2 Samwiri 5:1-25 LGCB2014 - Bible AI

¹ⓗ Ebika byonna ebya Isirayiri ne bigenda eri Dawudi e Kebbulooni, ne boogera nti, “Laba, tuli mubiri gwo era musaayi gwo.

²Mu biro ebyʼedda, Sawulo nga ye kabaka waffe, gwe wakulemberanga Isirayiri mu ntalo. Era Mukama yakwogerako nti, ‘Olirunda abantu bange Isirayiri, era oliba mukulembeze waabwe.’ ”

³Awo abakadde bonna aba Isirayiri bwe bajja eri kabaka e Kebbulooni, nʼakola nabo endagaano e Kebbulooni mu maaso ga Mukama Katonda, era ne bafuka amafuta ku Dawudi okuba kabaka wa Isirayiri[9].

⁴ⓘ Dawudi we yatanulira okuba kabaka yalina emyaka amakumi asatu; nʼafugira emyaka amakumi ana.

⁵Mu Kebbulooni nʼafugirayo Yuda emyaka musanvu nʼekitundu, ate mu Yerusaalemi nʼafugiramu Isirayiri yenna ne Yuda emyaka asatu mu esatu.

⁶ⓙ Kabaka nʼabasajja be ne boolekera Yerusaalemi okulwana nʼAbayebusi abaabeeranga eyo. Abayebusi ne bagamba Dawudi nti, “Toliyingira muno, kubanga abazibe bʼamaaso nʼabalema balikulwanyisa ne bakulemesa;” nga balowooza nti Dawudi tayinza kukiyingira.

⁷ⓚ Naye Dawudi nʼawamba ekigo kya Sayuuni, kyʼekibuga kya Dawudi.

⁸ⓛ Ku lunaku olwo Dawudi nʼalagira nti, “Abanaagenda okutta Abayebusi, bayitire ku lusalosalo batte abazibe bʼamaaso nʼabalema, emmeeme ya Dawudi bʼekyawa.” Kyekyava kigambibwa nti, “Abazibe bʼamaaso nʼabalema tebaliyingira mu lubiri.”

⁹Dawudi nʼabeera mu kigo, nʼakituuma Ekibuga kya Dawudi. Nʼazimba ekibuga okukyetooloola, nʼakiteekako ne bbugwe.

¹⁰Dawudi ne yeeyongeranga okuba owʼamaanyi kubanga Mukama Katonda owʼEggye yali wamu naye.

¹¹ⓜ Awo kabaka Kiramu owʼe Ttuulo nʼatuma ababaka ne batwala emivule, ne bagenda, nʼabazimbi bʼamayinja, nʼababazzi eri Dawudi okumuzimbira olubiri.

¹²ⓝ Dawudi nʼategeera nga Mukama yali amunywezezza okuba kabaka wa Isirayiri, era ngʼagulumizizza obwakabaka bwe olwʼabantu ba Mukama Isirayiri.

¹³ⓞ Dawudi bwe yava e Kebbulooni nʼawasa abakyala abalala mu Yerusaalemi, abaana aboobulenzi nʼaboobuwala ne bamuzaalirwa.

¹⁴ⓟ Amannya gʼabo abaamuzaalirwa mu Yerusaalemi gaali Sammuwa, ne Sobabu, ne Nasani, ne Sulemaani,

¹⁵ⓠ ne Ibukali, ne Eriswa, ne Nefegi, ne Yafiya,

¹⁶ne Erisaama, ne Eriyada ne Erifereti[10].

¹⁷ⓡ Awo Abafirisuuti bwe baawulira nga Dawudi afukiddwako amafuta okuba kabaka wa Isirayiri, bonna ne bambuka okumunoonya, naye Dawudi nʼakiwulira nʼaserengeta mu kigo kye.

¹⁸ⓢ Abafirisuuti baali bazze nga basaasaanye mu kiwonvu Lefayimu.

¹⁹Dawudi ne yeebuuza ku Mukama nti, “Ŋŋende nnumbe Abafirisuuti? Onoobagabula mu mukono gwange?” Mukama nʼamuddamu nti, “Genda, kubanga nnaabagabula mu mukono gwo.”

²⁰ⓣ Awo Dawudi nʼagenda e Baaluperazimu, era nʼabawangula. Nʼayogera nti, “Mukama abonerezza abalabe bange mu maaso gange, ngʼembuyaga ezʼamazzi bwe zita ne zikulukuta nʼamaanyi.” Era ekifo ekyo kye kyava kituumibwa Baaluperazimu.

²¹ⓤ Abafirisuuti ne baleka eyo balubaale baabwe be beekolera, Dawudi nʼabasajja be ne babatwala.

²²ⓥ Abafirisuuti ne badda, ne basaasaana mu kiwonvu kya Lefayimu.

²³Awo Dawudi bwe yeebuuza ku Mukama, nʼamuddamu nti, “Tobatabaalirawo, naye beetooloole, obalumbe ngʼobafuluma mu maaso gʼemitugunda.

²⁴Awo olunaatuuka bwʼonoowulira abakumba ku masanso gʼemitugunda, oyanguwe okulumba, kubanga ekyo kinaategeeza nti Mukama akukulembedde okuzikiriza eggye lyʼAbafirisuuti.”

²⁵ⓦ Awo Dawudi nʼakola nga Mukama bwe yamulagira, nʼazikiriza Abafirisuuti okuva e Gebaⓧ okutuuka e Gezeri.