2 Samwiri 9:1-13 LGCB2014 - Bible AI

¹Dawudi nʼabuuza nti, “Wakyaliwo omuntu mu nnyumba ya Sawulo eyasigalawo gwe nnyinza okulaga ekisa ku lwa Yonasaani?”

²Awo waaliwo omuddu mu nnyumba ya Sawulo erinnya lye Ziba. Ne bamutumya, nʼajja mu maaso ga Dawudi. Kabaka nʼamubuuza nti, “Ggwe Ziba?” Nʼaddamu nti, “Nze wuuyo omuddu wo.”

³Kabaka nʼamubuuza nti, “Tewaliwo muntu mu nnyumba ya Sawulo eyasigalawo gwe nnyinza okukolera ebirungi olwʼekisa kya Katonda?” Ziba nʼaddamu kabaka nti, “Wakyaliwo mutabani wa Yonasaani, eyalemala ebigere.” Kabaka nʼamubuuza nti, “Ali ludda wa?” Ziba nʼamuddamu nti,

⁴“Ali mu nnyumba ya Makiri mutabani wa Ammiyeri mu Lodebali.”

⁵Awo Dawudi nʼamutumya, ne bamuleeta okuva mu nnyumba ya Makiri mutabani wa Ammiyeri mu Lodebali.

⁶Mefibosesi mutabani wa Yonasaani, muzzukulu wa Sawulo nʼajja eri Dawudi nʼavuunama mu maaso ge. Dawudi nʼamubuuza nti, “Ggwe Mefibosesi?” Nʼaddamu nti, “Nze wuuyo omuddu wo.”

⁷Dawudi nʼamugamba nti, “Totya kubanga siireme kukukolera bya kisa ku lwa Yonasaani kitaawo. Nzija kukuddiza ettaka lyonna eryali erya jjajjaawo Sawulo, era onooliranga ku mmeeza yange.”

⁸Mefibosesi ne yeeyanza nʼayogera nti, “Omuddu wo kye ki, okufaayo ku mbwa enfu nga nze?”

⁹Awo kabaka nʼayita Ziba, omuddu wa Sawulo, nʼamugamba nti, “Mpadde muzzukulu wa mukama wo ebintu byonna ebyali ebya Sawulo nʼennyumba ye.

¹⁰Ggwe ne batabani bo nʼabaddu bo munaamulimiranga ettaka ne muleeta ebibala ebirivaamu, muzzukulu wa mukama wo abenga nʼekyokulya. Mefibosesi muzzukulu wa mukama wo, ye anaaliiranga ku mmeeza yange nange, ennaku zange zonna.” Ziba yalina abaana aboobulenzi kkumi na bataano nʼabaddu amakumi abiri.

¹¹Awo Ziba nʼagamba kabaka nti, “Nga bwʼolagidde mukama wange kabaka, bwe kijja okukolebwa omuddu wo.” Mefibosesi nʼaliiranga ku mmeeza ya Dawudi ngʼomu ku balangira.

¹²ⓡ Mefibosesi yalina mutabani we omuto, eyayitibwanga Mikka, ne bonna abaali abʼennyumba ya Ziba baali baddu ba Mefibosesi.

¹³Mefibosesi nʼabeera mu Yerusaalemi kubanga yaliiranga ku mmeeza ya kabaka. Yali yalemala ebigere.