Abaebbulaniya 2:1-18 LGCB2014 - Bible AI

¹Kyekivudde kitusaanira okussaayo ennyo omwoyo ku bintu bye twawulira, si ku lwa nga tuwaba ne tubivaako.

²Obanga ekigambo ekyayogerwa bamalayika kyakola, na buli eyayonoona era nʼajeemera ekigambo ekyo, yaweebwa ekibonerezo ekimusaanira,

³ffe tuliwona tutya bwe tuliragajjalira obulokozi obukulu obwenkana awo? Obulokozi obwo bwasooka okwogerwa Mukama waffe, ne bulyoka bukakasibwa abo abaabuwulira.

⁴Katonda yakikakasiza mu bubonero ne mu byʼekitalo ne mu byamagero abitali bimu, era ne mu birabo ebya Mwoyo Mutukuvu bye yagaba nga bwe yayagala.

⁵Ensi empya gye twogerako si yakufugibwa bamalayika.

⁶ⓗ Waliwo mu byawandiikibwa, omuntu we yagambira Katonda nti,

⁶“Omuntu kye ki ggwe okumujjukira? Oba Omwana wʼOmuntu ye ani ggwe okumussaako omwoyo?

⁷Wamussa obuteenkana nga bamalayika, okumala akaseera katono, wamutikkira engule eyʼekitiibwa nʼettendo,

⁸nʼoteeka ebintu byonna wansi wʼebigere bye.”

⁸Katonda atadde buli kintu wansi we. Kyokka kaakano tetulaba bintu byonna nga biteekeddwa wansi we.

⁹Naye tulaba Yesu eyassibwa wansi wa bamalayika okumala akaseera akatono. Olwʼekisa kya Katonda, yabonaabona nʼafa, alyoke alege ku kufa ku lwa buli muntu, nʼatikkirwa engule eyʼekitiibwa nʼettendo.

¹⁰Katonda oyo eyatonderwa ebintu byonna, era mu oyo Yesu Kristo ebintu byonna mwe byatonderwa, eyalondebwa okuleeta abaana abangi mu kitiibwa. Era kyasaanira Yesu okubonyaabonyezebwa, ngʼomukulembeze omutuukirivu, okubaleetera obulokozi.

¹¹Oyo atukuza era nʼabo abatukuzibwa bava mu omu bonna. Noolwekyo takwatibwa nsonyi kubayita baganda be.

¹²ⓘ Agamba nti,

¹²“Nditegeeza baganda bange erinnya lyo, era nnaakuyimbiranga ennyimba wakati mu kkuŋŋaaniro.”

¹³ⓙ ⓚ Era awalala agamba nti, “Nze nnaamwesiganga oyo.” Ate ne yeeyongera nʼagamba nti, “Laba nze nʼabaana Katonda be yampa.”

¹⁴Olwʼokubanga abaana balina omubiri nʼomusaayi, naye yalina omubiri nʼomusaayi, alyoke azikirize oyo alina amaanyi agʼokufa, ye Setaani.

¹⁵Yakikola alyoke awe eddembe abo bonna abaali bamaze obulamu bwabwe bwonna mu buddu olwʼentiisa yʼokufa.

¹⁶Kubanga ekyʼamazima kiri nti tayamba bamalayika, ayamba zzadde lya Ibulayimu.

¹⁷Kyekyava kimugwanira mu byonna okufaananyizibwa baganda be, alyoke abeerenga Kabona Asinga Obukulu asaasira era omwesigwa mu kuweereza Katonda. Ekyo yakikola alyoke atangirire ebibi byʼabantu.

¹⁸Yabonaabona, ye yennyini ngʼakemebwa, alyoke ayambe abo abakemebwa.