2 Timoseewo 2:1-26 LGCB2014 - Bible AI

¹Noolwekyo mwana wange nywereranga mu kisa ekiri mu Kristo Yesu.

²Ebyo bye wawulira nga njogera mu maaso gʼabajulirwa abangi biyigirizenga abantu abeesigwa, abalisobola okubiyigiriza abalala.

³Naawe bonaabonanga ngʼomuserikale omulungi owa Kristo Yesu.

⁴Tewali muserikale ngʼali ku lutalo eyeeyingiza mu mitawaana gyʼabantu abaabulijjo, alyoke asiimibwe oyo eyamuwandiika.

⁵Omuntu yenna eyeetaba mu mizannyo gyʼempaka, taweebwa buwanguzi bwʼatagoberera biragiro bya mizannyo egyo.

⁶Omulimi ategana ennyo yʼasaanira okufuna ku bibala ebibereberye.

⁷Kale lowooza ku bye ŋŋamba; Mukama ajja kukuwa okutegeera byonna.

⁸Jjukira nga Yesu Kristo owʼomu zzadde lya Dawudi yazuukira mu bafu ngʼEnjiri gye ntegeeza bwʼegamba.

⁹OlwʼEnjiri eyo, kyenva mbonaabona nʼensibibwa ngʼomukozi wʼebibi. Naye ekigambo kya Katonda kyo tekisibiddwa.

¹⁰Kyenva ngumira ebintu byonna olwʼabalonde nabo balyoke balokolebwe era bafune, nʼekitiibwa ekitaggwaawo ekiri mu Kristo Yesu.

¹¹Ekigambo kino kyesigwa ekigamba nti:

¹¹“Obanga twafiira wamu naye, era tulibeera balamu wamu naye.

¹²Obanga tugumiikiriza awamu naye, era tulifugira wamu naye. Obanga tumwegaana era naye alitwegaana.

¹³Ffe bwe tutaba beesigwa, ye aba mwesigwa, kubanga teyeewakanya.”

¹⁴Ebyo bijjukizenga abantu ngʼobakuutirira mu maaso ga Katonda, beewalenga okuwakana okutalina mugaso, nga bakyamya abo abawuliriza.

¹⁵Fubanga okweraga ngʼosiimibwa Katonda, ngʼoli mukozi akola ebitakuswaza, era nga weekuumira mu kkubo eryʼobubaka obwʼamazima.

¹⁶Weewalenga ebigambo ebinyooma era ebitaliimu nsa, kubanga abantu bibongera bwongezi mu butatya Katonda.

¹⁷Era ebigambo byabwe birisaasaana nga kookolo; mu abo mwe muli Kumenayo ne Fireeto,

¹⁸abaakyama ne bava ku mazima, nga bagamba nti Okuzuukira kwabaawo dda, era waliwo abamu be bakyamizza.

¹⁹ⓐ Kyokka omusingi Katonda gwe yateekawo mugumu, era gulina akabonero kano: “Mukama amanyi ababe.” Era nti: “Buli ayatula erinnya lya Mukama ave mu butali butuukirivu.”

²⁰Mu nnyumba ennene temubaamu bintu bya zaabu na ffeeza byokka, naye mubaamu nʼebyʼemiti, era nʼebyʼebbumba. Ebimu bikozesebwa emirimu egyʼekitiibwa, nʼebirala egitali gya kitiibwa.

²¹Noolwekyo buli eyeewala ebintu ebyo ebitali bya kitiibwa anaabanga owʼekitiibwa, atukuziddwa, asaanira okukozesebwa mukama we, olwʼomulimu omulungi.

²²Naye ddukanga okwegomba okubi okwʼekivubuka, ogobererenga obutuukirivu, nʼokukkiriza, nʼokwagalana era nʼemirembe awamu nʼabo abasaba Mukama nʼomutima omulongoofu.

²³Weewalenga empaka ezʼobusirusiru, ezitaliimu magezi, kubanga omanyi nti zivaamu okulwana.

²⁴Omuddu wa Mukama tasaana kulwana, wabula okuba omukkakkamu eri bonna, nʼokuba omuyigiriza omulungi agumiikiriza,

²⁵era aluŋŋamya nʼobwetoowaze abo abamuwakanya, oboolyawo Katonda alibawa okwenenya, ne bamanya amazima,

²⁶ne bava mu mutego gwa Setaani gwe baguddemu abakozese byʼayagala, ne badda engulu mu kutegeera kwabwe.