Abaebbulaniya 12:1-29 LGCB2014 - Bible AI

¹Kale nga bwe tulina ekibiina ekinene ekyʼabajulirwa ekyenkana awo, twambulengamu buli ekizitowa, awamu nʼekibi ekitwesibako amangu, tuddukenga nʼokugumiikiriza embiro ezʼempaka ezatutegekerwa,

²nga tutunuulira Yesu eyatandika okukkiriza era yʼakutuukiriza, olwʼessanyu lye yali alindirira bwe yagumiikiriza omusaalaba, ngʼanyooma ensonyi, nʼatuula ku luuyi olwa ddyo olwʼentebe ya Katonda.

³Kale mulowooze oyo eyagumiikiriza okuwakanyizibwa okwʼabakozi bʼebibi bwe kutyo, mulemenga okukoowa mu mmeeme zammwe nga mutendewererwa ne mu mutima.

⁴Temunnalwanagana na kibi okutuusa ne kukuyiwa omusaayi!

⁵Mwerabidde ebigambo ebizzaamu amaanyi byayogera nammwe ngʼabaana be? Agamba nti,

⁵ⓗ “Mwana wange, tonyoomanga kukangavvulwa kwa Mukama, so toggwangamu maanyi ngʼakunenyezza.

⁶Kubanga Mukama gwʼayagala amukangavvula, Era abonereza buli gwʼayita omwana we.”

⁷Noolwekyo mugumiikirize okukangavvulwa, kubanga Katonda abakangavvula ngʼabaana be. Mwana ki kitaawe gwʼatakangavvula?

⁸Naye singa temukangavvulwa, nga bwe kitugwanira ffenna, muba temuli baana be ddala.

⁹Kale, nga bwe mussaamu ekitiibwa bakitaffe abʼomubiri, newaakubadde nga batukangavvula, nga batuyigiriza, kitaawe wʼemyoyo talisinga nnyo okutukangavvula ne tuba abalamu?

¹⁰Bakitaffe abʼomubiri baatugunjulira ennaku si nnyingi, naye ye atugunjula tugasibwe tulyoke tusobole okugabanira awamu naye mu butukuvu bwe.

¹¹Okukangavvulwa kwonna mu biro ebya kaakano tekufaanana nga kwa ssanyu, kuba kwa bulumi, naye oluvannyuma kuleeta ebibala ebyʼemirembe eri abo abayigirizibwa, era ekivaamu bwe butuukirivu.

¹²Bwe mutyo munyweze emikono gyammwe egikooye nʼamaviivi gammwe agajugumira,

¹³era ebigere byammwe mubikolere ekkubo eggolokofu, abo ababagoberera newaakubadde nga balema era banafu, baleme okuva mu kkubo eryo, wabula bawonyezebwe.

¹⁴Mufubenga okuba nʼemirembe nʼabantu bonna, era mufubenga okuba abatukuvu, kubanga atali mutukuvu taliraba Mukama.

¹⁵Buli muntu afe ku munne waleme kubeerawo nʼomu ava mu kisa kya Katonda, era mwekuume ensigo eyʼobukyayi ereme okuloka mu mmwe, bangi ne bagwagwawala.

¹⁶Era mwegendereze waleme okubaawo omwenzi mu mmwe wadde atatya Katonda nga Esawu eyatunda ebyobusika bwe olwʼolulya olumu.

¹⁷Oluvannyuma ne bwe yagezaako okusikira omukisa ogwo, teyasiimibwa, era teyafuna mukisa kwenenya newaakubadde nga yagunoonya nʼamaziga mangi.

¹⁸Temuzze ku lusozi olulabika olwaka omuliro, nʼokukankana nʼekizikiza ekikutte, ne kibuyaga,

¹⁹nʼeri eddoboozi lyʼakagombe nʼeri eddoboozi eryʼebigambo nʼabo abaaliwulira ne batayinza na kweyongera kuligumira.

²⁰Kubanga tebaayinza kugumira ekyo ekyalagirwa Katonda nti, ⓘ “Ne bwʼeba ensolo, bwʼekomanga ku lusozi ekubwanga amayinja nʼefa.”

²¹Ne Musa nʼatya nnyo olwʼekyo kye yalaba nʼayogera nti, ⓙ “Ntidde nnyo era nkankana.”

²²Naye muzze ku lusozi Sayuuni, ne mu kibuga kya Katonda omulamu, mu Yerusaalemi ekyʼomu ggulu nʼeri enkumi nʼenkumi ezʼabamalayika abakuŋŋaanye,

²³nʼeri ekkanisa eyʼabo abaasooka, amannya gaabwe agaawandiikibwa mu ggulu, nʼeri Katonda Omulamuzi wa bonna, nʼeri emyoyo egyʼabantu abaatukirizibwa,

²⁴nʼeri endagaano empya eya Yesu omutabaganya, eyʼomusaayi ogwamansirwa ogwogera obulungi okusinga ogwa Aberi.

²⁵Kale mugonderenga oyo ayogera nammwe. Obanga Abayisirayiri tebaayinza kulokoka, bwe baagaana okuwulira oyo eyabalabula ngʼali ku nsi, tetuliyisibwa bubi nnyo nʼokusingawo, bwe tulijeemera ekigambo kyʼoyo owʼomu ggulu atulabula?

²⁶Yakankanya ensi nʼeddoboozi lye kyokka nʼasuubiza nti, ⓚ “Omulundi omulala sirinyeenya nsi yokka, naye era nʼeggulu.”

²⁷Kino kitegeeza nti Agenda kumalawo nate ebyo ebinyenyezebwa, kyokka ebitanyenyezebwa bisigalewo.

²⁸Kale, nga bwe twaweebwa obwakabaka obutanyeenyezebwa, tusinze Katonda nga bwʼasiima nga tumussaamu ekitiibwa era nga tumutya.

²⁹Kubanga ddala, ⓛ “Katonda waffe, gwe muliro ogwokya.”