Abaebbulaniya 11:1-40 LGCB2014 - Bible AI

¹Okukkiriza kwe kukakasa ebyo bye tusuubira, bwe butabaamu kakunkuna newaakubadde nga tebirabika.

²Okukkiriza kwe kwaleetera abantu abʼedda abakulu okusiimibwa Katonda.

³Olwʼokukkiriza tumanyi ngʼensi yatondebwa na kigambo kya Katonda, ebirabika kyebyava bikolebwa nga biggibwa mu bitalabika.

⁴Olwʼokukkiriza Aberi yawaayo Ssaddaaka esinga obulungi eri Katonda okusinga eya Kayini gye yawaayo, era ne kimubalirwa okuba obutuukirivu, Katonda ngʼamuweerwa obujulirwa olwʼebirabo bye, era newaakubadde nga Aberi yafa, akyayogera.

⁵ⓔ Olwʼokukkiriza Enoka yatwalibwa nga taleze ku kufa, nʼatalabika kubanga Katonda yamutwala. Bwe yali tannamutwala, yayogera nga Enoka bwe yamusanyusa.

⁶Naye awatali kukkiriza toyinza kusanyusa Katonda. Buli ajja eri Katonda kimugwanira okukkiriza nti Katonda waali era nʼabo abamunoonya nʼobwesigwa abawa empeera.

⁷Nuuwa bwe yalabulwa ku bintu bye yali tannalaba, nʼatya, era mu kukkiriza nʼazimba eryato olwʼokulokola ennyumba ye. Bwʼatyo nʼasalira ensi omusango, ate nʼafuuka omusika wʼobutuukirivu obuli mu kukkiriza.

⁸Olwʼokukkiriza Ibulayimu bwe yayitibwa, nʼagonda, nʼalaga mu kifo kye yali agenda okuweebwa ngʼomugabo, bwʼatyo nʼagenda nga ne gyʼalaga tamanyiiyo.

⁹Era ne bwe yatuuka mu nsi Katonda gye yamusuubiza, mu nsi gye yali tamanyangako, olwʼokukkiriza yasulanga mu weema era lsaaka ne Yakobo nabo bwe baakola, Katonda ngʼabasuubizza nga bwe yasuubiza Ibulayimu.

¹⁰Ibulayimu yali alindirira ekibuga kiri ekirina omusingi, Katonda kye yategeka era nʼazimba.

¹¹Olwʼokukkiriza ne Saala yennyini, omukazi omugumba yaweebwa amaanyi okuba olubuto newaakubadde nga yali ayise ku myaka egyʼokuzaalirako; yakkiriza nti oyo amusuubizza mwesigwa.

¹²Bwe kityo bangi ne bava mu muntu omu eyali omukadde ennyo ne baba bangi nnyo ngʼemmunyeenye ezʼoku ggulu, era ngʼomusenyu oguli ku nnyanja ogutabalika.

¹³Abo bonna baafiira mu kukkiriza. Baafa nga Katonda bye yabasuubiza tebannabifuna, naye nga basanyufu nga bamanyi nti Bibalindiridde, kubanga baategeera nti Ku nsi kuno baali bagenyi bugenyi abatambuze.

¹⁴Aboogera bwe batyo balaga nti Bayolekedde obutaka bwabwe obwʼomu nsi endala.

¹⁵Abantu abo singa baalowooza ku birungi ebyʼensi eno bandisobodde okudda emabega.

¹⁶Naye kaakano beegomba ensi esingako, ye yʼomu ggulu. Katonda kyava aba Katonda waabwe, nga tekimuswaza kuyitibwa bwʼatyo, kubanga abateekeddeteekedde ekibuga.

¹⁷Olwʼokukkiriza Ibulayimu bwe yagezesebwa, nʼawaayo Isaaka omwana we omu yekka, eyaweebwa ebyasuubizibwa,

¹⁸ⓕ gwe kyayogerwako nti, “Mu Isaaka mwʼolifunira abazzukulu,”

¹⁹gwe yamanya nga Katonda ayinza okumuzuukiza mu bafu, era nʼayaniriza Isaaka, nga Isaaka ali ngʼazuukidde mu bafu.

²⁰Olwʼokukkiriza ebyo ebyali bigenda okubaawo, Isaaka yasabira Yakobo ne Esawu omukisa.

²¹ⓖ Olwʼokukkiriza Yakobo bwe yali anaatera okufa, yasabira bazzukulu be abaana ba Yusufu omukisa kinoomu, nʼakutama ku muggo gwe nʼasinza Katonda.

²²Yusufu bwe yali anaatera okufa, olwʼokukkiriza yayogera ku kuva kwʼabaana ba Isirayiri mu Misiri, era nʼabalagira nʼokutwala amagumba ge nga baddayo ewaabwe.

²³Olwʼokukkiriza bakadde ba Musa bwe yazaalibwa baamukwekera emyezi esatu, kubanga baalaba nga mwana mulungi, ne batatya kiragiro kya Falaawo.

²⁴Olwʼokukkiriza Musa ngʼakuze, yagaana okuyitibwa omwana wʼomumbejja wa Falaawo

²⁵nʼalondawo okubonaabonera awamu nʼabantu ba Katonda nʼagaana okuba mu ssanyu eryʼekibi eriggwaawo amangu.

²⁶Musa yalaba nti okuvumibwa olwa Kristo kisingira wala obugagga bwʼe Misiri, kubanga yali asuubira empeera.

²⁷Olwʼokukkiriza Musa yava mu Misiri nga tatya busungu bwa Falaawo, kubanga yanywera ngʼalaba Katonda oyo atalabika na maaso buuso agʼomubiri.

²⁸Olwʼokukkiriza Musa yassaawo Embaga ejjuukirirwako Okuyitako, nʼamansira omusaayi omuzikiriza aleme okutta abaana ababereberye Abayisirayiri.

²⁹Olwʼokukkiriza Abayisirayiri baasomoka Ennyanja Emyufu ngʼabayita ku lukalu. Naye Abamisiri bwe baakigezaako amazzi ne gabasaanyaawo.

³⁰Olwʼokukkiriza, bbugwe wa Yeriko yagwa nga kimaze okwebungululirwa ennaku musanvu.

³¹Olwʼokukkiriza malaaya Lakabu, teyazikirizibwa nʼabajeemu, kubanga yasembeza abakessi, nʼemirembe.

³²Njogere ki nate? Nʼekiseera kinaanzigwako bwe nnaayogera ku Gidyoni, ne ku Baraki, ne Samusooni, ne Yefusa, ne Dawudi, ne Samwiri ne bannabbi abalala,

³³abaawangula bakabaka olwʼokukkiriza, be baakola ebyʼobutuukirivu, be baafuna ebyasuubizibwa, era be baabuniza obumwa bwʼempologoma,

³⁴be baazikiza omuliro ogwʼamaanyi, be baawona obwogi bwʼekitala. Be baaweebwa amaanyi okuva mu bunafu, era be baafuuka abazira abʼamaanyi mu ntalo, ne bagoba amaggye gʼamawanga.

³⁵Abakazi baddizibwa abantu baabwe abaali bafudde ne bazuukira. Abalala baabonyaabonyezebwa okutuusa okufa, nga tebalokolebbwa, balyoke bafune obulamu obusingako nga bazuukidde.

³⁶Nʼabalala ne basekererwa ne bakubibwa embooko nga bagezesebwa, nʼabalala ne basibwa ne bateekebwa ne mu makomera.

³⁷Baakubibwa amayinja, baasalibwamu nʼemisumeeno, ne battibwa nʼekitala. Baatambulanga nga bambadde amaliba gʼendiga nʼagʼembuzi nga kumpi tebalina kantu, nga bali mu kwetaaga, ne banyigirizibwa, ne bayisibwa bubi,

³⁸nʼensi nga tebasaanira, nga bayita mu malungu ne mu nsozi nga beekweka mu mpuku ne mu mpampagama zʼenjazi.

³⁹Naye abantu bano bonna abajjula okukkiriza tebaafuna kyasuubizibwa.

⁴⁰Kubanga Katonda yatuteekerateekera ekisinga obulungi, bo baleme okutuukirizibwa ffe nga tetuliiwo.