Abaebbulaniya 10:1-39 LGCB2014 - Bible AI

¹Amateeka kisiikirize busiikirize ekyʼebirungi ebigenda okujja, go ku bwagwo tegamala, kubanga ssaddaaka ezo ze zimu eza buli mwaka ze bawaayo obutayosa ezitayinza kutukuza abo abaziwaayo.

²Ssaddaaka ezo zandibadde tezikyaweebwayo, kubanga abaaziwaayo, omulundi ogumu gwandibamaze okubatukuza, ne bataddayo kweraliikirira olwʼebibi byabwe.

³Naye ssaddaaka eza buli mwaka zaabajjukizanga ebibi byabwe.

⁴Kubanga omusaayi gwʼente ennume nʼembuzi tegusobola kuggyawo bibi.

⁵Noolwekyo Kristo bwe yali ngʼajja mu nsi kyeyava agamba nti, ⓑ “Ssaddaaka nʼebiweebwayo tewabyagala. Naye wanteekerateekera omubiri.

⁶Ebiweebwayo ebyokebwa nʼebiweebwayo olwʼekibi, tewabisiima.

⁷Kyennava njogera nti, ‘Nzuno, nga bwe kyawandiikibwa mu mizingo gyʼebyawandiikibwa: Nzize okukola byʼoyagala, ngʼEbyawandiikibwa bwe binjogerako.’ ”

⁸Nga bwe kyogera waggulu nti, Ssaddaaka nʼebiweebwayo, nʼebiweebwayo ebiramba ebyokebwa, nʼebiweebwayo olwʼebibi tewabyagala so tewabisiima, so nga biweebwayo ngʼamateeka bwe galagira,

⁹nʼalyoka agamba nti, “Nzuuno nzize okukola byʼoyagala.” Noolwekyo aggyawo enkola esooka alyoke anyweze enkola eyookubiri.

¹⁰Twatukuzibwa olwʼokwagala kwe, omubiri gwa Yesu Kristo bwe gwaweebwayo omulundi ogumu ku lwaffe ffenna.

¹¹Buli kabona ayimirira buli lunaku ngʼaweereza, nʼawaayo ssaddaaka mu ngeri yʼemu, ezitayinza kuggyawo bibi,

¹²naye Kristo bwe yamala okuwaayo ssaddaaka eyʼemirembe gyonna, olwʼebibi, nʼalyoka atuula ku mukono ogwa ddyo ogwa Katonda.

¹³Okuva mu kiseera kino alindirira abalabe be bafuulibwe entebe yʼebigere bye.

¹⁴Kubanga olwʼekiweebwayo ekyo ekimu, abaatukuzibwa yabawa obutuukirivu obwʼemirembe gyonna.

¹⁵Mwoyo Mutukuvu naye akikakasa bwʼayogera nti,

¹⁶ⓒ “Eno yʼendagaano gye ndikola nabo, oluvannyuma lwʼennaku ezo, bwʼayogera Mukama. Nditeeka amateeka gange ku mitima gyabwe, era ndiwandiika amateeka gange mu myoyo gyabwe.”

¹⁷Ayongerako kino nti, ⓓ “Sirijjukira nate bibi byabwe newaakubadde obujeemu bwabwe.”

¹⁸Naye kaakano awali okusonyiyibwa ebintu ebyo, waba tewakyali kyetaagisa kuwaayo kiweebwayo olwʼebibi.

¹⁹Kale abooluganda nga bwe tulina obuvumu okuyingira mu Watukuvu wʼAwatukuvu olwʼomusaayi gwa Yesu,

²⁰eyatuggulirawo ekkubo eriggya era eddamu eriyita mu lutimbe, gwe mubiri gwe,

²¹kale nga bwe tulina Kabona Asinga Obukulu nga yʼafuga ennyumba ya Katonda,

²²tusembere awali Katonda nʼomwoyo ogwʼamazima ogujjudde okukkiriza nga tulina emitima egitukuzibbwa okuva mu ndowooza embi, era nga nʼemibiri gyaffe ginaazibbwa nʼamazzi amatukuvu.

²³Kale tunyweze essuubi lye twatula nga tetusagaasagana, kubanga eyasuubiza mwesigwa,

²⁴era tussengayo omwoyo buli muntu eri munne, nga twekubiriza mu kwagala ne mu kukola ebikolwa ebirungi.

²⁵Tuleme kulekayo kukuŋŋaana, ngʼabamu bwe bakola, naye buli muntu agumye munne, na ddala nga bwe mulaba nti, Olunaku lwʼokudda kwa Mukama waffe lusembedde.

²⁶Singa tukola ebibi mu bugenderevu, nga tumaze okumanya amazima, waba tewakyaliwo ssaddaaka eweebwayo olwʼekibi.

²⁷Wabula ekiba kisigadde kwe kulindirira okusalirwa omusango ogwʼekibonerezo ekyʼomuliro ogwʼamaanyi ogugenda okumalawo abalabe ba Katonda.

²⁸Omuntu yenna eyajeemeranga amateeka ga Musa yattibwanga awatali kusaasirwa, bwe waabangawo abajulirwa babiri oba basatu abamulumiriza.

²⁹Noolwekyo omuntu alinnyirira Omwana wa Katonda, era nʼomusaayi gwʼendagaano ogunaazaako ebibi nʼaguyisa ngʼogwa bulijjo, era nʼanyoomoola Omwoyo owʼekisa, talibonerezebwa nʼobukambwe obusingawo?

³⁰Kubanga tumumanyi oyo eyagamba nti, “Okuwoolera eggwanga kwange. Nze ndisasula.” Era nti, “Mukama yʼaliramula abantu be.”

³¹Kintu kya ntiisa okugwa mu mikono gya Katonda omulamu!

³²Mujjukire ennaku ezʼedda bwe mwategeera Kristo, ne mugumiikiriza okubonyaabonyezebwa okwʼamaanyi.

³³Oluusi mwavumibwanga era ne muyigganyizibwa mu lwatu, ate olulala ne mussa kimu nʼabo abaabonaabona nga mmwe.

³⁴Mwalumirwa wamu nʼabasibe, era mwagumiikiriza nʼessanyu bwe mwanyagibwako ebyammwe kubanga mwamanya nti Mulina ebisinga obulungi era ebyʼolubeerera ebibalindiridde.

³⁵Kale munywererenga ku buvumu bwammwe bwe mulina, obuliko empeera ennene.

³⁶Kubanga kibasaanira okugumiikiriza nga mukola Katonda byʼayagala mulyoke mufune ebyo bye yasuubiza.

³⁷Wasigadde akaseera katono nnyo, oyo owʼokujja ajje era talirwa.

³⁸Omutuukirivu wange, anaabanga mulamu lwa kukkiriza, kyokka bwʼadda emabega simusanyukira.

³⁹Naye ffe tetuli ba kudda mabega mu kuzikirira, wabula tulina okukkiriza okunywevu okutuleetera okulokoka.