Abaebbulaniya 13:1-25 LGCB2014 - Bible AI

¹Mweyongere okwagalananga ngʼabooluganda.

²Temwerabiranga kusembeza bagenyi, kubanga waliwo abaasembeza bamalayika nga tebagenderedde.

³Mujjukirenga abasibe abali mu kkomera, nga muli nga abaasibirwa awamu nʼabo. Munakuwaliranga wamu nabo ababonyaabonyezebwa, kubanga nammwe muli mu mubiri.

⁴Obufumbo mubussangamu ekitiibwa nʼebirayiro byabwo, kubanga abakaba nʼabenzi Katonda alibasalira omusango, ne gubasinga.

⁵Mwewalenga omululu, bye mulina bibamalenga. Kubanga Katonda yagamba nti,

⁵ⓜ “Sirikuleka era sirikwabulira nʼakatono.”

⁶Kyetuva twogera nʼobuvumu nti, ⓝ “Mukama ye mubeezi wange, siityenga, omuntu ayinza ku nkola ki?”

⁷Mujjukirenga abakulembeze bammwe abaababuulira ekigambo kya Katonda, nga mutunuulira empisa zaabwe nga mugobereranga okukkiriza.

⁸Yesu Kristo nga bwe yali jjo, ne leero bwʼali era bwʼaliba emirembe nʼemirembe.

⁹Temusendebwasendebwanga kuyigiriza okwʼengeri ennyingi ezitamanyiddwa. Kubanga kirungi omutima okunywezebwa ekisa, so si mu byokulya ebitagasa abo ababirya.

¹⁰Tulina ekyoto, abaweereza mu weema eyʼokusisinkanirangamu kye batalina buyinza kuliirangako.

¹¹Kabona Asinga Obukulu yatwalanga omusaayi gwʼebisolo, olwʼebibi, mu kifo ekitukuvu era nʼennyama yaabyo nʼeyokerwa ebweru wʼolusiisira.

¹²Noolwekyo ne Yesu kyeyava abonaabonera era nʼafiira ebweru wʼekibuga alyoke atutukuze nʼomusaayi gwe ye.

¹³Kale naffe tufulume tulage gyʼali ebweru wʼolusiisira nga twetisse ekivume kye.

¹⁴Kubanga wano ku nsi tetulinaawo kibuga kya lubeerera, wabula tulindirira ekyo ekijja.

¹⁵Kale mu Yesu tuweerayo bulijjo ssaddaaka eyʼokutendereza Katonda, kye kirabo ekyʼemimwa, nga twatula erinnya lye.

¹⁶Temwerabiranga kukola bulungi nʼokugabananga; kubanga ssaddaaka eziri ngʼezo Katonda zimusanyusa.

¹⁷Muwulirenga abakulembeze bammwe era mubagonderenga, kubanga obuweereza bwabwe kwe kulabirira emyoyo gyammwe, balyoke bakikole nʼessanyu nga tebeemulugunya. Kubanga bwe babeemulugunyiza tekibagasa mmwe.

¹⁸Mutusabirenga, kubanga tumanyidde ddala nga tulina omwoyo mulungi, era twagala okukolanga obulungi mu buli kimu.

¹⁹Era okusinga ennyo mbeegayirira munsabire ndyoke nkomewo mangu gye muli.

²⁰Kale, Katonda owʼemirembe eyazuukiza Mukama waffe Yesu, Omusumba wʼendiga omukulu owʼendagaano etaggwaawo gye yanyweza nʼomusaayi gwe,

²¹abawe buli kirungi kyonna kye mwetaaga okubasobozesa okukola byʼayagala, era atukozese ebisiimibwa mu maaso ge ngʼayita mu Yesu Kristo. Aweebwenga ekitiibwa emirembe nʼemirembe. Amiina.

²²Kaakano mbakuutira abooluganda, mugumiikirizenga ebibabuulirirwa, kubanga mbawandiikidde mu bigambo bitono.

²³Mbategeeza nti Muganda waffe Timoseewo yateebwa, bwʼalijja amangu, ndijja naye eyo okubalaba.

²⁴Mulamuse abakulembeze bammwe era nʼabakkiriza bonna. Abʼomu Italiya babalamusizza.

²⁵Ekisa kibeerenga nammwe mwenna.