Abaebbulaniya 3:1-19 LGCB2014 - Bible AI

¹Kale abooluganda abatukuvu, Katonda bʼayise, mulowoozenga ku Yesu, Omutume Omukulu era Kabona Asinga Obukulu, gwe twatula.

²Yali mwesigwa eri oyo eyamulonda, era nga Musa bwe yali omwesigwa mu nnyumba ya Katonda yonna.

³Kubanga ngʼomuzimbi bwʼaweebwa ekitiibwa okusinga ennyumba gyʼazimbye, bwʼatyo Yesu wa kitiibwa okusinga Musa.

⁴Kubanga buli nnyumba wabaawo agizimba, naye Katonda ye yʼazimba buli kintu.

⁵Musa yali muweereza mwesigwa mu nnyumba ya Katonda yonna, eyayogera ebyʼobunnabbi ku bintu ebyali bigenda okwogerwa mu biro ebyʼomu maaso.

⁶Naye ate Kristo ye Mwana omwesigwa, akulira ennyumba ya Katonda; ate ffe tuli nnyumba yʼoyo bwe tunywera ne tuba bavumu ne twenyumiririza mu ssuubi lye tunywezezza.

⁷ⓛ Noolwekyo nga Mwoyo Mutukuvu bwʼagamba nti, “Leero bwe munaawulira eddoboozi lye,

⁸temukakanyaza mitima gyammwe, nga bali bwe baajeema, ku lunaku lwe bagezesaako Katonda mu ddungu.

⁹Bajjajjammwe bangezesa, ne balaba bye nakola mu myaka amakumi ana.

¹⁰Kyennava nsunguwalira omulembe ogwo, ne njogera nti Bulijjo baba bakyamu mu mitima gyabwe, era tebamanyanga makubo gange.

¹¹Nasunguwala ne ndayira nti, Tebaliyingira mu kiwummulo kyange.”

¹²Mwekuume abooluganda, omutima omubi ogwʼobutakkiriza gulemenga kuba mu muntu yenna ku mmwe, ne gubaggya ku Katonda omulamu.

¹³Mubuuliraganenga mwekka na mwekka bulijjo ngʼekiseera kikyaliwo, waleme okubaawo nʼomu ku mmwe akakanyazibwa obulimba bwʼekibi.

¹⁴Olwʼokubanga tussa kimu mu Kristo, tunywereze ddala obwesige bwaffe bwe twatandika nabwo, era tubunywereze ddala okutuusa ku nkomerero.

¹⁵ⓜ Kyogerwako nti,

¹⁵“Leero bwe munaawulira eddoboozi lye temukakanyaza mitima gyammwe nga bali bwe baajeema.”

¹⁶Be baani abaawulira, naye ne bajeema? Si abo bonna abaava mu Misiri ne Musa?

¹⁷Era baani be yanyiigira okumala emyaka amakumi ana? Si abo abaayonoona ne bafiira mu ddungu?

¹⁸Era baani abo Katonda be yalayirira obutayingira mu kiwummulo kye? Si abo abataagonda?

¹⁹Era tulaba nga baalemwa okuyingira olwʼobutakkiriza bwabwe.