne gwe yali atunuuliganye naye, ne banyolegana emitwe, ne bafumitigana amafumu, ne bagwira wamu. Era ekifo ekyo mu Gibyoni ne kituumibwa Kerukasu-kazzulimu.

¹⁷Olutalo ne lweyongerera ddala, Abuneeri nʼabasajja be ne bawangulwa abasajja ba Dawudi.

¹⁸ⓞ Batabani ba Zeruyiya abasatu Yowaabu, Abisaayi, ne Asakeri baaliyo, era Asakeri yali muwenyusi wa misinde ngʼempeewo eyʼomu ttale.

¹⁹Asakeri nʼagoba Abuneeri emisinde, obutatunula ku mukono ogwa ddyo wadde ogwa kkono.

²⁰Awo Abuneeri bwe yatunula emabega we, nʼabuuza nti, “Ye ggwe Asakeri?”

²⁰Nʼaddamu nti, “Ye nze.”

²¹Abuneeri nʼamugamba nti, “Tunula ku mukono gwo ogwa ddyo oba ku mukono gwo ogwa kkono ogye ku omu ku bavubuka akuli okumpi ekyokulwanyisa kye.” Naye Asakeri nʼatalekaayo kumugoba.

²²Abuneeri nʼaddamu okumulabula ngʼagamba nti, “Bwʼoleka okungoba! Lwaki ondeetera okukutta? Muganda wo Yowaabu nnaamudda wa?”

²³Naye Asakeri ne yeeyongera bweyongezi okumugoba; Abuneeri kwe kumufumita mu lubuto nʼomuwunda gwʼeffumu, effumu ne liggukira mu mugongo, nʼagwa wansi era nʼafiirawo.

²⁴Naye Yowaabu ne Abisaayi ne bagoba Abuneeri. Enjuba bwe yali eneetera okugwa, ne batuuka ku lusozi Amma, oluliraanye Giya mu kkubo eryʼeddungu eryʼe Gibyoni.

²⁵Awo abasajja bʼe Benyamini ne beekola ekibinja kimu, ne badda ku luuyi lwa Abuneeri, ne bayimirira ku lusozi olumu.

²⁶Abuneeri nʼakoowoola Yowaabu nʼayogera nti, “Ekitala kirirya ennaku zonna? Tolaba nti enkomerero ya byonna buliba bukyayi bwereere? Kale kiki ekikulobera okulagira abantu bo balekeraawo okucocca baganda baabwe?”

²⁷Yowaabu nʼaddamu nti, “Katonda nga bwʼali omulamu, ne bwe watandikyogedde, obudde bwe bwandikeeredde ngʼabasajja balekeddaawo okugoba baganda baabwe.”

²⁸Awo Yowaabu nʼafuuwa ekkondeere[6], abasajja bonna ne bayimirira, ne balekeraawo okugoba Isirayiri, era nʼokubalwanyisa.

²⁹Ekiro ekyo kyonna Abuneeri nʼabasajja be ne batambula ne bayita mu Alaba, ne basomoka Yoludaani, ne batambula mu kiseera ekyʼoku makya kyonna ne batuuka e Makanayimu.

³⁰Awo Yowaabu nʼaddayo ngʼalese okugoba Abuneeri, nʼakuŋŋaanya abasajja be. Bwe baababala, ne basanga ngʼabasajja kkumi na mwenda be baali bafudde, okwo nga tobaliddeeko Asakeri.

³¹Naye abasajja ba Dawudi baali basse Ababenyamini ebikumi bisatu mu nkaaga ku abo abaali ne Abuneeri.

³²Ne batwala omulambo gwa Asakeri ne bamuziika ku biggya bya kitaawe e Besirekemu. Nʼoluvannyuma Yowaabu nʼabasajja be ne batambula ekiro kyonna, ne batuuka e Kebbulooni enkeera.