2 Samwiri 23:1-39 LGCB2014 - Bible AI

¹ⓒ Bino bye bigambo ebya Dawudi, mutabani wa Yese, ebyʼenkomerero: ebigambo ebyʼomusajja eyagulumizibwa, Aliwaggulu ennyo, Katonda wa Yakobo gwe yafukako amafuta, omuyimbi wa Zabbuli za Isirayiri:

²ⓓ “Omwoyo wa Mukama yayogerera mu nze, ekigambo kye kyali mu kamwa kange.

³ⓔ Katonda wa Isirayiri yayogera, olwazi lwa Isirayiri yaŋŋamba nti, ‘Omuntu bwʼafuga nʼobutuukirivu, nʼafugira mu kutya Katonda,

⁴ⓕ ali ngʼekitangaala ekyʼoku makya, enjuba ngʼevaayo ku ggulu nga tekuli bire, obudde nga butangaala oluvannyuma lwʼenkuba okukya ereetera omuddo okuvaayo mu ttaka.’

⁵Ennyumba yange tetuukiridde mu maaso ga Katonda? Teyalagaana nange endagaano eyʼenkalakkalira, nʼagiteekateeka era nʼaginyweza mu buli nsonga? Ekimulobera okumpa omukisa, nʼokuddamu buli kye mmusaba, kiki?

⁶Naye abatatya Katonda baliba nga amaggwa agasuulibwa wa bbali, kizibu okugakwata ne ngalo.

⁷Buli agakwatako kimugwanira okukozesa ekyuma oba olunyago lwʼeffumu, era gookerwa awo omuliro we bagakuŋŋaanyirizza.”

⁸ⓖ Gano ge mannya agʼabasajja ba Dawudi abalwanyi abʼamaanyi be yalina: Yosebubasu-sebesi Omutakemoni eyali omukulu wa bazira abasatu abʼoku ntikko; yatta abasajja lunaana mu lulwana lumu.

⁹ⓗ Eyamuddiriranga ye yali Eriyazaali mutabani wa Dodayi Omwakoki. Yali ne Dawudi bwe baasoomooza Abafirisuuti abaali bakuŋŋaanye okulwana. Abasajja ba Isirayiri baali bazze ennyuma,

¹⁰ⓘ naye ye nayimirira ku bubwe nʼatta Abafirisuuti, nʼomukono gwe ne gukoowa, ne gusanyalalira ku kitala. Mukama nʼabawa obuwanguzi obwʼamaanyi olunaku olwo, abaserikale ne baddayo eri Eriyazaali okunyaga ebintu byabo abattibwa.

¹¹ⓙ Owookusatu ye yali Samma mutabani wa Agee Omukalali. Abafirisuuti bwe baakuŋŋaanira mu musiri ogwʼebijanjaalo, abasajja ba Isirayiri ne babadduka,

¹²Samma yayimirira wakati mu musiri, nʼagulwanirira, era nʼatta Abafirisuuti. Mukama nʼawa Abayisirayiri obuwanguzi obwʼamaanyi.

¹³ⓚ Mu kiseera ekyʼokukungula, basatu ku bakungu amakumi asatu ne bagenda eri Dawudi mu mpuku eya Adulamu, ekibinja kyʼAbafirisuuti nga basiisidde mu kiwonvu Lefayimu.

¹⁴ⓛ Mu kiseera ekyo Dawudi yali mu kigo, nʼolusiisira lwʼAbafirisuuti nga luli mu Besirekemu.

¹⁵Dawudi nʼalumwa ennyonta, nʼayogera nti, “Waliwo omuntu ayinza okunsenera amazzi okuva mu luzzi oluliraanye wankaaki wa Besirekemu?”

¹⁶Awo abasajja be abazira abasatu ne bawaguza mu nkambi eyʼAbafirisuuti, ne basena amazzi okuva mu luzzi lwa Besirekemu olwali luliraanye wankaaki, ne bagatwalira Dawudi.

¹⁷ⓜ Naye mu kifo ekyʼokuganywa nʼagayiwayo eri Mukama. Nʼayogera nti, “Kikafuuwe, Ayi Mukama Katonda, nze okukola ekyo. Nnyinza ntya okunywa omusaayi ogwʼabasajja abawaddeyo obulamu bwabwe?” Bwʼatyo nʼataganywa.

¹⁷Ebyo byʼebimu ku bintu abasajja abo abasatu abazira bye baakola.

¹⁸ⓝ Waaliwo ne Abisaayi muganda wa Yowaabu, mutabani wa Zeruyiya, naye nga mukulu wʼabasajja amakumi asatu. Yayimusiza effumu lye eri abasajja ebikumi bisatu nʼabatta, ne yeekolera erinnya okwenkanankana abasatu.

¹⁹Nʼaba wa kitiibwa nnyo mu bali amakumi asatu newaakubadde nga teyatuuka ku ssa eryʼabali abasatu.

²⁰ⓞ Ne Benaya mutabani wa Yekoyaada owʼe Kabuzeeri yali musajja mulwanyi nnyo eyakola ebyobuzira ebikulu. Yatta babiri ku basajja abazira aba Mowaabu, ate nʼaserengeta ne mu bunnya nʼatta empologoma mu kiseera ekyʼobutiti.

²¹Nʼatta Omumisiri omunene ennyo. Newaakubadde ngʼOmumisiri yalina effumu mu mukono gwe, Benaya ye ngʼalina muggo; yamunyagako effumu lye, nʼalimuttisa.

²²Ebyo bye byobuzira Benaya mutabani wa Yekoyaada bye yakola, era naye nʼayatiikirira ngʼabasajja bali abasatu abazira.

²³Nʼaweebwa ekitiibwa mu makumi asatu, newaakubadde nga teyatuuka ku ssa eryʼabasatu. Dawudi nʼamufuula omukulu wʼabambowa.

²⁴Mu makumi asatu mwe mwali: Asakeri muganda wa Yowaabu, Erukanani mutabani wa Dodo owʼe Besirekemu,

²⁵ⓟ Samma Omukalodi,

²⁵Erika Omukalodi,

²⁶Kerezi Omupaluti,

²⁶Ira mutabani wa Ikkesi Omutekowa,

²⁷ⓠ Abiyezeeri Omwanasosi,

²⁷Mebunnayi Omukussai,

²⁸Zalumoni Omwakowa,

²⁸Makalayi Omunetofa,

²⁹ⓡ Kerebu mutabani wa Baana Omunetofa,

²⁹Ittayi mutabani wa Libayi owʼe Gibea ekyʼe Benyamini,

³⁰ⓢ Benaya Omupirasoni,

³⁰Kiddayi owʼoku nzizi ezʼe Geyaasi,

³¹Abi-aluboni Omwalubasi

³¹Azumavesi Omubalukumi,

³²Eriyaba Omusaaluboni,

³²batabani ba Yaseni, Yonasaani,

³³ⓣ ne Samma Omukalali,

³³Akiyamu mutabani wa Salali Omwalali,

³⁴Erifereti mutabani wa Akasubayi Omumaakasi,

³⁴Eriyamu mutabani wa Akisoferi Omugiro,

³⁵ⓤ Kezulo Omukalumeeri,

³⁵Paalayi Omwalubi,

³⁶ⓥ Igali mutabani wa Nasani owʼe Zoba,

³⁶Bani Omugaadi,

³⁷Zereki Omwamoni,

³⁷Nakalayi Omubeerosi, eyasitulanga ebyokulwanyisa bya Yowaabu mutabani wa Zeruyiya,

³⁸ⓦ Ira Omuyisuli,

³⁸Galebu Omuyisuli,

³⁹ne Uliya Omukiiti.

³⁹Bonna awamu baali amakumi asatu mu musanvu.