2 Samwiri 20:1-26 LGCB2014 - Bible AI

¹ⓢ Waaliwo omusajja omujeemu erinnya lye Seba, mutabani wa Bikuli, Omubenyamini. Yafuuwa ekkondeere nʼayogerera nʼeddoboozi eryʼomwanguka nti, “Tetulina mugabo mu Dawudi, so tetulina busika mu mutabani wa Yese! Buli muntu adde mu weema ye, ggwe Isirayiri!”

²Awo abantu ba Isirayiri bonna ne balekulira Dawudi ne bagoberera Seba mutabani wa Bikuli. Naye abantu ba Yuda bo ne basigala ne kabaka waabwe, okuva ku Yoludaani okutuuka e Yerusaalemi.

³Dawudi bwe yadda mu lubiri lwe e Yerusaalemi, nʼaddira abakyala be ekkumi be yali alese okulabirira olubiri nʼabasibira mu kkomera. Nʼabagabirira mu byokulya kwabwe, naye nʼatebaka nabo. Ne baggalirwa eyo okutuusa lwe baafa, nga bali nga bannamwandu.

⁴Awo kabaka nʼagamba Amasa nti, “Nkuŋŋaanyiza abasajja ba Yuda mu nnaku ssatu, naawe obeerewo.”

⁵Naye Amasa bwe yagenda okukola kyʼalagiddwa, nʼatwala ekiseera kiwanvu okusinga kabaka kye yali amuwadde.

⁶Dawudi nʼagamba Abisaayi nti, “Seba mutabani wa Bikuli alitukola akabi okusinga Abusaalomu bwe yakola. Noolwekyo twala abasajja ba mukama wo omugoberere aleme okuddukira mu bibuga ebiriko bbugwe, nʼatusimatuka.”

⁷Awo abasajja ba Yowaabu, nʼAbakeresi, nʼAbaperesi, nʼabaserikale abazira bonna, ne bava mu Yerusaalemi ne bagenda okunoonya Seba mutabani wa Bikuli nga baduumirwa Abisaayi.

⁸Bwe baatuuka ku lwazi olunene mu Gibyoni, Amasa nʼajja okubasisinkana. Yowaabu yali yeesibye ebyambalo bye ebyʼolutalo, ne mu kiwato nga yeesibye olukoba olwaliko ekitala ekyali mu kiraato kyakyo. Bwe yasituka, ne kisowoka mu kiraato kyakyo ne kigwa wansi.

⁹ⓣ Yowaabu nʼalamusa Amasa ngʼayogera nti, “Mirembe, muganda wange?” Yowaabu nʼakwata Amasa ekirevu nʼomukono gwe ogwa ddyo, nʼaba nga agenda okumunywegera.

¹⁰ⓤ Naye Amasa nʼatassaayo mwoyo okwekuuma ekitala ekyali mu mukono gwa Yowaabu; Yowaabu nʼakimufumita mu lubuto, nʼayiwa ebyenda bye wansi. Nʼatamufumita lwakubiri, Amasa bwʼatyo nʼafa. Awo Yowaabu ne muganda we Abisaayi ne beeyongera okugoberera Seba mutabani wa Bikuli.

¹¹Omu ku basajja ba Yowaabu nʼayimirira okumpi nʼomulambo gwa Amasa nʼayogera nti, “Buli ayagala Yowaabu, era buli ali ku luuyi lwa Dawudi, agoberere Yowaabu.”

¹²Omulambo gwa Amasa ne gubeera mu musaayi gwe nga gukulukunyirizibwa omwo wakati mu luguudo. Ne wabaawo omusajja eyalaba nga buli eyatuukanga awali omulambo gwa Amasa ngʼayimirira; omusajja oyo nʼagusitula nʼaguggya mu luguudo nʼagutwala ebbali mu nsiko, nʼagusuulako olugoye.

¹³Awo omulambo gwa Amasa bwe gwaggyibwa mu kkubo abantu bonna ne beeyongerayo ne Yowaabu okugoberera Seba mutabani wa Bikuli.

¹⁴ⓥ Seba nʼayita mu bika byonna ebya Isirayiri ngʼabakunga okutuuka mu Aberi ekyʼe Besumaaka, nʼayita ne mu kitundu kyonna ekyʼAbaberi ne bakuŋŋaanira gyʼali ne bamugoberera.

¹⁵ⓦ Eggye lyonna eryali ne Yowaabu, ne bazingiza Seba mu Aberi ekyʼe Besumaaka. Ne bakola ebifunvu okutuuka ku kibuga nʼokwolekera ekigo. Bwe baali nga bakyamenya bbugwe,

¹⁶ne wavaayo omukazi owʼamagezi mu kibuga, nʼakoowoola ngʼayogera nti, “Muwulirize. Muwulirize! Mugambe Yowaabu ajje wano, mbeeko kye mmugamba.”

¹⁷Yowaabu nʼagenda okumpi ne we yali, omukazi nʼamubuuza nti, “Ggwe Yowaabu?” Nʼamugamba nti, “Wuliriza omuweereza wo byʼanaayogera.” Nʼaddamu nti “Mpuliriza.”

¹⁷Nʼaddamu nti, “Nze nzuuyo.”

¹⁸Nʼayongera nʼayogera nti, “Edda baayogeranga nti, ‘Bwʼoba ngʼolina kyʼobuuza genda mu Aberi,’ era ekyo kye kyʼamalanga ensonga.

¹⁹Ffe bantu abaagazi bʼemirembe era abeesigwa mu Isirayiri. Mwagala okuzikiriza ekibuga, nnyina wʼabaana mu Isirayiri. Lwaki oyagala okumira obusika bwa Mukama?”

²⁰Yowaabu nʼaddamu nti, “Kikafuuwe, nze okumira ekibuga kino newaakubadde okukizikiriza.

²¹Si bwe kiri. Waliwo omusajja erinnya lye ye Seba, mutabani wa Bikuli, owʼomu nsi eyʼensozi eya Efulayimu, agolodde omukono gwe eri kabaka Dawudi. Bwe munaamuwaayo oyo omu yekka, nange nzija kulekayo okubalumba.”

²²ⓧ Omukazi nʼagamba Yowaabu nti, “Omutwe gwe gunaakasukibwa gyʼoli ku bbugwe.” Awo omukazi nʼagenda nʼekiteeso kye eri abantu bonna, ne basalako omutwe gwa Seba mutabani wa Bikuli, ne bagusuulira Yowaabu. Yowaabu nʼafuuwa ekkondeere, abasajja be ne bava ku kibuga ne basaasaana, bonna ne baddayo ewaabwe. Yowaabu ye nʼaddayo eri kabaka mu Yerusaalemi.

²³Yowaabu yali muduumizi wa ggye lya Isirayiri, ne Benaya mutabani wa Yekoyaada nga yʼakulira Abakeresi, nʼAbaperesi.

²⁴ⓨ Adolaamuⓩ ye yakuliranga abapakasi, Yekosafaati mutabani wa Akirudi ye yali omujjukiza.

²⁵ⓐ Seva ye yali omuwandiisi, Zadooki ne Abiyasaali nga be bakabona,

²⁶ne Ira Omuyayiri nga ye kabona wa Dawudi.