2 Samwiri 8:1-18 LGCB2014 - Bible AI

¹ⓔ Oluvannyuma lwʼebyo, Dawudi nʼawangula Abafirisuuti, nʼabafuula abaddu be, nʼawamba nʼekibuga kyabwe ekikulu.

²ⓕ Dawudi nʼawangula nʼAbamowaabu, nʼalagira buli omu ku bo yebake wansi, nʼabapimako nʼolukoba olupima. Buli eyali ebipimo bibiri yattibwanga, naye oyo eyali owʼebipimo ebisatu nga yʼalama. Abamowaabu[11] ne bafuuka baddu ba Dawudi ne bamuwanga obusuulu.

³Ate era Dawudi nʼawangula Kadadezeri mutabani wa Lekobu, kabaka wʼe Zoba, bwe yali nga yeddiza amatwale ge ku Mugga Fulaati.

⁴ⓖ Dawudi nʼawamba amagaali ga Kadadezeri lukumi, nʼabeebagala embalaasi kasanvu, nʼabaserikale abʼebigere emitwalo ebiri. Nʼatema kumpi embalaasi zonna, nʼazilemaza nʼalekawo kikumi ku zo.

⁵ⓗ Awo Abasuuli abʼe Ddamasiko ne bajja okubeera Kadadezeri kabaka wʼe Zoba, naye Dawudi nʼatta emitwalo ebiri mu enkumi bbiri ku bo.

⁶Dawudi nʼassa ebibinja ebyʼabaserikale mu Busuuli e Ddamasiko, Abasuuli ne bafuuka baddu be, era ne bamuwanga obusuulu. Mukama nʼawa Dawudi obuwanguzi buli gye yagendanga.

⁷ⓘ Dawudi nʼanyaga engabo eza zaabu ezasitulibwanga abaserikale ba Kadadezeri nʼazireeta e Yerusaalemi.

⁸ⓙ Kabaka Dawudi nʼanyaga nʼebikomo bingi ddala okuva mu Beta ne mu Berosayi, ebibuga ebyali ebya Kadadezeri.

⁹ⓚ Awo Toyi kabaka wʼe Kamasi bwe yawulira nga Dawudi awangudde eggye lyonna erya Kadadezeri,

¹⁰nʼatuma mutabani we Yolaamu eri kabaka Dawudi okumulamusaako, nʼokumuyozaayoza okuwangula olutalo wakati we ne Kadadezeri. Kadadezeri yalwananga ne Toyi. Yolaamu nʼamutwalira ebintu bya ffeeza ne zaabu nʼebikomo.

¹¹ⓛ Kabaka Dawudi nʼabiwonga eri Mukama, nga bwe yakola effeeza ne zaabu bye yaggya mu mawanga amalala ge yawangula.

¹²ⓜ Amawanga gaali: Busuuli, ne Mowaabu, nʼAbamoni, nʼAbafirisuuti ne Amaleki; nʼawonga nʼomunyago gwa Kadadezeri, mutabani wa Lekobu, kabaka wʼe Zoba.

¹³ⓝ Erinnya lya Dawudi ne litutumuka, bwe yakomawo okuva okutta Abasuuli omutwalo gumu mu kanaana mu kiwonvu ekyʼOmunnyo.

¹⁴ⓞ Nʼateeka ebibinja bya baserikale mu Busuuli yonna, Abasuuli bonna ne bafuuka baddu ba Dawudi. Mukama nʼawa Dawudi obuwanguzi buli gye yagendanga.

¹⁵Dawudi nʼafuga Isirayiri yenna, ngʼafuga abantu be bonna mu bwenkanya ne mu mazima.

¹⁶ⓟ Yowaabu mutabani wa Zeruyiya ye yali omuduumizi wʼeggye, Yekosafaati mutabani wa Akirudi nga ye mujjukiza,

¹⁷Zadooki[12] mutabani wa Akitubu ne Akimereki mutabani wa Abiyasaali nga be bakabona, Seroya nga ye muwandiisi,

¹⁸ⓠ Benaaya mutabani wa Yekoyaada nga ye mukulu wʼAbakeresi nʼAbaperesi[13] abaakuumanga ba kabaka, batabani ba Dawudi nga be bawi ba magezi abʼobwakabaka.